ថ្ងៃទី ២២ ខែ តុលា ឆ្នាំ២០១៩ មូលនិធិ ពិភពលោកដ៏ស្រស់ត្រកាល នៃប្រទេសកូរ៉េខាងត្បូង តាមរយៈអង្គការឡតធីសវើល បាននាំយកកង់ចំនួន ៣០០គ្រឿងចែកជូនដល់ សិស្សានុសិស្សក្រីក្រ និង កុមារកំព្រាដែលមកពីតាមសាលារៀន និងសហគមន៍ផ្សេងៗក្នុងខេត្ត សៀមរាប ។
មានប្រសាសន៍ស្វាគមន៍ក្នុងឱកាសនោះ លោក អោ ម៉ៅ ប្រធានមន្ទីរសង្គមកិច្ច អតីតយុទ្ធជននិងយុវនីតិសម្បទាខេត្តសៀមរាប បានថ្លែងអំណរគុណ ព្រះតេជគុណ ឆង់ យ៉ ជាប្រធានមូលនិធិ ពិភពលោកដ៏ស្រស់ត្រកាល និង ព្រះភិក្ខុនី សាន់ មូន ប្រធានអង្គការឡតធីសវើល ប្រចាំនៅកម្ពុជា ដែលតែងតែបានគិតគូដល់ សិស្សានុសិស្សក្រីក្រ និង កុមារកំព្រា នៅកម្ពុជា ជាពិសេសខេត្តសៀមរាប។
លោក អោ ម៉ៅ បានបញ្ជាក់ថា ក្នុងរយៈពេល ៤ ឆ្នាំកន្លងមកនេះ មូលនិធិពិភពលោកដ៏ស្រស់ត្រកាល បានបរិច្ចាគកង់សរុបចំនួន ១៥៥០គ្រឿង សម្រាប់ជួយលើកកម្ពស់ដល់ការសិក្សារបស់សិស្សានុសិស្ស ដែលមានជីវភាពក្រីក្រ និងនៅឆ្ងាយពីសាលារៀន បានមករៀនទៀងទាត់ និងទាន់ពេលវេលា។
ព័ត៌មានជាតិ ថ្មីៗ
សូមជម្រាបថា អង្គការឡតធីសវើល មានទីតាំងនៅក្នុងខេត្តសៀមរាប អង្គការនេះ តែងតែបានគៀងគរ សប្បុរសជននានា ជាពិសេសសប្បុរសជន មកពីប្រទេសកូរ៉េខាងត្បូង មកជួយជាសម្ភារៈសិក្សា អាគារសិក្សា បង្គន់អនាម័យ ជាដើម ដែលបានជួយលើកកម្ពស់ដល់វិស័យអប់រំនៅកម្ពុជា។
អត្ថបទ ៖ សេង ផល្លី
