ក្រសួងការពារប្រទេសតួកគី កាលពីថ្ងៃអង្គារនេះបាននិយាយថា ប្រទេសរុស្ស៊ីបានជូនដំណឹងថា ពួកយុទ្ធជនឃឺដស៊ីរី បានបញ្ចប់ការដកចេញចម្ងាយ៣០គីឡូម៉ែត្រពីព្រំដែនតួកគីហើយ ។
ក្រសួងនេះបាននិយាយនៅក្នុងសេចក្តីថ្លែងការណ៍ជាលាយលក្ខអក្សរមួយថា រុស្ស៊ីបានជូនដំណឹងដល់តួកគីថា កងឯកភាពការពារប្រជាជន ( YPG ) ក៏បានដកចេញពីទីក្រុង Manbij និង Tel Rifat ផងដែរជាមួយគ្រឿងសព្វាវុធធុនធ្ងន់របស់ខ្លួននៅឯចុងបញ្ចប់នៃរយៈពេល១៥០ ម៉ោងនោះ ។
ក្រសួងនេះបាននិយាយថា ទាហានរុស្ស៊ីនិងតួកគីនឹងចាប់ផ្តើមធ្វើការល្បាតរួមគ្នានៅចម្ងាយ ១០ គីឡូម៉ែត្រពីព្រំដែនតួកគី ធ្វើជាតំបន់ដែលបាន ព្រមព្រៀងគ្នានៅក្នុងកិច្ចព្រមព្រៀងមួយរវាងក្រុងអង់ការ៉ា និង ក្រុងមូស្គូ បន្ទាប់ពីគេបានផ្តល់ឱ្យនូវកិច្ចការពារសន្តិសុខតំបន់នោះ ដោយកត់សម្គាល់ថា ការហោះហើយសង្កេតការណ៍បានចាប់ផ្តើមរួចហើយ ។
ក្រសួងនេះបាននិយាយថា សកម្មភាពបោសសំអាតមីន និងគ្រឿងផ្ទុះធ្វើដោយដៃក៏ដូចជាការហោះហើរសង្កេតការណ៍បានចាប់ផ្តើមនៅលើផ្លូវល្បាតនោះ ។
នៅក្រោមកិច្ចព្រមព្រៀង ស.រ.អា – តួកគី ដែលបានសម្រេចកាលពីថ្ងៃទី១៧ ខែតុលា ស្តីពីការឈប់បាញ់មួយរយៈពេល៥ថ្ងៃនោះ តួកគីបានព្រមព្រៀងបញ្ឈប់ប្រតិបតិ្តការយោធារបស់ខ្លួន ដើម្បីរៀបចំផ្លូវសម្រាប់ការដកពួកយុទ្ធជន YPG ចេញពីតំបន់សុវត្ថិភាព ។
ក្រោយមកតួកគី និងរុស្ស៊ីបានព្រមព្រៀងផ្តល់ឱ្យពួកយុទ្ធជន YPG រយៈ ពេល ១៥០ ម៉ោងដើម្បីដកចេញចម្ងាយ៣០គីឡូម៉ែត្រពីតំបន់ព្រំដែនតួកគី ។ កាលកំណត់នេះបានបញ្ចប់កាលពីល្ងាចថ្ងៃអង្គារនេះ ៕
