នាល្ងាចថ្ងៃទី៣០ ខែតុលា ឆ្នាំ២០១៩នេះ នៅមុខប្រាសាទអង្គរវត្ត មានរៀបចំពិធីពិធីបួងសួង បន្ទាប់ពីពិធីបិទដង្ហែក្បួនធម្មយាត្រាលើកទី២ ក្នុងដែនដីទាំង៥ នៃតំបន់ទន្លេមេគង្គ មានដូចជា កម្ពុជា ថៃ ឡាវ វៀតណាម និងមីយ៉ាន់ម៉ា ក្រោមរាជាធិបតីភាពសម្ដេចអគ្គមហាសង្ឃរាជាធិបតី កិត្តិឧទ្ទេសបណ្ឌិតព្រះសង្ឃរាជ ទេព វង្ស សម្ដេចព្រះសង្ឃរាជនៃព្រះរាជាណាចក្រកម្ពុជា និង ក្រោមអធិបតីភាពដ៏ខ្ពង់ខ្ពស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តសៀមរាប ដោយមានការនិមន្ត និង អញ្ជើញចូលរួមពីសំណាក់ព្រះសង្ឃ និង ពុទ្ធបរិស័ទនៃប្រទេសទាំង៥ ថ្នាក់ដឹកនាំជាន់ខ្ពស់ក្នុងជួររាជរដ្ឋភិបាលកម្ពុជា សមាជិករដ្ឋសភា គណៈអភិបាលខេត្តសៀមរាប ថ្នាក់ដឹកនាំមន្ទីរអង្គភាព និង ប្រជាពុទ្ធបរិស័ទក្នុងខេត្តសៀមរាប ជាច្រើនរូប ។
សូមបញ្ជាក់ថា ពិធីដង្ហែក្បួនធម្មយាត្រាលើកទី២ តាមគន្លងធម៌ព្រះអរិយសង្ឃ ក្នុងដែនដីទាំង៥ នៃតំបន់ទន្លេមេគង្គនេះ បានធ្វើដំណើរអស់រយៈពេលជាង១០ថ្ងៃ ដែលផ្តើមចេញដំណើរពីវត្តព្រះធាតុជា ស្រុកលៀងសែន ខេត្តឈៀងរ៉ាយ ប្រទេសថៃ ដោយឆ្លងកាត់តាមប្រទេសឡាវ , វៀតណាម , មីយ៉ាន់ម៉ា និងបិទបញ្ចប់កម្មវិធីនៅលើទឹកដីអង្គរវត្តដ៏បវរនាក្រុងសៀមរាប នៃព្រះរាជាណាចក្រកម្ពុជា កាលពីរសៀលថ្ងៃទី៣០ ខែតុលា ឆ្នាំ២០១៩ នៅសណ្ឋាគារសូហ្វីតែលអង្គរភូគីត្រាសៀមរាប ។
ក្នុងឱកាសនៃពិធីបិទដង្ហែក្បួនធម្មយាត្រានៅខេត្តសៀមរាបនេះ មានកម្មវិធីជាច្រើន ដូចជា ៖ ពិធីដាំដើមពោធិប្រឹក្សនៅវត្តទេពពោធិវង្ស , ពិធីដង្ហែធម្មយាត្រានៅក្នុងក្រុងសៀមរាប និង ពិធីរាប់បាត្រនៅព្រះអង្គចេកព្រះអង្គចម ៕
ព័ត៌មានជាតិ ថ្មីៗ
អត្ថបទ ៖ លោក លីវ សាន្ត
រូបថត ៖ សហការី
