នាព្រឹកថ្ងៃទី៣១ ខែតុលា ឆ្នាំ២០១៩នេះ នៅវត្តចារឈូក ឃុំចារឈូក ស្រុកអង្គរជុំ មន្ទីរទំនាក់ទំនងជាមួយរដ្ឋសភា-ព្រឹទ្ធសភានិងអធិការ កិច្ចខេត្តសៀមរាប បានរៀបចំពិធីផ្សព្វផ្សាយច្បាប់ស្ដីពីការត្រួតពិនិត្យគ្រឿងញៀន ជូនដល់សិស្សានុសិស្សនៃសាលាបឋមសិក្សាដូនស្វា , សិស្សវិទ្យាល័យអង្គរជុំ និង ប្រជាពលរដ្ឋនៅក្នុងឃុំចារឈូក ក្នុងគោលបំណងកាត់បន្ថយនូវបទល្មើសគ្រប់ប្រភេទ ដែលពាក់ព័ន្ធនឹងការប្រើប្រាស់ថ្នាំញៀនខុសច្បាប់ ដើម្បីរួមចំណែកក្នុងការលើកកម្ពស់សន្តិសុខ សុវត្ថិភាព និង សុខុមាលភាពសង្គម ព្រមទាំងធ្វើឲ្យជីវភាពរស់នៅរបស់ប្រជាពលរដ្ឋក្នុងសហគមន៍បានល្អប្រសើរ ។
លោក លុក ផុស អភិបាលស្រុកអង្គរជុំ មានប្រសាសន៍ថា ក្នុងនាមអាជ្ញាធរស្រុកអង្គរជុំ សូមថ្លែងអំណរគុណចំពោះមន្ទីរទំនាក់ទំនងជាមួយរដ្ឋសភា-ព្រឹទ្ធសភានិងអធិការកិច្ចខេត្តសៀមរាប ដែលបានផ្ដួចផ្ដើមការផ្សព្វផ្សាយច្បាប់ស្ដីពីការត្រួតពិនិត្យគ្រឿងញៀននេះ ព្រោះ ថាពិធីនេះ ពិតជាមានសារៈសំខាន់ខ្លាំងណាស់សម្រាប់បង្កើនការយល់ដឹងបន្ថែមទៀត ជូនដល់ប្រជាពលរដ្ឋនិងសិស្សានុសិស្សក្នុងស្រុកអង្គរជុំ អំពីផលប៉ះពាល់នៃការប្រើប្រាស់ថ្នាំញៀនខុសច្បាប់ ខណៈដែលគ្រឿងញៀននេះ ជាបញ្ហារួម ហើយត្រូវរួមគ្នាដោះស្រាយ ។
លោក លុក ផុស មានប្រសាសន៍បន្ថែមថា បច្ចុប្បន្ននេះ ការ ចែក ចាយ ការធ្វើចរាចរណ៍ និង ការប្រើប្រាស់ដោយខុសច្បាប់នូវសារធាតុញៀននេះ មិនត្រឹមតែកើតមានឡើងនៅទីប្រជុំជនប៉ុណ្ណោះនោះទេ ប៉ុន្តែបានកើតមានរហូតដល់ជនបទផងដែរ ដែលវាបានធ្វើឲ្យប៉ះពាល់ដល់សេចក្ដីសុខ និង សុខភាពផ្ទាល់ខ្លួនឯងនោះទេ គឺវាបានធ្វើឲ្យប៉ះពាល់អសន្តិសុខដល់សង្គមទាំងមូល ដូច្នេះក្នុងឱកាសនេះ សូមអំពាវនាវដល់បងប្អូនប្រជាពលរដ្ឋ និង សិស្សានុសិស្សដែលមានវត្តមាននៅទីនេះ សូមយកចិត្តទុកដាក់ត្រងត្រាប់នូវការពន្យល់ និង បកស្រាយពីសំណាក់វាគ្មិន ដើម្បីរួមគ្នាទប់ស្កាត់ឲ្យកាន់តែមានប្រសិទ្ធភាព ។
ព័ត៌មានជាតិ ថ្មីៗ
លោកវរៈសេនីយ៍ឯក អ៊ុ សាអាត នាយការិយាល័យប្រឆាំងគ្រឿង ញៀន នៃស្នងការដ្ឋាននគរបាលខេត្តសៀមរាប បានមានប្រសាសន៍ ថា ក្នុងនាមលោកជាវាគ្មិន ហើយអ្វីដែលលោកលើកយកមកបង្ហាញនៅពេលនេះ មិនមែនបំផុសគំនិតឲ្យបងប្អូនប្រជាពលរដ្ឋ និង សិស្សានុសិស្សយកទៅអនុវត្តនោះទេ ប៉ុន្តែគឺចង់បង្ហាញនូវអ្វីៗ ដែលពាក់ព័ន្ធនឹងគ្រឿងញៀវ ដើម្បីបង្កើនចំណេះដឹងថ្មីៗបន្ថែមទៀត ដើម្បីរួមគ្នាទប់ស្កាត់ឲ្យកាន់តែមានប្រសិទ្ធភាព និង ទាន់ពេលវេលា ព្រមទាំងធ្វើការផ្សព្វផ្សាយបន្តនៅក្នុងក្រុមគ្រួសាររបស់ខ្លួន ដើម្បីឲ្យចាកឆ្ងាយពីគ្រឿងញៀន ព្រោះ ថា គ្រឿងញៀន នេះ មិន ត្រឹម តែ ប៉ះ ពាល់ ដល់ ខ្លួនឯង ក្រុម គ្រួសារ និង សង្គម ជាតិ ប៉ុណ្ណោះ នោះ ទេ វា ថែម ទាំង ធ្វើ ឲ្យ យើង មាន ទោស ទណ្ឌ និង ខូច អនាគត ខ្កួន ឯង ផង ដែរ ។
លោក លឹម ភក្ដី ប្រធានមន្ទីរទំនាក់ទំនងជាមួយរដ្ឋសភា-ព្រឹទ្ធសភានិងអធិការកិច្ចខេត្តសៀមរាប បានមានប្រសាសន៍ថា គោល បំណង ដែលមន្ទីររៀបចំពិធីផ្សព្វផ្សាយច្បាប់ស្ដីពីការត្រួតពិនិត្យគ្រឿង ញៀន នាពេលនេះ គឺដើម្បីកាត់បន្ថយនូវបទល្មើសគ្រប់ប្រភេទ ដែលពាក់ព័ន្ធនឹងការប្រើប្រាស់ថ្នាំញៀនខុសច្បាប់ និង រួមចំណែកក្នុងការលើកកម្ពស់សន្តិសុខ សុវត្ថិភាព និង សុខុមាលភាពសង្គម ព្រមទាំងធ្វើឲ្យជីវភាពរស់នៅរបស់ប្រជាពលរដ្ឋក្នុង សហគមន៍ បានល្អប្រសើរ ជាពិសេសបង្កើនការយល់ដឹងចំពោះមាតាបិតា និង អាណាព្យាបាលទាំងអស់ នូវសកម្មភាពប្រចាំថ្ងៃកូនចៅរបស់ខ្លួន ថាតើ មានជាប់សង្ស័យនឹងប្រព្រឹត្តពាក់ព័ន្ធនឹងគ្រឿងញៀនដែរឬអត់ ដើម្បីរួមគ្នាបង្ការ និង ទប់ស្កាត់ឲ្យបានទាន់ពេលវេលា ហើយលោករំពឹងថា បន្ទាប់ពីបញ្ចប់ការផ្សព្វផ្សាយច្បាប់នេះ បញ្ហាពាក់ព័ន្ធនឹងការប្រើប្រាស់ថ្នាំញៀនខុសច្បាប់ នឹងត្រូវបានកាត់បន្ថយ និង លុបបំបាត់បានទាំងស្រុង ៕
អត្ថបទ ៖ លោក លីវ សាន្ត
រូបថត ៖ លោក ហាំ ម៉េងហួត
