នៅព្រឹកថ្ងៃទី៣១ ខែតុលា ឆ្នាំ២០១៩ លោកឧកញ៉ាបណ្ឌិត ហ៊ុយ ភៀវ ប្រធានសភាពាណិជ្ជកម្មខេត្តសៀមរាប-ឧត្តរមានជ័យ បានជួបសំណេះសំណាល ជាមួយប្រតិភូមកពីខេត្តហ៊ឺប៉ី ផ្នែកជរុញពាណិជ្ជកម្មនៃប្រទេសចិន នៅសភាពាណិជ្ជកម្មខេត្តសៀមរាប-ឧត្តរមានជ័យ ក្នុងក្រុងសៀមរាប។
ក្នុងកិច្ចសំណេះសំណាលនោះ ប្រតិភូចិន លើកឡើងថា ខេត្តហ៊ឺប៉ី ទិដ្ឋភាពសង្គម និងកត្តាសេដ្ឋកិច្ចស្រដៀងនឹងខេត្តសៀមរាប ជាពិសេសខេត្តហ៊ឺប៉ីមានការរីកចម្រើនលើវិស័យជាច្រើន ដូចជា៖ ទេសចរណ៍ កសិកម្ម រោងចក្រ ការធ្វើពាណិជ្ជកម្ម ដោយម៉ាស៊ីនកែច្នៃគ្រប់ប្រភេទ ។ល។ ដូចនេះ ក្រុមប្រតិភូមកខេត្តសៀមរាបនាពេលនេះ មានគោលបំណង សិក្សាស្វែងយល់អំពីទិដ្ឋភាពសេដ្ឋកិច្ច និង វិស័យសំខាន់ៗ ក្នុងខេត្តសៀមរាប ដើម្បីប្រមូលព័ត៌មាន និងផ្សព្វផ្សាយជូនដល់អ្នកវិនិយោគក្នុងខេត្តហ៊ូប៉ី។
លោកឧកញ៉ាបណ្ឌិត ហ៊ុយ ភៀវ បានជម្រាបដល់ប្រតិភូចិន អំពីវិស័យសក្តានុពលចំបងក្នុងខេត្តសៀមរាប គឺទេសចរណ៍ និងកសិកម្ម ដែលកំពុងដើរតួនាទីយ៉ាងសំខាន់ក្នុងការទ្រទ្រង់ចរន្តសេដ្ឋកិច្ចខេត្តសៀមរាប។
ដោយឡែក លោកឧកញ៉ាបណ្ឌិត ហ៊ុយ ភៀវ បានស្នើដល់ប្រតិភូខេត្តហ៊ឺប៉ី បង្កើតជារោងចក្រកែច្នៃផលិតផលកសិកម្ម ដើម្បីកាត់បន្ថយការនាំចេញវត្ថុធាតុដើមពីក្នុងប្រទេស។ មួយវិញទៀត វាជាឱកាសនៃការចំនេញយ៉ាងច្រើន ប្រសិនបើភាគីចិនអាចបង្កើតបានមុនគូប្រជែងដទៃ។ ដោយឡែកការបង្កើតមជ្ឈមណ្ឌលកំសាន្ត ផ្សារទំនើប ឬសេវាកំសាន្ត ក្រៅពីការទស្សនា ប្រាង្គប្រាសាទ ក្នុងខេត្តសៀមរាប វាជាតម្រូវការចំបាច់ផងដែរសម្រាប់ខេត្ត ព្រោះយើង អាចពន្យាការស្នាក់នៅការដើរកំសាន្តរបស់ភ្ញៀវទេសចរ ហើយអាចទាញអ្នកទេសចរមកលេងពីប្រទេសផ្សេងៗ បានច្រើនបន្ថែមទៀត។
ក្នុងកិច្ចសំណេះសំណាលនោះ ប្រតិភូចិន មានចំណាប់អារម្មណ៍ខ្លាំងទៅលើការកែឆ្នៃផលិតផលគ្រាប់ស្វាយចន្ទីរបស់ប្រទេសកម្ពុជាដែលមាន រសជាតិឈ្ងុយឆ្ងាញ់ជាងប្រទេសដ៏ទៃផងដែរ ។
អត្ថបទ និង រូបភាព ៖ លោក ទ្រា ពន្លឺ
កែសម្រួលអត្ថបទ ៖ លោក សេង ផល្លី
