គម្រោងលាភ ឬហៅថា គម្រោងលើកកម្ពស់ជីវភាពប្រជាជនក្រីក្រ បានរៀបចំតាក់តែងឡើងដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការកាត់បន្ថយភាពក្រីក្ររបស់ប្រជាពលរដ្ឋដែលមានអត្តសញ្ញាណក្រីក្រ ក្រ១ ក្រ២ និងជនងាយរងគ្រោះឲ្យមានជីវភាពល្អប្រសើរ។
នេះបើតាមប្រសាសន៍ របស់ ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជាប្រធានសម្របសម្រួលគម្រោងលាភ នៅក្នុងកិច្ចប្រជុំស្តីពីការពិនិត្យវឌ្ឍនភាពនៃការអនុវត្តគម្រោង និងការរៀបចំផែនការសកម្មភាព និងថវិកាសម្រាប់ឆ្នាំ២០២០ នៅក្នុងក្រុងសៀមរាប ថ្ងៃទី៣១ ខែតុលា ឆ្នាំ ២០១៩។
ឯកឧត្តម ងី ច័ន្ទ្រផល បានបង្ហាញថា ដោយទទួលបានជំនួយពីដៃគូអភិវឌ្ឍន៍ ជាពិសេសធនាគារពិភពលោក (World Bank) ដែលបានចូលរួមឧបត្ថម្ភគាំទ្រទាំងផ្នែកហិរញ្ញវត្ថុ និងផ្នែកបច្ចេកទេស តាមរយៈក្រសួងមហាផ្ទៃ គម្រោងលើកកំពស់ជីវភាពប្រជាជនក្រីក្រ(លាភ)បានរៀបចំតាក់តែងឡើងដោយឈរលើគោលការណ៍ មិនផ្តល់ត្រីឱ្យហូប តែជួយផ្តល់លទ្ឋភាពឱ្យប្រជាជនក្រីក្រចេះធ្វើឧបករណ៍ចាប់ត្រីដោយខ្លួនឯង។
មានវត្តមានក្នុងឱកាសនោះ លោក លី សំរិទ្ធ អភិបាលរងខេត្តសៀមរាប ទទួលបន្ទុកគម្រោងថ្នាក់ខេត្ត មានប្រសាសន៍ថា ខេត្តសៀមរាបកំពុងអភិវឌ្ឍន៍ និងលើកកម្ពស់ជីវភាពប្រជាពលរដ្ឋក្រីក្រតាមមូលដ្ឋាន។ ក្នុងនោះ រដ្ឋបាលខេត្តសៀមរាប ក៏ទទួលបាននូវគម្រោងលើកកម្ពស់ជីវភាពប្រជាជនក្រីក្រ (លាភ) ដើម្បីរួមចំណែកដឹកកម្ពស់កម្រិតជីវភាព និងសម្រួលការលំបាករបស់ប្រជាពលរដ្ឋតាមមូលដ្ឋានភូមិ ឃុំគោលដៅបេស់គម្រោង តាមរយៈការផ្តល់ទុនឧបត្ថម្ភ និងចំណេះដឹង ជំនាញនានាលើវិស័យកសិកម្ម និងគម្រោងហេដ្ឋារចនាសម្ព័ន្ធខ្នាតតូច ដែលទាំងនេះគឺជាការរួមចំណែកដ៏ធំមួយក្នុងការបន្ថយភាពក្រីក្របស់ប្រជាពលរដ្ឋ។
លោកលី សំរិទ្ឋ បានថ្លែងអរគុណចំពោះថ្នាក់ដឹកនាំគម្រោង ក្រុមការងារទាំងថ្នាក់ជាតិ ថ្នាក់ខេត្ត និងភាគីពាក់ព័ន្ធទាំងអស់ ដែលបានរួបរួម សហការ ទាំងកម្លាំងកាយចិត្ត បំពេញបេសកកម្មរបស់ខ្លួន ដើម្បីទិសដៅរួមមួយគឺជួយប្រជាពលរដ្ឋក្រីក្រទាំងអស់គ្នា ហើយកិច្ចប្រជុំនាពេលនេះជាយន្តការត្រួតពិនិត្យតាមដាន ដោះស្រាយនូវចំណុចប្រឈមនានាដែលបានកើតឡើងក្នុងពេលអនុវត្តកន្លងមក និងពិនិត្យរៀបចំយុទ្ធសាស្ត្រដើម្បីត្រៀមបង្កា ទប់ទល់ចំពោះបញ្ហាផ្សេងៗដែលនឹងកើតមានឡើងក្នុងឆ្នាំបន្តបន្ទាប់ទៀត។
សូមជម្រាបថា៖តាមប្រភពពីព្រឹត្តិបត្រព័ត៌មានចេញផ្សាយ ខែតុលា ឆ្នាំ២០១៩ របស់ការិយាល័យសម្របសម្រួលគម្រោង នៃក្រសួងមហាផ្ទៃ បានបង្ហាញថា គម្រោងលើកកម្ពស់ជីវភាពប្រជាក្រីក្រ(លាភ) ត្រូវបានដាក់ឱ្យដំណើរការអនុវត្តនៅឆ្នាំ២០១៧។ គម្រោងនេះជាគម្រោងមួយក្នុងចំណោមគម្រោងដទៃទៀត ដែលមានគោលបំណងពង្រឹងអំណាចសហគមន៍ និងលើកកម្ពស់ការចូលរួមរបស់ប្រជាជនក្រីក្រ និងក្រុមងាយរងគ្រោះ ក្នុងការធ្វើសកម្មភាពអភិវឌ្ឍសហគមន៍របស់ពួកគេឱ្យទទួលបានសេវាហិរញ្ញវត្ថុ និងឱកាសបង្កើតប្រាក់ចំណូលបានប្រសើរជាងមុន។ រយៈពេលនៃការអនុវត្តគម្រោងពីឆ្នាំ២០១៧ដល់ឆ្នាំ២០២២ បានប្រភពថវិកាមកពីសមាគមក្រុមប្រទេសជាសមាជិក របស់ធនាគារពិភពលោក សម្រាប់អភិវឌ្ឍន៍អន្តរជាតិ ចំនួន២០.១៧លានដុល្លារសហរដ្ឋអាមេរិក និងថវិកាបដិភាគរបស់រាជរដ្ឋាភិបាលកម្ពុជា ២លានដុល្លារសហរដ្ឋអាមេរិក ដោយមានភ្នាក់ងារអ្នកអនុវត្តគម្រោង ក្រសួងកសិកម្មរុក្ខាប្រមាញ់និងនេសាទ សាលរាជធានីភ្នំពេញ(១៣សង្កាត់ ខ័ណ្ឌ) និងសាលាខេត្តសៀមរាប (៤៧ឃុំមកពី៨ស្រុក)។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
