នាព្រឹកថ្ងៃទី៣១ ខែតុលា ឆ្នាំ២០១៩នេះ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប បានរៀបចំសិក្ខាសាលាមួយ ដើម្បីផ្សព្វផ្សាយផែនការយុទ្ធសាស្ត្រអភិវឌ្ឍន៍កិច្ចការពារ និងលើកកម្ពស់សិទ្ធិកុមារ សម្រាប់ឆ្នាំ២០១៩ ដល់ឆ្នាំ២០២៣ ក្រោមអធិបតីភាពលោក នាក់ ណេរ៉ុន អភិបាលរងខេត្ត និងជាប្រធានក្រុមប្រឹក្សាជាតិកម្ពុជាដើម្បីកុមារខេត្តសៀមរាប ដោយមានការចូលរួមពីសំណាក់លោក លោកស្រី ជាថ្នាក់ដឹកនាំ និង មន្ត្រីនៃមន្ទីរ អង្គភាពនានាក្នុងខេត្ត អាជ្ញាធរក្រុងស្រុក និង អង្គការដៃគូជាច្រើនរូប ។
លោក នាក់ ណេរ៉ុន បានមានប្រសាសន៍ថា ក្រុមប្រឹក្សាជាតិកម្ពុជាដើម្បីកុមារ គឺជាយន្តការសម្របសម្រួល និងផ្តល់យោបល់ថ្នាក់ជាតិពាក់ព័ន្ធនឹងវិស័យកុមារ ដែលមានសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ជាប្រធានកិត្តិយស និងមានសមាជិកចំនួន ២៦រូប មកពីក្រសួង ស្ថាប័នរបស់រាជរដ្ឋាភិបាលកម្ពុជា ហើយក្រុមប្រឹក្សាជាតិកម្ពុជាដើម្បីកុមារនេះ ទទួលខុសត្រូវក្នុងការសម្របសម្រួល ឆ្លើយតបទៅនឹងអនុសាសន៍របស់គណៈកម្មាធិការសិទ្ធិកុមារ របស់អង្គការសហប្រជាជាតិ លើការងារទាក់ទងនឹងការវិវឌ្ឍកិច្ចការពារ លើកកម្ពស់សុខុមាលភាពកុមារ និងលើកអនុសាសន៍ជូនរាជរដ្ឋាភិបាលកម្ពុជា ខណៈដែលរាជរដ្ឋាភិបាលកម្ពុជាបានបោះជំហានទៅមុខក្នុងការស្តារសង្គមនិងសេដ្ឋកិច្ចឡើងវិញ ដែលតម្រូវឲ្យកសាងធនធានមនុស្សជំនាញ និងប្រជាជនដែលមានសុខភាពល្អ ហើយរាជរដ្ឋាភិបាលកម្ពុជា បានវិភាជធនធានបន្ថែមទៀតដល់វិស័យសុខាភិបាល អប់រំ សង្គមកិច្ច និងវិស័យផ្សេងៗទៀត ដែលទាក់ទងនឹងការអភិវឌ្ឍធនធានមនុស្ស រួមទាំងការអភិវឌ្ឍកុមារ សំដៅសម្រេចឲ្យបាននូវគោលដៅអភិវឌ្ឍន៍សហសវត្សរ៍កម្ពុជា ដែលក្នុងនោះបានផ្តោតសំខាន់លើការអភិវឌ្ឍសុខុមាលភាពកុមារផងដែរ ។
លោក នាក់ ណេរ៉ុន មានប្រសាសន៍បន្ថែមថា ដើម្បីចូលរួមជាមួយរាជរដ្ឋាភិបាលកម្ពុជា ក្នុងការលើកស្ទួយសុខុមាលភាព និងសិទ្ធិកុមារ ក្រុមប្រឹក្សាជាតិកម្ពុជាដើម្បីកុមារ បានដាក់ចេញនូវផែនការយុទ្ធសាស្ត្រអភិវឌ្ឍកិច្ចការពារ និងលើកកម្ពស់សិទ្ធិកុមារ សម្រាប់ឆ្នាំ២០១៩ ដល់ឆ្នាំ២០២៣ ដោយមានគោលដៅបង្កើនប្រសិទ្ធភាព នៃការអនុវត្តសិទ្ធិកុមារនៅកម្ពុជា និងមានគោលបំណងកំណត់អំពីទស្សនវិស័យ បេសកកម្ម គោលដៅយុទ្ធសាស្ត្រ និងលទ្ធផលរំពឹងទុករួមទាំងសកម្មភាពជាយុទ្ធសាស្ត្រ ដើម្បីឲ្យរចនាសម្ព័ន្ធក្រុមប្រឹក្សាជាតិកម្ពុជាដើម្បីកុមារថ្នាក់ជាតិ ថ្នាក់រាជធានីខេត្ត និងអង្គកាពាក់ព័ន្ធចូលរួមអនុវត្តឲ្យទទួលបានជោគជ័យ ពិសេសនៅក្នុងផែនការយុទ្ធសាស្ត្រនេះ មានគោលដៅអាទិភាពចំនួន៥ ដែលក្នុងនោះគោលដៅយុទ្ធសាស្ត្រទី៥ ដែលត្រូវកំណត់ជាផែនការ និងសកម្មភាពជាយុទ្ធសាស្ត្ររបស់ក្រុមប្រឹក្សាជាតិកម្ពុជាដើម្បីកុមាររាជធានី ខេត្ត និងអង្គការដៃគូ ដែលកំពុងប្រតិបត្តិការក្នុងដែនសមត្ថកិច្ចចូលរួមអនុវត្តផងដែរ។
លោក នាក់ ណេរ៉ុន មានប្រសាសន៍បន្ថែមទៀតថា ដើម្បីសម្រេចបាននូវផែនការយុទ្ធសាស្ត្រខាងលើ ជាពិសេសគោលដៅយុទ្ធសាស្ត្រទី៥ លេខាធិការដ្ឋាននៃក្រុមប្រឹក្សាជាតិកម្ពុជាដើម្បីកុមារ រាជធានី ខេត្ត ចាំបាច់ត្រូវរៀបចំសិក្ខាសាលានេះឡើង ដើម្បីផ្សព្វផ្សាយនូវផែនការយុទ្ធសាស្ត្រអភិវឌ្ឍកិច្ចការពារនិងលើកកម្ពស់សិទ្ធិកុមារសម្រាប់ឆ្នាំ២០១៩ ដល់ឆ្នាំ២០២៣ ដល់សមាជិកក្រុមប្រឹក្សាជាតិកម្ពុជាដើម្បីកុមាររាជធានី ខេត្ត និងអង្គការដៃគូពាក់ព័ន្ធ ដើម្បីមានមូលដ្ឋានក្នុងការរៀបចំនូវផែនការសកម្មភាព និងថវិកាប្រចាំឆ្នាំរបស់ខ្លួន ចូលរួមចំណែកដល់កិច្ចការពារ និងលើកកម្ពស់សិទ្ធិកុមារនៅក្នុងរាជធានី ខេត្ត ហើយលទ្ធផលនៃការអនុវត្តទាំងនោះ នឹងត្រូវរាយការណ៍ជូនដល់រាជរដ្ឋាភិបាលកម្ពុជា និងគណៈ កម្មាធិការសិទ្ធិកុមាររបស់អង្គការសហប្រជាជាតិទៀតផង ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
