លោកគ្រូ ០៤រូប បង្រៀននៅក្នុងវិទ្យាល័យសម្ដេចឪ ស្ថិតក្នុងក្រុងសៀមរាប ខេត្តសៀមរាប ដែលមានជីវភាពខ្វះខាត បានទទួល ម៉ូតូម៉ាកហុងដាស៊េរីថ្មីចំនួន ៤គ្រឿង ស្មើនឹងទឹកប្រាក់ ១០,២០០ដុល្លារ ជាអំណោយផ្ទាល់ពីលោកបណ្ឌិត ឈិន តៃឈាង នាយកវិទ្យាល័យសម្ដេចឪ ក្នុងឱកាសបើកបវេសនកាលឆ្នាំសិក្សាថ្មី ២០១៩-២០២០ នៅព្រឹកថ្ងៃទី០១ ខែវិច្ឋិកា ឆ្នាំ២០១៩។
តាមការលើកឡើងរបស់ លោកនាយក ឈិន តៃឈាង បានបង្ហាញថា នៅក្នុងវិទ្យាល័យសម្ដេចឪ មានលោកគ្រូអ្នកគ្រូ មានជីវភាពខ្វះខាត ប្រហែល១៥រូប ក្នុងនោះ លោកគ្រូទាំង០៤រូប មានជីវភាពខ្វះខាតខ្លាំង និងមួយរូបពុំមានគេហដ្ឋានផ្ទាល់ខ្លួន ជាពិសេសមធ្យោបាយធ្វើដំណើរមកបង្រៀនមានសភាពទ្រុឌទ្រោម។ កត្តាទាំងនេះ វាបានប៉ះពាល់ដល់ពេលវេលាសិក្សា និងគុណភាពអប់រំរបស់សិស្សានុសិស្សផ្ទាល់។
លោកនាយក ឈិន តៃឈាង បានបញ្ជាក់ថា ដើម្បីចូលរួមធ្វើលើកកម្ពស់ភាពថ្លៃថ្នូររបស់លោកគ្រូអ្នកគ្រូ ក្នុងអាជីពវិជ្ជាជីវៈ ក៏ដូចជាការលើកទឹកចិត្តដល់លោកគ្រូអ្នកគ្រូ ដែលកំពុងបង្រៀន និងមានជីវភាពខ្វះខាតនៅក្នុងវិទ្យាល័យឪនេះ លោកនាយកបានយកថវិកាផ្ទាល់ខ្លួន ចំនួន១០,២០០ដុល្លា ទិញម៉ូតូស៊េរីថ្មីជូនលោកគ្រូទាំង០៤រូប។ ដោយឡែក ចំពោះលោកគ្រូអ្នកគ្រូ ដែលបានខិតខំបង្រៀនអស់ពីកម្លាំងកាយចិត្ត និងគោរពវិជ្ជាជីវៈបានល្អ គណៈគ្រប់គ្រងសាលា និងបញ្ជូនឈ្មោះទៅកាន់មន្ទីរអប់រំខេត្ត ដើម្បីសុំការអនុញ្ញាតពីក្រសួងអប់រំធ្វើការលើកទឹកចិត្តតាមរូបភាពផ្សេងៗ។
លោកនាយក ឈិន តៃឈាង បានបញ្ជាក់បន្ថែមថា លោកនឹងមានគម្រោងទិញម៉ូតូ ជូនលោកគ្រូអ្នកគ្រូ ដែលមានជីវភាពខ្វះខាតនៅក្នុងវិទ្យាល័យសម្ដេចឪ នៅពេលក្រោយទៀត ដើម្បីជំរុញដល់ការលើកកម្ពស់គុណភាពអប់រំក្នុងវិទ្យាល័យ និងភាពថ្លៃថ្នូរក្នុងអាជីពជាគ្រូបង្រៀន ដែលវិស័យអំប់រំនេះដែរ ជាវិស័យអាទិភាពធំមួយក្នុងចំណោមវិស័យអាទិភាពដទៃទៀត ដែលរាជរដ្ឋាភិបាលកម្ពុជា បាននិងកំពុងយកចិត្តទុកដាក់។
រូបភាព និងអត្ថបទ៖ លោក សេង ផល្លី
