នៅព្រឹកថ្ងៃទី០១ ខែវិច្ឋិកា ឆ្នាំ២០១៩ វិទ្យាល័យសម្ដេចឪ ក្នុងក្រុងសៀមរាប បានរៀបចំពិធីបើកបវេសនកាលឆ្នាំសិក្សាថ្មី ២០១៩-២០២០ ក្រោមអធិបតីភាពលោកស្រី យូ សុភា អភិបាលរងខេត្តសៀមរាប និងមានការចូលរួមពីអាជ្ញាធរមូលដ្ឋាន មន្ត្រីមន្ទីរអប់រំខេត្ត លោកគ្រូអ្នកគ្រូ អាណាព្យាបាលសិស្ស និងសិស្សនុសិស្សជាច្រើនរូប។
តាមរយៈរបាយការណ៍ របស់លោកបណ្ឌិត ឈិន តៃឈាង នាយកវិទ្យាល័យសម្ដេចឪ បានឲ្យដឹងថា វិទ្យាល័យសម្ដេចឪ ផ្ដល់ការសិក្សា២កម្រិត គឺថ្នាក់អនុវិទ្យាល័យ និងវិទ្យាល័យ។ នៅក្នុងឆ្នាំសិក្សា ២០១៨-២០១៩ សិស្ស មានសិស្សចូលរួមប្រឡងមធ្យមសិក្សាទុតិយភូមិ (ថ្នាក់ទី១២) សរុបចំនួន ៣១០នាក់ ក្នុងនោះ២៥៩នាក់បានប្រឡងជាប់ ស្មើនឹង៨៥.៥៥ភាគរយ។ ក្នុងនោះ និទ្ទេសB ចំនួន ៣នាក់ ក្នុងនោះស្រី២នាក់ និទ្ទេសC ចំនួន ១០នាក់ ក្នុងនោះស្រី ៧នាក់។
មានប្រសាសន៍សំណេះសំណាលក្នុងឱកាសនេះ លោកស្រី យូ សុភា បានកោតសរសើរដល់សិស្សស្រី នៅក្នុងវិទ្យាល័យសម្ដេចឪ ដែលបានខិតខំសិក្សាទទួលបានលទ្ធផលយ៉ាងល្អប្រសើរ ទោះបីមិនទទួលបាននិទ្ទេសA ក៏ដោយ។ ដោយឡែកលោកស្រី បានលើកទឹកចិត្តដល់សិស្សប្រុសផងដែរ ត្រូវខិតខំសិក្សា ដើម្បីទទួលបានលទ្ធផលឲ្យមានចំនួនប្រហាក់ប្រហែលនឹងសិស្សស្រី។
លោកស្រី អភិបាលរង បានក្រើនរំលឹកដល់សិស្សានុសិស្សទាំងអស់ខិតខំរៀនសូត្រ ដើម្បីបម្រើប្រទេសជាតិ និងចូលរួមធ្វើកម្ពុជាក្លាយជាប្រទេសមានសុខសន្តិភាព ចៀសវាងការចូលរួមធ្វើសកម្មភាពជាមួយពួកជនទុច្ចរិតដែលបានផ្សព្វផ្សាយព័ត៌មានក្លែងក្លាយ និងមានបំណងចង់ផ្ដួលរំលំរាជរដ្ឋាភិបាលស្របច្បាប់ ដែលទទួលបានពីការបោះឆ្នោតរបស់ប្រជាពលរដ្ឋទូទាំងប្រទេស។
លោកស្រី ក៏បានលើកឧទាហរណ៍ជាក់ស្ដែង អំពីរបបយង់ឃ្នង់ ប្រល័យពូជសាសន៍ប៉ុល ពត ដែលបានធ្វើឲ្យប្រជាជនកម្ពុជាទូទាំងប្រទេសស្គាល់នូវភាពជូរចត់ សោកសង្រេង ព្រាត់ប្រាស់ក្រុមគ្រួសាររហូតដល់បច្ចុប្បន្ន។ ជាក់ស្ដែង ខេត្តសៀមរាប អដ្ឋិធាតុនៅក្នុងវត្តទេពពោធិវង្ស ហៅវត្តក្បាលខ្មោច ជាកន្លែងដែលពួកខ្មែរក្រហមបានយកប្រជាពលរដ្ឋស្លូតត្រង់ទៅសម្លាប់យ៉ាងព្រៃផ្សៃ។
ឆ្លៀតក្នុងឱកាសនោះ លោកស្រី យូ សុភា ក៏បានអានសារអបអរសាទរថ្ងៃបើកបវេសនកាលឆ្នាំសិក្សាថ្មី២០១៩-២០២០ ថ្ងៃទី១ វិច្ឋិកា ដែលជាថ្ងៃកំណត់ ចាប់ផ្ដើមការសិក្សាឆ្នាំថ្មីនៅទូទាំងប្រទេស។
សូមជម្រាបថា នៅឆ្នាំសិក្សាថ្មី ២០១៩-២០២០នេះ វិទ្យាល័យសម្ដេចឪ មានថ្នាក់រៀនចំនួន ៤៣ថ្នាក់ មានសិស្សសរុប ២,៥៩៩នាក់ ក្នុងនោះ ស្រី១,៤៤៦នាក់ ព្រមទាំងគ្រូសរុបចំនួន ១០០នាក់ ក្នុងនោះអ្នកគ្រូ៤៣នាក់។
រូបភាព និងអត្ថបទ៖ លោក សេង ផល្លី
