នាព្រឹកថ្ងៃទី០១ ខែវិច្ឆិកា ឆ្នាំ២០១៩នេះ ឯកឧត្តម ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកស្រីស្នំ ខេត្តសៀមរាប បានអញ្ជើញដឹកនាំដ៏ខ្ពង់ខ្ពស់ ក្នុងវេទិកាសាធារណ: ស្តីពីការគាំទ្រគោលនយោបាយចតុកោណអាណត្តិទី៦ របស់រាជរដ្ឋាភិបាលកម្ពុជា នៅឃុំប្រីយ៍ ស្រុកស្រីស្នំ ។
ក្នងឱកាសនោះមានវត្តមាន ឯកឧត្តម សមាជិក សមាជិកាក្រុមការងារថ្នាក់ជាតិចុះជួយមូលដ្ឋានស្រុកស្រីស្នំ ប្រធាន អនុប្រធានមន្ទីរ អង្គភាពជុំវិញខេត្ត សមាជិក សមាជិកាក្រុមប្រឹក្សាស្រុក អភិបាល អភិបាលរងស្រុក នាយក នាយករងរដ្ឋបាលស្រុក កងកម្លាំងប្រដាប់អាវុធ សហភាពសហព័ន្ធយុវជនកម្ពុជាស្រុក មន្ត្រីរាជការ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋក្នុងស្រុកយ៉ាងច្រើនកុះករ ។
ក្នុងឱកាសនោះដែរ ឯកឧត្តមរដ្ឋលេខាធិការ បានបង្ហាញពីការយកចិត្តទុកដាក់សុខទុក្ខ ក្តីកង្វល់ ការផ្ដល់សេវាគ្រប់ប្រភេទ និងជំរុញដល់អាជ្ញាធរ សមត្ថកិច្ចពាក់ព័ន្ធ ដោះស្រាយបញ្ហាប្រឈម និងសំណូមពរនានា ជូនប្រជាពលរដ្ឋឱ្យបានគ្រប់ជ្រុងជ្រោយ និងប្រកបដោយប្រសិទ្ធភាពខ្ពស់ ដោយមិនមានការរើសអើង ។
ឯកឧត្តម បន្តថា នេះជាគោលនយោបាយរបស់រាជរដ្ឋាភិបាល ដែលដឹកនាំដោយសម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា ។
មុននឹងបញ្ចប់ឯកឧត្តម ក៏បានអំពាវនាវដល់យុវជន យុវតីសិស្សានុសិស្សត្រូវខិតខំរៀនសូត្រ ដើម្បីភាពប្រកួតប្រជែង ហើយឲ្យនៅឆ្ងាយពីគ្រឿងញៀន ភាពទំនើង ត្រូវមានការប្រុងប្រយ័ត្នចំពោះអំពើជួញដូរមនុស្ស និងត្រូវប្រយ័ត្នចំពោះការធ្វើចរាចរណ៍តាមដងផ្លូវជៀសវាងមានការគ្រោះថ្នាក់, ចំណែកបងប្អូនប្រជាពលរដ្ឋ សូមឱ្យមានការចូលរួមថែរក្សាការពារសន្តិសុខសណ្ដាប់ធ្នាប់នៅក្នុងមូលដ្ឋានរបស់ខ្លួនបានល្អប្រសើរ។
រូបភាព ៖ លោក ខេង ឧត្តម
អត្ថបទ៖ លោក លីវ សុខុន
