កិច្ចប្រជុំពិគ្រោះយោបល់លើកទី២ កម្រឹតថ្នាក់ដឹកនាំបច្ចេកទេស នៃប្រទេសបញ្ជូនទាំងបី កម្ពុជា ឡាវ មីយ៉ាន់មា (CLM) ស្តីពីតួនាទីប្រទេសបញ្ជូនដើម្បីពង្រឹងកិច្ចការពារពលករទេសន្តរប្រវេសន៍ គឺដើម្បីសំដៅឆ្ពោះទៅរកវិធីសាស្ត្រកិច្ចការពារពលករទេសន្តរប្រវេសន្តន៍ ឬហៅថាពលករទៅធ្វើការនៅក្រៅប្រទេស ដែលពុំមានទស្សនៈដាក់សម្ពាធទៅលើប្រទេសថៃ ដែលជាភាគីនៃគោលដៅទទួលពលករ ពហុទិសនោះឡើយ។
នេះបើតាមការលើកឡើងរបស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រធាន គណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស មានប្រសាសន៍ក្នុងខេត្តសៀមរាប កាលពីថ្ងៃទី៣០ ខែតុលា ឆ្នាំ២០១៩ នៅក្រុងសៀមរាប។
ថ្លែងក្នុងឱកាសបើកកិច្ចប្រជុំពិគ្រោះយោបល់នេះ សម្តេចក្រឡាហោម ស ខេង បង្ហាញថា ៖ កិច្ចប្រជុំនេះមានសារសំខាន់ ហើយក៏ជាការបំពេញករណីយកិច្ចជាប្រទេសសមាជិកក្នុងតំបន់ និងក្នុងពិភពលោក ក្នុងការពង្រឹងកិច្ចសហការស្វែងរកគន្លឹះដោះស្រាយរួមគ្នា រវាងប្រទេសដែលមានស្ថានភាពប្រហាក់ប្រហែលគ្នា បង្ហាញអំពីឆន្ទៈនយោបាយ និងការប្តេជ្ញាចិត្ត ក្នុងកិច្ចការពារសិទ្ធិ និងផលប្រយោជន៍ពលករពីភាពរងគ្រោះ និងជនរងគ្រោះគ្រប់ភេទ គ្រប់វ័យ ក្នុងអំឡុងពេលទេសន្តរប្រវេសន៍ ជាពិសេស ពីអំពើជួញដូរមនុស្ស និងការកេងប្រវ័ញ្ចគ្រប់រូបភាព ដែលនឹងផ្តល់ផលប្រយោជន៍ប្រកបដោយសមធម៌ សម្រាប់ភាគីទាំងសងខាង គឺនិយោជក និងនិយោជិត និងរវាងប្រទេសបញ្ជូន និងប្រទេសគោលដៅនៃការទទួល ។
ព័ត៌មានជាតិ ថ្មីៗ
សម្តេចក្រឡាហោម បញ្ជាក់ថា ៖ ប្រទេសទាំងបី ( កម្ពុជា ឡាវ មីយ៉ាន់មា ) ជាប្រទេសជិតខាងគ្នា មានព្រំដែនជាប់ជាមួយប្រទេសថៃដូចគ្នា មានប្រជាពលរដ្ឋកំពុងធ្វើការនៅក្នុងប្រទេសថៃដូចគ្នា ទាំងស្របច្បាប់ និងមិនស្របច្បាប់ ក្នុងចំនួនយ៉ាងច្រើន ។ មួយចំនួន បាន និងកំពុងប្រឈមនឹងបញ្ហាជាច្រើន ក្នុងដំណើរការទេសន្តរប្រវេសន៍ តាំងពីការចាកចេញ ទាំងនៅកន្លែងធ្វើការ និងរហូតដល់ពេលត្រឡប់មកវិញ ។
យ៉ាងណាក៏ដោយ សម្តេចក្រឡាហោម ស ខេង បានបញ្ជាក់ច្បាស់ថា ៖ កិច្ចប្រជុំនេះ ពុំមែនជាការចាប់ដៃគ្នារវាងប្រទេសទាំងបី ( កម្ពុជា ឡាវ មីយ៉ាន់មា់ ) ដើម្បីដាក់សម្ពាធទៅលើភាគីថៃនោះទេ ក៏ប៉ុន្តែគឺជាការរួមគ្នា ដើម្បីបង្ហាញទស្សនទានថ្មីៗ ក្នុងន័យការពារពលករដែលចាកចេញពីប្រទេសរបស់ខ្លួន ហើយក៏ជួយការពារចំពោះភាគីថៃដែលជាប្រទេសអ្នកទទួលពលករ ផងដែរ ។ ពលករដែលកំពុងធ្វើការនៅប្រទេសថៃក៏ទទួលបានផលប្រយោជន៍ ហើយភាគីថៃដែលជាប្រទេសគោលដៅទទួលពលករពហុទិស ក៏ទទួលបានផលប្រយោជន៍ ដូចនេះ អ្វីៗទាំងអស់ គឺដើម្បីយល់ទាំងអស់គ្នាថា នេះគឺជាការរួមចំណែកពីគ្នាទៅវិញទៅមក ។
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
