នៅឆ្នាំ២០១៨ ចំនួនអ្នកកើតជំងឺទឹកនោមផ្អែម និងជំងឺលើសឈាម នៅប្រទេសកម្ពុជា មានចំនួន៦៤ភាគរយ មានការកើនឡើងបើធៀបទៅនឹងរយៈពេលដូចគ្នា កាលពីឆ្នាំ២០១៧ ដែលមានចំនួនត្រឹមតែជាង៥០ភាគរយ នេះបើតាមរបាយការណ៍របស់ក្រសួងសុខាភិបាល បានបង្ហាញកាលពីថ្ងៃទី៣១ ខែតុលា ឆ្នាំ២០១៩ ក្នុងកិច្ចប្រជុំប្រចាំឆ្នាំស្ដីពីវឌ្ឍនភាពក្នុងការអនុវត្ដផែនការសកម្មភាពពហុវស័យជាតិ ដើម្បីការពារនិងប្រយុទ្ធជំងឺមិនឆ្លងឆ្នាំ២០១៨និង២០១៩។
ការកើនឡើង នៃការកើតជំងឺទឹកនោមផ្អែម និងជំងឺលើសឈាមនេះ អ្នកជំនាញសុខាភិបាលបង្ហាញថា បណ្ដាលមកពីការទទួលទានអាហារមិនមានភាពប្រក្រតី ដួចជាទទួលទានភេសជ្ជទឹកផ្លែឈើកំប៉ុង រសជាតិប្រៃ ឬផ្អែម ជាតិជូរ ហួសកម្រិត ព្រមទាំងការទទួលបន្លែមានជាតិគីមីខ្ពស់ផងដែរ។
ឯកឧត្ដម អ៊ឹង ភីរុន រដ្ឋលេខាធិការក្រសួងសុខាភិបាល ឲ្យដឹងថា ក្រសួងសុខាភិបាល និងអង្គការសុខភាពពិភពលោក បានរកឃើញថា ជំងឺមិនឆ្លងជាជំងឺមួយ ដែលបានកើតឡើង ទៅលើមនុស្សចាស់ ដែលមានវ័យចាប់ពី៥៥ឆ្នាំឡើងទៅ ដែលក្នុងនោះមានដូចជាជំងឺទឹកនោមផ្អែម ជំងឺលើសឈាម ជំងឺមហារីក និងជំងឺសួតរាំរ៉ៃ ដែលជំងឺទាំងនេះបាន បង្កនូវក្ដីព្រួយបារម្ភជាច្រើន។
ឯកឧត្ដម អ៊ឹង ភីរុន លើកឡើងបន្ថែមថា ការកើតជំងឺសួតក៏កំពុងកើតឡើងដែរ ដែលបណ្ដាលមកពីការជក់បារី និងផ្សែងធូប ផ្សែងធូបមូស នៅក្នុងផ្ទះ ឬនៅទីកន្លែងផ្សេងទៀត។ ឯកឧត្តម បានអំពាវនាវ ឲ្យស្ថាប័នពាក់ព័ន្ធ ដូចជាក្រសួងឧស្សាហកម្ម ក្រសួងទេសចរណ៍ ក្រសួងកសិកម្មផ្សព្វផ្សាយពីផលប៉ះពាល់ បណ្ដាលមកពីជាតិពុលក្នុងបន្លែ ការដាក់ជាតិស្កនៅក្នុងភេសជ្ជៈកំប៉ុង និងផលប៉ះពាល់ពីម្ហូបចៀន ឆា ដោយប្រើប្រេងឆា ឲ្យបានទូលំទូលាយ។ ក្នុងនោះ មនុស្សគ្រប់វ័យគួរធ្វើលំហាត់ប្រាណ ឲ្យបានទៀតទាត់ ដើម្បីសុខភាព និងកាត់បន្ថយហានិភ័យនៃជំងឺទាំងអស់នោះ។
មានមតិក្នុងឱកាសនោះ លោកស្រី ណាហ្គីហ្សា ខតចាអ៊ីវ៉ា (Nargiza Khodjaeva) ប្រធានក្រុមផ្នែកជំងឺមិនឆ្លង នៃអង្គការសុខភាពពិភពលោកប្រចាំប្រទេសកម្ពុជា បានមានប្រសាសន៍ថា បច្ចុប្បន្ននេះ ក្រសួងសុខាភិបាលកម្ពុជា បានផ្ដល់សេវាសុខភាពជាច្រើន ជាពិសេសបានបង្កើតកន្លែងផ្ដល់សេវានៅក្នុងសាលារៀន ក្នុងនោះ ការគ្រប់គ្រងលើជំងឺមិនឆ្លង ការគ្រប់គ្រងទៅលើជំងឺជំងឺរបេង មានការរីកចម្រើនគួរឲ្យកត់សម្គាល់ រីឯការគ្រប់គ្រងថ្នាំជក់ ក៏មានធ្លាក់ចុះផងដែរ។
អត្ថបត្ត និង រូបភាព ៖ លោក បូ សាវី
កែសម្រួលអត្ថបទ ៖ លោក សេង ផល្លី
