ថ្ងៃទី០១ ខែ វិច្ឆិកា ឆ្នាំ២០១៩នេះ គឺជាថ្ងៃបើកបវេសនកាលឆ្នាំសិក្សាថ្មី២០១៩-២០២០ របស់សិស្សានុសិស្ស ទាំងបឋមសិក្សា និង មធ្យមសិក្សា ក្នុងការចូលមកកាន់សាលារៀនជាថ្ងៃដំបូងរបស់ខ្លួន នៅទូទាំងព្រះរាជាណាចក្រកម្ពុជា ។ នៅព្រឹកមិញនេះ នៅវិទ្យាល័យអង្គរ ក្នុងខេត្តសៀមរាប ក៏មានការរៀបចំពិធីបើកបវេសនកាលឆ្នាំសិក្សាថ្មី ២០១៩.២០២០ ដែលបានប្រព្រឹត្តទៅ ក្រោមអធិបតីភាពរបស់លោក ពៅ ពិសិដ្ឋ អភិបាលរងខេត្ត តំណាងដ៏ខ្ពង់ខ្ពស ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ដោយមានការអញ្ជីញចូលរួមពីសំណាក់ ឯកឧត្តម លោកជំទាវ អស់លោក លោកស្រីជាថ្នាក់ដឹកនាំមន្ទីរ លោកគ្រូសាស្ត្រាចារ្យ មាតាបិតា អាណាព្យាបាលសិស្ស ព្រមទាំងសិស្សានុសិស្សផងដែរ ។
ក្នុងកិច្ចស្វាគមន៍របស់លោក លី វណ្ណៈ នាយកវិទ្យាល័យអង្គរ ក៏បានធ្វើសេចក្តីរាយការណ៍អំពីលទ្ធផល និង លើកទិសដៅបន្ត ដោយសម្រាប់ឆ្នាំសិក្សាថ្មី ២០១៩.២០២០នេះ ក្នុងវិទ្យាលួយអង្គរមានសិស្សទាំងអស់ចំនួន ៤៥៧០នាក់ ស្រី ២៥១២នាក់ ក្នុងនោះដែរសាលាមានថ្នាក់រៀនចំនួន ១០៨បន្ទប់ ដោយក្នុងនោះថ្នាក់ទី៧ មាន១៨បន្ទប់ ,ថ្នាក់ទី៨ មាន១៨បន្ទប់ ,ថ្នាក់ទី៩ មាន១៨បន្ទប់,ថ្នាក់ទី១០ មាន១៨បន្ទប់ ថ្នាក់ទី១១ មាន១៨បន្ទប់ និង ថ្នាក់ ទី១២ មាន១៨បន្ទប់ ។ ក្នុងនោះដែរ សម្រាប់ឆ្នាំសិក្សា ២០១៨- ២០១៩ កន្លងមក មានសិស្សបានដាក់ប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ថ្ងៃទី២០ ខែសីហា ឆ្នាំ២០១៩នេះ មានចំនួន ៧៤៣នាក់ ស្រី ៤៤១នាក់ ដោយក្នុងនោះមានសិស្សប្រឡងជាប់ជាស្ថាពរចំនួន ៥៧៦នាក់ ហើយក្នុងនោះដែរក៏មានសិស្សទទួលបាននិទ្ទេសA ចំនួន ៦នាក់ ស្រី ២នាក់ផងដែរ ។
ក្នុងឱកាសនោះដែរ លោក ពៅ ពិសិដ្ឋ ក៏បានអាននូវខ្លឹមសារនៃសាលិខិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា ក្នុងឱកាសបើកបវេសនកាលឆ្នាំសិក្សាថ្មី ២០១៩.២០២០នេះ ជូនដល់ក្មួយៗ ចៅៗសិក្សានុសិស្សនៅទូទាំងប្រទេសរួចមក លោកបានមានប្រសាសន៍សំណេះសំណាលនោះ និងបានសម្តែងនូវការកោតសរសើរចំពោះ បុគ្គលិកអប់រំសិក្សាគ្រប់ជាន់ថ្នាក់ មាតាបិតា អាណាព្យាបាលសិស្ស សប្បុរសជន អាជ្ញាធរមូលដ្ឋាន និង ដៃគូអភិវឌ្ឍន៍នានា ក្នុងការកសាងអភិវឌ្ឍន៍ វិស័យអប់រំប្រកបដោយជោគជ័យ ។
លោក ពៅ ពិសិដ្ឋ ក៏បានធ្វើការសាទរផងដែរ អំពីលទ្ធផលល្អនៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៩.២០២០ ព្រមទាំងទទួលបាននិទ្ទេសល្អផងដែរ ។ ក្នុងនោះដែរលោក ក៏បានលើកឡើងដែរថា វិស័យអប់រំ នៅក្នុងរបបកម្ពុជាប្រជាធិបតេយ្យត្រូវបានធ្លាក់ដល់កម្រិតសូន្យ តែដោយស្មារតីថ្ងៃជ័យជំនះ៧មករា១៩៧៩ វិស័យអប់រំនៅកម្ពុជា ត្រូវបានរាជរដ្ឋាភិបាលយើង ធ្វើការប្រមូលផ្តុំនូវអ្នកមានចំណេះដឹង ដើម្បីធ្វើការបណ្តុះបណ្តាលធនធានមនុស្សលើគ្រប់វិស័យ សំខាន់វិស័យអប់រំ បានមានការរីកចម្រើនរហូតដល់ពេលនេះ ។
លោក អភិបាលរងខេត្ត បានបញ្ជាក់ផងដែរថា លោកគ្រូអ្នកគ្រូ គឺជាគ្រឹះនៃយានចម្លងដ៏សំខាន់ ក្នុងការបណ្តុះបណ្តាលធនធានមនុស្ស នៅក្នុងវិស័យអប់រំ ហើយប្រព័ន្ធអប់រំនៅកម្ពុជា ក៏មិនអន់ជាងបណ្តាប្រទេសនានាឡើយ ក្រោមការកែទម្រងក្នុងវិស័យអប់រំ បានធ្វើឲ្យគុណភាពនៃការអប់រំកាន់តែភាពរីកចម្រើនទ្វេរឡើង ។ ម្យ៉ាងទៀតថ្ងៃនេះគឺជា ឱកាសដ៏ថ្លៃថ្លារបស់ក្មួយៗ ក្នុងការទទួលបាននូវការសិក្សារៀនសូត្រយកនូវចំណេះដឹង និងត្រង់ត្រាប់ស្តាប់ដំបូន្មានរបស់លោកគ្រូអ្នកគ្រូដែលជាអ្នកម្តាយទី២ របស់ខ្លួន និង ត្រូវជៀសចេញឲ្យឆ្ងាយពីគ្រឿងញៀន ល្បែងស៊ីសង ការសែបគប់មិត្តមិនល្អ និង ត្រូវខិតខំរៀនសូត្រ គោរពច្បាប់ចរាចរណ៍ ដើម្បីអប់រំខ្លួនឲ្យក្លាយជាកូនល្អ សិស្សល្អ ពលរដ្ឋល្អក្នុងសង្គមដែលជាសសរស្តម្ភ ដ៏រឹងមាំរបស់ប្រទេសជាតិទៅថ្ងៃអនាគត ។
ក្នុងឱកាសនោះដែរ លោកអភិបាលរងខេត្ត ក៏បានធ្វើការផ្តាំផ្ញើ ដល់លោកគ្រូសាស្ត្រាចារ្យទាំងអស់ ត្រូវយកចិត្តទុកដាក់ខិតខំបង្ហាត់បង្រៀន និងធ្វើជាគំរូល្អដល់សិស្ស ដែលជាធនធានដ៏ស្អាតស្អំក្នុងសង្គម ដោយសាលារៀន គឺជាថ្នាលបណ្តុះបណ្តាលនូវធនធានមនុស្ស ក្នុងការអភិវឌ្ឍន៍ប្រទេស ។ ក្នុងនោះដែរត្រូវរួមគ្នាក្នុងការអនុវត្តយុទ្ធសាស្ត្រដំណាក់កាលទី៣ របស់ប្រមុខរាជរដ្ឋាភិបាល ក្រសួងអប់រំយុវជន និង កីឡា បានធ្វើការពង្រឹង និង កំណែទម្រង់វិស័យអប់រំ ក្នុងការធានានូវគុណភាពអប់រំសិក្សា លើការបណ្តុះបណ្តាលធនធានមនុស្ស ដោយមានការចូលរួមពីគ្រប់ស្ថាប័ន អង្គការ សង្គមស៊ីវិល ជាពិសេសក្នុងពេលប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៩.២០២០ខាងមុខ ត្រូវចូលរួមលុបបំបាត់នូវអំពើពុករលួយក្នុងវិស័យអប់រំផងដែរ ៕
អត្តបទ និង រូបភាព ៖អ៊ុន ណារាជ្យ
