លោក សេង សេរីវុធ តំណាងសណ្ឋាគារ Memoire Palace Resort & Spa ខេត្តសៀមរាប បានឱ្យដឹងថា ពិធីនេះដើម្បីរួមចំណែកគាំទ្ រគោលនយោបាយរបស់រដ្ឋាភិបាលកម្ពុជា ដើម្បីការការពារផលប្រយោជន៍ប្រជាជន ក៏ដូចជាជាតិ សាសនា ព្រះមហាក្សត្រ នៅថ្ងៃទី៩វិច្ឆិកាខាងមុខនេះ សណ្ឋាគារនឹងរៀបចំការទទួលទានអំបុកការពារជាតិ ក្នុងគោលបំណងចង់បង្ហាញពីការចូលរួមរបស់វិស័យឯកជនជាមួយរាជរដ្ឋាភិបាលក្នុងការការពាជាតិ លើកម្ពស់ប្រពៃណី ទំនៀមទម្លាប់របស់ខ្មែរទៅឱ្យភ្ញៀវទេសចរអន្តរជាតិបានឃើញ និងបានឈ្វេងយល់ពីវប្បធម៌របស់ខ្មែរផងដែរ ពិសេស ដើម្បីទទួលស្វាគមន៍អបអរសាទរព្រះរាជពិធីបុណ្យអុំទូក បណ្តែតប្រទីត និង អកអំបុក សំពះព្រះខែ ដែលជាប្រពៃណីទំនៀមទម្លាប់ខែ្មរយើងតាំងពីបុរាណមក ។
លោក សេង សេរីវុធ បានឱ្យដឹងថា ជាមួយនឹងការទទួលទានអំបុកស្រូវថ្មីដោយសេរី និងអាហារប៊ូហ្វេបែបខ្មែរនេះ សណ្ឋាគារ បានសម្រិតសម្រាំងយ៉ាងពិសេស មានការសម្តែងល្ខោនស្បែក -បូករួមទាំងការទស្សនាការដាល់អំបុក ដែលជាទំនៀមទម្លាប់របស់ដូនតាខ្មែរពីបូរុងបូរាណមក និងផ្តល់ឱកាសដល់-ភ្ញៀវជាតិ និងភ្ញៀវអន្តរជាតិ អាចចូលរួមដាល់អំបុកជាមួយក្រុមគ្រួសារ និងមិត្ដភក្ក្របាន យ៉ាងសប្បាយរីករាយ និងការរាំលេងកម្សាន្តជាមួយស្គរដៃបុរាណខ្មែររហូតដល់ចប់កម្មវិធី ។
សូមបញ្ជាក់ថា កាលពីពេលថ្មីៗនេះ សម្តេចតេជោនាយករដ្ឋមន្ត្រី ហ៊ុន សែន បានប្រកាសយកថ្ងៃ០៩វិច្ឆិកា ជាថ្ងៃហូបអំបុករួមគ្នាសម្រាប់ពលរដ្ឋនៅកម្ពុជាទូទាំងប្រទេស ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
