ក្នុងឱកាសជួបសំណេះសំណាលជាមួយក្រុមការងារថ្នាក់ជាតិចុះជួយមូលដ្ឋានស្រុកអង្គរជុំ អាជ្ញាធរស្រុក និង មេឃុំទាំងអស់ក្នុងស្រុកអង្គរជុំ កាលពីព្រឹកថ្ងៃទី០២ ខែវិច្ឆិកា ឆ្នាំ២០១៩ ម្សិលមិញនេះ ឯកឧត្ដម តែ កុយស៊ាង រដ្ឋលេខាធិការក្រសួងសុខាភិបាល និង ជាប្រធានក្រុមការងារថ្នាក់ជាតិចុះជួយមូលដ្ឋានស្រុកអង្គរជុំ បានមានប្រសាសន៍ថា ក្នុងឱកាសអញ្ជើញជាអធិបតីក្នុងពិធីចែកវិញ្ញាបនបត្រ និងសញ្ញាបត្រជូនសិស្សថ្នាក់វិជ្ជាជីវៈគរុកោសល្យ និងនិស្សិតបញ្ចប់ថ្នាក់បរិញ្ញាបត្រ និងបរិញ្ញាបត្រជាន់ខ្ពស់ នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី០២ ខែតុលា ឆ្នាំ២០១៩កន្លងទៅនេះ សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសយកថ្ងៃសៅរ៍ ទី០៩ វិច្ឆិកា ឆ្នាំ២០១៩ ដែលជាថ្ងៃបុណ្យឯករាជ្យជាតិ ហើយបន្តដោយបុណ្យអុំទូក អកអំបុក និងសំពះព្រះខែ គឺជាថ្ងៃកម្ពុជាត្រូវទទួលទានអំបុកនៅទូទាំងប្រទេស “ហូបអំបុកការពារជាតិ , សាសនា , ព្រះមហាក្សត្រ” ហើយសម្តេចតេជោ ហ៊ុន សែន បានអំពាវនាវដល់ថ្នាក់ដឹកនាំ និងសកម្មជនគណបក្សប្រជាជនកម្ពុជា ទូទាំងប្រទេស ត្រូវរៀបចំអំបុកឲ្យបានហូបគ្រប់ៗគ្នា នៅថ្ងៃទី០៩ ដល់ថ្ងៃទី១២ ខែ វិច្ឆិកា ឆ្នាំ ២០១៩ ខាងមុខនេះ ។
ឯកឧត្ដម តែ កុយស៊ាង មានប្រសាសន៍បន្ថែមថា ផ្ដើមចេញពីអនុសាសន៍ដ៏ថ្លៃថ្លានេះ សូមឲ្យអាជ្ញាធរស្រុក និង មេឃុំទាំងអស់ក្នុងស្រុកអង្គរជុំ ត្រូវរៀបចំពិធីទទួលទានអំបុកការពារជាតិឲ្យបានអធិកអធម ទៅតាមទីកន្លែងសមរម្យណាមួយនៅក្នុងឃុំនិមួយៗ រួមទាំងនៅតាមទីវត្តអារាម ហើយជាមួយនឹងការបរិភោគអំបុកការពារជាតិ និង សាមគ្គីឯកភាពជាតិ ត្រូវយកចិត្តទុកដាក់បង្កលក្ខណៈបង្កើតឱកាសសប្បាយរីករាយជូនដល់ប្រជាពលរដ្ឋដែលបានចូលរួម ដូចជាកម្មវិធីរាំច្រៀងកំសាន្តផងដែរ ។
ឯកឧត្ដម តែ កុយស៊ាង មានប្រសាសន៍បន្ថែមទៀតថា ប្រការសំខាន់នោះ គឺត្រូវណែនាំដល់បងប្អូនប្រជាពលរដ្ឋដែលបានចូលរួម សុំឲ្យគាត់កុំពិសាគ្រឿងស្រវឹង ព្រោះថា បញ្ហាគ្រឿងស្រវឹងនេះ អាចនឹងធ្វើឲ្យបាត់បង់នូវសណ្ដាប់ធ្នាប់ និង របៀបរៀបរយរបស់កម្មវិធីផងដែរ ជាពិសេស សូមឲ្យកម្លាំងកម្លាំងមានសមត្ថកិច្ចនៅតាមមូលដ្ឋាននិមួយៗ ត្រូវយកចិត្តទុកដាក់ការពារសុខសុវត្ថិភាពបងប្អូនប្រជាពលរដ្ឋដែលបានចូលរួម និង ត្រូវចាត់វិធានការការពារ និង ទប់ស្កាត់ឲ្យបានទាន់ពេលវេលា និង មានប្រសិទ្ធភាពបំផុត នូវរាល់ជនណា បុគ្គលណា ដែលមកបង្កការអុកឡុក និង រំខានចំពោះការកំសាន្តសប្បាយក្នុងកម្មវិធីនេះទាំងមូល ៕
ព័ត៌មានជាតិ ថ្មីៗ
អត្ថបទ ៖ លោក លីវ សាន្ត
រូបថត ៖ លោក លីវ សាន្ត និង លោក ក្រុស សារ៉ាត់
