ក្រសួងការពារជាតិតួកគី នៅថ្ងៃអាទិត្យ ទី៣ ខែវិច្ឆិកានេះ បាននិយាយថា គ្រាប់បែកក្នុងរថយន្តមួយ បានផ្ទុះនៅភាគខាងជើងប្រទេសស៊ីរី នៅតាមបណ្តោយព្រំដែន ជាមួយប្រទេសតួកគីកាលពីថ្ងៃសៅរ៍ បានសម្លាប់មនុស្ស សរុបទៅដល់១៣នាក់។
ក្រសួងបានបញ្ជាក់ដែរថា ក្រៅពីចំនួនអ្នកស្លាប់គឺមាន មនុស្ស២០នាក់ផ្សេងទៀត បានរងរបួសនៅពេល ដែលគ្រាប់បែកបានផ្ទុះ នៅកណ្តាលតំបន់Tal Abyad ដែលកាលពីខែមុន ត្រូវកាន់កាប់បាន ដោយក្រុមកងកម្លាំងដែលគាំទ្រ ដោយរដ្ឋាភិបាលតួកគី ពីក្រុមអ្នកប្រយុទ្ធដឹកនាំ ដោយក្រុមឧទ្ទាមឃឺដ។
ក្រសួងក៏បានចេញសេចក្តីថ្លែងការណ៍ បន្ទោសទៅលើក្រុមអ្នកប្រយុទ្ធឃឺដ ចំពោះការវាយប្រហារនេះ ដោយនិយាយថា រដ្ឋាភិបាលស៊ីរីនឹងថ្កោលទោសយ៉ាងខ្លាំង ចំពោះហេតុការណ៍នេះ និងបានអំពាវនាវសហគមន៍អន្តរជាតិ ឱ្យប្រកាន់ជំហរប្រឆាំងនឹងអង្គការភេរវកម្ម បែបសាហាវព្រៃផ្សៃមួយនេះ។
ប្រភព៖ដើមអំពិល
ប្រែសម្រួល:ស៊ុនលី
