ការពង្រឹងប្រព័ន្ធផ្សព្វផ្សាយនានា ពិសេសតាមរយៈប្រព័ន្ធឌីជីថល ពិតជាដើរតួនាទីយ៉ាងសំខាន់ក្នុងការចូលរួមផ្សព្វផ្សាយពីសក្តានុពលទេសចរណ៍កម្ពុជា ក៏ដូចជារួមចំណែកជំរុញកំណើន និងការអភិវឌ្ឍវិស័យទេសចរណ៍ ដោយបានចូលរួមអប់រំប្រជាជនឱ្យបានយល់ដឹងអំពីវិស័យទេសចរណ៍ នោះបើតាមប្រសាសន៍ ឯកឧត្ដម ថោង ខុន រដ្ឋមន្ត្រីក្រសួងទេសចរ ក្នុងឱកាសដែលឯកឧត្តមអញ្ជើញជាអធិបតី ក្នុងសិក្ខាសាលាផ្សព្វផ្សាយស្តីពីគេហទំព័រ និងកម្មវិធីទូរស័ព្ទឆ្លាតនៃទេសចរណ៍ក្នុងស្រុក Visit Cambodia និងការអនុវត្តការចុះបញ្ជីស្នាក់នៅទេសចរណ៍អនឡាញ សម្រាប់មូលដ្ឋានអាជីវកម្មទេសចរណ៍ នៅខេត្តសៀមរាបនាថ្ងៃទី០៤ ខែវិច្ឆិកា ឆ្នាំ២០១៩នេះ។
ឯកឧត្ដម មានប្រសាសន៍ទៀតថា សេដ្ឋកិច្ចឌីជីថលបាននិងកំពុងធ្វើឱ្យរបៀបរបបធ្វើការងារមានភាពផ្លាស់ប្តូរជាច្រើន នៅតាមបណ្តាឧស្សាហកម្មនានា ដូចជាសេវាកម្មហិរញ្ញវត្ថុសេវាកម្មសុខភាព សេវាកម្មទេសចរណ៍ សេវាកម្មកម្សាន្ត មធ្យោបាយដឹកជញ្ជូន និងបច្ចេកវិទ្យាព័ត៌មាន និងទំនាក់ទំនងជាដើម។ផ្អែកលើស្មារតីនេះ វិស័យទេសចរណ៍ក៏ត្រូវធ្វើការសិក្សា និងពង្រីកបន្ថែមទីផ្សារទេសចរណ៍ឱ្យកាន់តែទូលាយ តាមរយៈការជំរុញឱ្យមានការបង្កើតផលិតផលទេសចរណ៍ដែលមានគុណភាព និងទាក់ទាញ ពិសេសជំរុញការផ្សព្វផ្សាយទេសចរណ៍តាមរយៈប្រព័ន្ធឌីជីថល ដែលផ្តល់ភាពងាយស្រួលដល់ភ្ញៀវទេសចរ ក្នុងការស្វែងរកព័ត៌មានអំពីគោលដៅទេសចរណ៍នានានៅកម្ពុជាឱ្យកាន់តែប្រសើរ។តាមរយៈប្រព័ន្ធផ្សព្វផ្សាយ ក៏បានចូលរួមអប់រំដល់ប្រជាជនកម្ពុជាឱ្យបានយល់ដឹងអំពីអត្ថប្រយោជន៍ដ៏មានតម្លៃនៃវិស័យទេសចរណ៍ ពោលគឺអត្ថប្រយោជន៍នេះមិនត្រឹមតែបានផ្សព្វផ្សាយទៅដល់ប្រជាជនកម្ពុជាប៉ុណ្ណោះទេ ថែមទាំងបានទៅដល់ភ្ញៀវទេសចរដទៃទៀត តាមរយៈការទទួលបានបទពិសោធន៍ ការទទួលស្វាគមន៍ ពិសេសការប្រាស្រ័យទាក់ទងជាមួយនឹងប្រជាជនមូលដ្ឋានកាន់តែប្រសើរ។
ឯកឧត្ដម ថោង ខុន ក៏បានដាក់ចេញនូវអនុសាសន៍គន្លឹះចំនួន ពាក់ព័ន្ធនឹងគេហទំព័រ និងកម្មវិធីទូរស័ព្ទវៃឆ្លាត «Visit Cambodia» ដោយឯកឧត្ដមបានស្នើឲ្យផ្នែកឯកជនដែលជាប្រតិបត្តិករទេសចរណ៍ចូលរួមផ្តល់ព័ត៌មាន ក៏ដូចជាកម្មវិធីបញ្ចុះតម្លៃពិសេសណាមួយ ក្នុងគោលបំណងពង្រឹង និងពង្រីកសក្តានុពលទេសចរណ៍នៅខេត្តសៀមរាបឱ្យបានល្អប្រសើរ និងបង្កើនកំណើនភ្ញៀវទេសចរទៅកម្សាន្តឱ្យបានកាន់តែច្រើន ក្នុងន័យធ្វើយ៉ាងណាជំរុញការស្វែងរកគោលដៅ និងសេវាកម្មទេសចរណ៍នានាដែលក្នុងខេត្តសៀមរាប សំដៅបំផុសចលនាទេសចរណ៍ទៅកាន់ខេត្តសៀមរាប ដែលជាគោលដៅទេសចរណ៍វប្បធម៌ និងប្រវត្តិសាស្ត្រដ៏ល្អរបស់កម្ពុជា។
ក្នុងឱកាសនោះដែរ លោក ពៅ ពិសិដ្ឋ អភិបាលរងខេត្ដសៀមរាប បានថ្លែងថា រដ្ឋបាលខេត្តបាននិងកំពុងជម្រុញ និងយកចិត្តទុកដាក់លើការកែលំអរសោភណ្ឌភាពក្រុង ឱ្យបានកាន់តែល្អប្រសើរ តាមរយៈការកសាងហេដ្ឋារចនាសម្ព័ន្ធ ផ្លូវ ថ្នល់ ស្ពាន ការផ្គត់ផ្គង់អគ្គីសនី ប្រព័ន្ធទឹកស្អាត ប្រព័ន្ធបំភ្លឺសាធារណៈ ការងារពង្រឹសន្តិសុខ សុវត្តិភាពភ្ញៀវទេសចរ សណ្តាប់ធ្នាប់សាធារណៈ ស្របតាមយុទ្ធនាការចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋាកិច្ចល្អ» ពិសេសផ្តោតសំខាន់ ទៅលើយុទ្ធសាស្ត្ររបស់ក្រសួងទេសចរណ៍ ជម្រុញការបង្កើតឱ្យមាននូវ ផលិតផលថ្មី ប្រកបដោយការច្នៃប្រឌិត ស្របតាមនិន្នាការ នៃការអភិវឌ្ឍវិស័យទេសចរណ៍នាពេលបច្ចុប្បន្ន និងទៅថ្ងៃអនាគត ។
លោក ពៅ ពិសិដ្ឋ បន្តថា ក្នុងនោះដែរអាជ្ញាធរខេត្ត ការបានកំណត់នូវគោលដៅជាយុទ្ធសាស្ត្រសម្រាប់់ការជម្រុញ ពង្រឹងការគ្រប់គ្រង និងអភិវឌ្ឍន៍គោលដៅទេសចរណ៍សៀមរាប-អង្គរ ដោយគិតគូរទៅលើការពង្រឹងគុណភាពសេវាទេសចរណ៍ បង្កើនប្រសិទ្ធភាពការងារសំដៅធ្វើយ៉ាងណាឱ្យគ្រប់ផលិតផលទេសចរណ៍ និងសេវាកម្មទេស-ចរណ៍ឱ្យមានគុណភាពស្របតាមទស្សនទា សេវាមួយ ស្តង់ដាមួយ និងការអភិវឌ្ឍន៍ធនធានមនុស្ស បម្រើឱ្យវិស័យទេសចរណ៍ បុគ្គលម្នាក់ជំនាញមួយ ។ ហើយក្នុងនោះ រដ្ឋបាលខេត្ត ក៏បានពង្រឹង និងយកចិត្តទុកដាក់ដល់ការគ្រប់គ្រងរមណីយដ្ឋានទេសចរណ៍ សហគមន៍ទេសចរណ៍ ឱ្យមានការប្រែប្រួល និងអភិវឌ្ឍន៍បានកាន់តែល្អប្រសើរឡើង៕
អត្ថបទ និង រូបភាព ៖ បូ សាវី
កែសម្រួល ៖អ៊ុន ណារាជ្យ
