នៅព្រឹកថ្ងៃទី០៤ ខែវិច្ឆិកា ឆ្នាំ២០១៩នេះ ក្រសួងកសិកម្ម រុក្ខាប្រមាញ៉ និងនេសាទ បានបើកសិក្ខាសាលាពិគ្រោះយោបល់ ស្ដីពីសេចក្តីព្រាងគោលនយោបាយធនធានមនុស្ស ដោយមានការអញ្ជើញចូលរួមក្រោមអធិបតីយភាព ឯកឧត្តម នុត ច័ន្ទសុខា រដ្ឋលេខាធិការប្រចាំការ ក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីសំណាក់ ប្រធាន អនុប្រធាន មន្ត្រីតំណាងឲ្យមន្ទីរកសិកម្ម រុក្ខាប្រមាញ់ និងនេសាទទាំង២៥ រាជធានី-ខេត្ត ទូទាំងប្រទេស អង្គភាពថ្នាក់កណ្តាល និងមន្ត្រីតំណាងមកពីក្រសួងពាក់ព័ន្ធមួយចំនួនទៀត ។
តាមការឲ្យដឹងពី លោក ទី ចាន់ណា ប្រធាននាយកដ្ឋានបុគ្គលិក និងអភិវឌ្ឍធនធានមនុស្សនៃក្រសួងកសិកម្ម បានបញ្ជាក់ថា គោលនយោបាយធនធានមនុស្សរបស់ក្រសួងកសិកម្ម រុក្ខាប្រមាញ់ និងនេសាទ បានសហការរៀបចំបង្កើតឡើងដំបូងដោយសហភាពអ៊ឺរ៉ុបនៅក្នុងអំឡុងឆ្នាំ២០១៥ ហើយបានដាក់ឆ្លងក្នុងអង្គសិក្ខាសាលាថ្នាក់ជាតិ និងថ្នាក់រាជធានី-ខេត្ត ជាបន្តបន្ទាប់ ។
លោកបន្តថា អង្គសិក្ខាសាលាសម្រាប់ថ្ងៃនេះ គឺជាសិក្ខាសាលាពិគ្រោះយោបល់លើកចុងក្រោយហើយ ស្តីពីគោលនយោបាយធនធានមនុស្សរបស់ក្រសួងកសិកម្ម ហើយក្រសួងក៏រំពឹងទុកថា ការងារនេះនឹងត្រូវបានធានា នូវសមិទ្ធកម្មការងារ នៅក្នុងវិស័យកសិកម្មប្រកបដោយប្រសិទ្ធភាព ។
មានប្រសាសន៍ក្នុងឱកាសនេះដែរ ឯកឧត្តម នុត ច័ន្ទសុខា បានវាយតម្លៃថា ឆ្លងកាត់តាមកិច្ចប្រជុំរបស់ក្រុមការងារ និងអង្គសិក្ខាសាលាពិគ្រោះយោបល់ជាច្រើនលើកកន្លងមក ឯកសារសេចក្តីព្រាងគោលនយោបាយធនធានមនុស្សនេះ នឹងមានលក្ខណៈគ្រប់ជ្រុងជ្រោយ នឹងត្រូវបានប្រើប្រាស់គ្រប់កាលៈទេសៈ និងជាផែនទីបង្ហាញផ្លូវសម្រាប់ក្រសួង ក្នុងការគ្រប់គ្រង អភិវឌ្ឍធនធានមនុស្សប្រកបដោយប្រសិទ្ធភាព និងប្រសិទ្ធផលព្រមទាំងធានាឲ្យមានសង្គតិភាព ឆ្លើយតបទៅនឹងគោលបំណងទី២ នៃកម្មវិធីកំណែទម្រង់រដ្ឋបាលសាធារណៈរបស់រាជរដ្ឋាភិបាល គឺការគ្រប់គ្រង និងការអភិវឌ្ឍមន្ត្រីរាជការស៊ីវិលឲ្យកាន់តែមានសមត្ថភាព ប្រសិទ្ធភាព និងភាពជឿទុកចិត្ត ដោយប្រកាន់ខ្ជាប់នូវវប្បធម៌សេវាសាធារណៈ ឆន្ទៈ ម្ចាស់ការ ភក្តីភាព និងមានមនសិការវិជ្ជាជីវៈ ដែលនាំទៅដល់ការបម្រើប្រជាពលរដ្ឋ កាន់តែប្រសើរឡើង ។
ឯកឧត្តម មានប្រសាសន៍បន្តថា ការអនុវត្តគោលនយោបាយធនធានមនុស្ស គឺជាការចូលរួមគាំទ្រដល់ផែនការមេ សម្រាប់អភិវឌ្ឍវិស័យកសិកម្មឆ្ពោះទៅឆ្នាំ២០៣០ និងផែនការយុទ្ធសាស្ត្រអភិវឌ្ឍរយៈពេល៥ឆ្នាំ វិស័យកសិកម្ម ( ២០១៩-២០២៣ ) ក្នុងនោះគឺការធ្វើឲ្យមានវឌ្ឍនភាព និងដោះស្រាយបញ្ហាប្រឈមនានានៅក្នុងវិស័យកសិកម្ម ព្រមជាមួយនឹងការឆ្លើយតបផងដែរ ទៅនឹងចក្ខុវិស័យរបស់រាជរដ្ឋាភិបាល ក្នុងការឈានទៅសម្រេចបាន នូវឋានៈជាប្រទេសមានចំណូលមធ្យម កម្រឹតខ្ពស់ក្នុងឆ្នាំ២០៣០ និងជាប្រទេសមានចំណូលខ្ពស់នៅក្នុងឆ្នាំ២០៥០ ខាងមុខ ៕
អត្ថបទ និង រូបភាព ៖ ងិន គឹមឡេង
កែសម្រួល ៖អ៊ុន ណារាជ្យ
