កាលពីពេលកន្លងទៅថ្មីៗនេះ សំណង់ខុសច្បាប់ចំនួន២កន្លែង ដែលបានសាងសង់រំលោភបំពានទៅលើទីទួលបុរាណពីរកន្លែង ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុង/ខេត្តសៀមរាប ត្រូវបានក្រុមការងារចម្រុះនៃរដ្ឋបាលខេត្តសៀមរាប ដោយមានការសហការ ពីសំណាក់អាជ្ញាធរជាតិអប្សរា អាជ្ញាធរក្រុង និងកងរាជអាវុធហត្ថខេត្ត បានចុះប្រតិបត្តិការរុះរើសម្រចជាស្ថាពរ ។
បើតាមការឲ្យដឹងពី លោក នួន ពុទ្ធារ៉ា អភិបាលក្រុងសៀមរាប បានបញ្ជាក់ថា សំណង់ដែលបានរុះរើខាងលើ ជាប្រភេទសំណង់របងបេតុងធ្វើរំលោភបំពានលើខ្នងទំនប់ត្រពាំងហែផ្កាខាងត្បូង មានកម្ពស់២,៥០ម៉ែត្រ បណ្តោយ៨៧ម៉ែត្រ និងមួយកន្លែងទៀតជាសំណង់របងធ្វើរំលោភព័ទ្ធជុំវិញទួលបុរាណ គោកគូ ស្ថិតនៅក្នុងតំបន់ការពារត្រពាំងហែផ្កា មានកម្ពស់២,៥០ម៉ែត្រ មានទំហំប្រហែល៣០គុណ៤០ម៉ែត្រ។
លោក នួន ពុទ្ធារ៉ា បន្តថា មុននឹងក្រុមការងារចាប់ផ្ដើមយុទ្ធនាការរុះរើនេះ កាលពីពេលកន្លងមកក្រុមការងារធ្លាប់បានជួបពិភាក្សា និងជូនដំណឹងដល់ម្ចាស់សំណង់ខាងលើចំនួន២ដងរួចមកហើយ ហើយសាមីខ្លួនទាំងពីរក៏យល់ព្រមចុះកិច្ចសន្យារុះរើដោយខ្លួនឯងតាមការកំណត់ តែផ្ទុយទៅវិញ ម្ចាស់សំណង់ទាំងពីរមិនបានអនុវត្តទៅតាមការសន្យានោះឡើយ ទើបឈានដល់ការរុះរើដោយផ្ទាល់ពីក្រុមការងារចម្រុះបែបនេះ ។
ក្នុងឱកាសនោះដែរ លោក ឡុង កុសល អ្នកនាំពាក្យអង្គភាពអាជ្ញាធរអប្សរា បានបញ្ជាក់ថា កន្លងមកក្រុមការងារចម្រុះបានផ្អាក់សកម្មភាពចុះរុះរើសំណង់ខុសច្បាប់មួយរយៈហើយ ដោយក្នុងនោះម្ចាស់សំណង់ដែលមិនទាន់រុះរើសុំពន្យាពេលប៉ុន្តែពយកគាត់នៅតែបន្តសាងសងដដែល ទើបក្រុមការងារក៏សម្រេចដាក់គ្រឿងចក្រចុះអនុវត្តន៍រុះរើភ្លាមៗតែម្ដង ។
ក្នុងនោះដែរ លោក ឡុង កុសល ក៏បានធ្វើការផ្ដាផ្ញើដល់បងប្អូនប្រជាពលរដ្ឋទាំងនៅក្នុងខេត្តសៀមរាប ដែលបានសាងសង់ផ្សេងឺដែលបំពានមកលើដីរដ្ឋ សូមមេត្តារុះរើជាបន្ទាន់ និងសុំឲ្យប្រជាពលរដ្ឋត្រូវបញ្ឈប់ជាបន្ទាន់រាល់កម្មភាពផ្សេងៗដែលប៉ះពាល់ដល់ទីតាំងដែលជាទីតាំងរបស់រដ្ឋ ហើយបើជនណាដែលមិនគោរព និងអនុវត្តន៍តាមការផ្សព្វផ្សាយនេះទេ ក្រុមការងារចម្រុះរបស់រដ្ឋបាលខេត្ត និងធ្វើការអនុវត្តន៍ទៅតាមផ្លូវច្បាប់ ៕
អត្ថបទ និង រូបភាព ៖ ខេង ឧត្តម
កែសម្រួល ៖អ៊ុន ណារាជ្យ
