កាលពីថ្ងៃទី០៤ ខែវិចិ្ឆកា ឆ្នាំ២០១៩ នៅទីស្នាក់ការអាជ្ញាធរជាតិអប្សរា ឯកឧត្តម ហង់ ពៅ អគ្គនាយកអាជ្ញាធរជាតិអប្សរា ទទួលជួបពិភាក្សាការងារជាមួយគណៈប្រតិភូសារមន្ទីរPalace Museumនៃសាធារណរដ្ឋប្រជាមានិតចិន ដឹងនាំដោយលោកស្រី Ren Wanping អនុប្រធានសារមន្ទីរ Palace Museum ក្នុងគោលបំណងផ្លាស់ប្តូរយោបល់ និងបទពិសោធន៍ការងារមួយចំនួនជាមួយអាជ្ញាធរជាតិអប្សរា ដែលពាក់ព័ន្ធនឹងការគ្រប់គ្រង់រមណីយដ្ឋានអង្គរ និងការគ្រប់គ្រងសារមន្ទីរនៅក្នុងតំបន់អង្គរ ព្រមទាំងការអភិរក្សវត្ថុសិល្បៈបុរាណ។
ឯកឧត្តម ហង់ ពៅ មានប្រសាសន៍ថា សារមន្ទីរដែលស្ថិតនៅក្នុងការគ្រប់គ្រងរបស់អាជ្ញាធរជាតិអប្សរាមានបី គឺសារមន្ទីរព្រះនរោត្តមសីហនុ-អង្គរ សារមន្ទីរវាយនភណ្ឌប្រពៃណីអាស៊ី និងសារមន្ទីរកុលាលភាជន៍ឡតានី។
ឯកឧត្តមបញ្ជាក់ថា សារមន្ទីរទាំងបីនេះ មិនបានបង្កើតដើម្បីប្រាក់ចំណូលច្រើននោះទេ ក៏ប៉ុន្តែគោលការណ៍របស់អាជ្ញាធរជាតិអប្សរា បង្កើតឡើងដើម្បីថែរក្សា លើកតម្លៃបេតិកភណ្ឌវប្បធម៌ជាតិ និងឱ្យភ្ញៀវទេសចរសិក្សាស្វែងយល់ពីអារ្យធម៌ ទំនៀមទម្លាប់ និងអត្តសញ្ញាណជាតិខ្មែរឱ្យកាន់តែច្បាស់។ ជាពិសេសទៅទៀត អាចឱ្យភ្ញៀវទេសចរ អ្នកសិក្សាស្រាវជ្រាវទទួលបានចំណេះដឹងបន្ថែមទៀត ក្រៅពីទៅទស្សនាប្រាសាទឬកន្លែងណាផ្សេងទៀត ហើយអាជ្ញាធរជាតិអប្សរាបើកជាប្រចាំឱ្យសិស្សានុសិស្សទៅសិក្សានៅកន្លែងបានផងដែរ។
ក្នុងនោះដែរ លោកស្រី Ren Wanping ក៏បានលើកឡើងដែរថា សារមន្ទីរ Palace Museum គឺជាអតីតរាជវាំងចិនបុរាណដែលជាចំណុចដ៏ទាក់ទាញភ្ញៀវទេសចរមានការចាប់អារម្មណ៍យ៉ាងខ្លាំង ដែលសុទ្ធតែបង្ហាញអំពីស្នាដៃដ៏អស្ចារ្យនៃបុព្វបុរស ។ ហើយចំពោះការបំពេញទស្សនកិច្ចនៅខេត្តសៀមរាបនាពេលនេះដែរ គណៈប្រតិភូបានទស្សនាសារមន្ទីរ ដើម្បីស្វែងយល់ពីវប្បធម៌កម្ពុជា ក៏ដូចជា ទទួលបាននូវបទពិសោធន៍ថ្មីៗពីការគ្រប់គ្រងសារមន្ទីរជាតិអង្គរផងដែរ។
លោកស្រី បន្ថែមទៀតថា ភ្ញៀវទេសចរដែលមកទស្សនាកម្ពុជា គឺមកទស្សនាប្រាង្គប្រាសាទនៅអង្គរតែម្តង ព្រោះភ្ញៀវទេសចរចិនបានឈរនៅលំដាប់ទី១ក្នុងចំណោមភ្ញៀវទេសចរជាច្រើនលាននាក់ដែលមកទស្សនាប្រទេសកម្ពុជា៕
អត្ថបទ និង រូបភាព ៖ អ៊ិន សីហរិទ្ធ
កែសម្រួល៖ អ៊ុន ណារាជ្យ
