ដើម្បីងាយស្រួលក្នុងការអភិរក្សប្រាសាទ និងការបញ្ជៀសហានិភ័យផ្សេងៗដល់ប្រាង្គប្រាសាទ និងមនុស្ស កាលពីពេលថ្មីៗនេះ ក្រុមការងារចម្រុះនៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន បានចុះកាត់ដកហូតដើមឈើចំនួន៣ដើមដែលមានហានិភ័យខ្ពស់ចំនួន៣ដើមស្ថិតនៅបរិវេណខាងក្នុងនៃប្រាសាទព្រះខ័ន្ត ។
លោក ហៃ ហូត មន្ត្រីបច្ចេកទេសចរណ៍នៃនាយកដ្ឋានព្រៃឈើរបស់អាជ្ញាធរជាតិអប្សរា បានឱ្យដឹងថា ដើមឈើដែលក្រុមការងារបានកាត់ គឺជាប្រភេទដើមស្រឡៅ ហើយដើមស្រឡៅទាំងនេះមានកម្ពស់ខ្ពស់ នៅគៀកប្រាសាទ និងមានសភាពទ្រេតខ្លាំង ហើយដីមានសភាពជ្រាយ អាចងាយរលំពេលមានខ្យល់ខ្លាំងម្ដងៗ ។
លោក ហៃ ហូត បានបញ្ជាក់បន្ថែមទៀតថា ការកាត់ដកហូតដើមឈើទាំង៣ដើមនេះ គឺដើម្បីបង្ការគ្រោះថ្នាក់ផ្សេងៗជាយថាហេតុទាំងប្រាង្គប្រាសាទ និងមនុស្ស ទើបក្រុមការងារបានសុំគោលការណ៍ធ្វើការកាត់ដកហូតនេះតែម្ដង ។ ហើយការកាត់ដើមឈើទាំងនេះគឺក្រុមការងារបានចំណាយពេលជាង២ខែហើយ ដោយត្រូវប្រើបច្ចេកទេសឲ្យបានត្រឹមត្រូវ រួមទាំងការតម្លើងរន្ទាឡើងកាត់ផង ៕
ព័ត៌មានជាតិ ថ្មីៗ
អត្ថបទ និង រូបភាព ៖ បូ សាវី
កែសម្រួល៖ អ៊ុន ណារាជ្យ
