ព្រះគ្រូវិចិត្រវង្សាញាតិធម្មោ ហែមគឹមសាន ព្រះគ្រូចៅអធិការវត្តប្រាសាទគោកចក ក្នុងក្រុងសៀមរាប មានថេរៈដិការថា អង្គកឋិនសាមគ្គីរបស់ប្រជាពុទ្ឋបរិស័ទមកពីខេត្តស៊ីសាកេតប្រទេសថៃ , ប្រទេសបារាំង និងសហរដ្ឋអាមេរិក រួមទាំងប្រជាពុទ្ឋបរិស័ទក្នុងខេត្តផង កាលពីពេលថ្មីៗនេះ ពញរះតេជគុណ ទទួលបច្ច័យបានចំនួន៤១.៥១៤.០០០រៀល , ប្រាក់ដុល្លារចំនួន ១២.៨៥៩ដុល្លារអាមេរិក និង ប្រាក់បាតចំនួន ៥៣.៤៧០បាត ហើយបច្ច័យដែលទទួលបានពីអង្គកឋិនទានឆ្នាំនេះ ក្រៅពីការលៃលកសម្រាប់ចតិបច្ច័យ និងសម្រាប់ចង្ហាន់ប្រចាំថ្ងៃរបស់ព្រះភិក្ខុសង្ឃក្នុងវត្ត ថវិកាមួយចំនួនធំ ត្រូវបែងចែកយកទៅកសាងបន្តនូវសាលាធម្មសភា ឬសាលាឆាន់ មួយខ្នង មានទំហំ ៣០ម៉ែត្រគុណ៤០ម៉ែត្រ ដែលនៅមិនទាន់រួចរាល់នៅឡើយ។
ព្រះគ្រូវិចិត្រវង្សាញាតិធម្មោ ហែម គឹមសាន មានថេរៈដិការបន្ថែមថា ជាធម្មតា ព្រះសង្ឃពឹងលើទាន និងបច្ច័យពីប្រជាពុទ្ឋបរិស័ទ ទីវត្តអារាមដែលមានការរីកចំរើនទៅបាន គឺមិនអាចខ្វះបានពីការចូលរួមរបស់ប្រជាពុទ្ឋបរិស័ទជិតឆ្ងាយដែលមានសទ្ឋាជឿជាក់លើព្រះពុទ្ឋសាសនា ហើយភាពរីកធំធាត់របស់ទីអារាម ក៏ជាកត្តាឆ្លុះបង្ហាញឲ្យឃើញអំពីជីវភាពប្រសើរឡើងនៃប្រជាពុទ្ធបរិស័ទនៅក្នុងតំបន់ចំណុះជើងវត្តនោះផងដែរ គួបផ្សំជាមួយនឹងទេព្យកោសល្យដឹកនាំនិង ការផ្តល់ជំនឿទុកចិត្តពីសំណាក់ព្រះសង្ឃ ក្រោមគោលការណ៍ជាមូលដ្ឋាន ព្រះពុទ្ធសាសនា ផ្សារភ្ជាប់សង្គម ទើបអាចអភិវឌ្ឍន៍ និងកសាងទីអារាមបានសមរម្យ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
