យោងតាមការអះអាង និងផ្សព្វផ្សាយរួមគ្នា រវាងសមាគមទីភ្នាក់ងារទេសចរណ៍កម្ពុជា ដែលហៅកាត់ថា CATA , ក្លឹបសមាគមប្រតិបត្តិករទេសចរណ៍សៀមរាប ដែលហៅកាត់ថា STC និងមន្ទីរទេសចរណ៍ខេត្តសៀមរាប ក្នុងនាមអាជ្ញាធរខេត្តសៀមរាប នារសៀលថ្ងៃទី០៥ ខែវិច្ឆិកា ឆ្នាំ២០១៩ បានរួមគ្នាបង្ហាញអំពីវិធីសាស្ត្រ និងការអំពាវនាវ ដើម្បីបញ្ចុះតម្លៃសេវាធ្វើដំណើរតាមជើងហោះហើរ ម្ហូបអាហារ និងសេវាស្នាក់នៅ ក្នុងឱកាសប្រារព្ធពិធីថ្ងៃពិសាអុំបុកសាមគ្គីថែសន្តិភាព ការពារជាតិ សាសនា ព្រះមហាក្សត្រ និង ព្រះរាជពិធីបុណ្យអុំទូក អកអំបុក បណ្តែតប្រទីប សំពះព្រះខែ ដែលប្រារព្ធឡើងខេត្តសៀមរាប ចាប់ពីថ្ងៃទី០៩ ដល់ថ្ងៃទី១២ ខែវិច្ឆិកា ឆ្នាំ២០១៩ ខាងមុខនេះ ។
ការតម្លើងថ្លៃបន្ទប់ស្នាក់នៅរបស់សណ្ឋាគារ ផ្ទះសំណាក់ និងការតម្លើងថ្លៃសេវាកម្មផ្សេងៗមួយចំនួនទៀត នៅក្នុងឱកាសបុណ្យប្រពៃណីជាតិផ្សេងៗ ដែលភ្ញៀវទេសចរមិនពេញចិត្តហើយនិយាយថា ជាទម្លាប់ដ៏អាក្រក់មិនអាចកែប្រែបាននោះ វានឹងត្រូវលាងសម្អាត ឬក៏អាចនិយាយបានថា ដែលវាជាជម្ងឺដ៏រ៉ាំរ៉ៃ បំផ្លាញវិស័យទេសចរណ៍នោះ នឹងត្រូវព្យាបាលឡើងវិញ តាមរយៈនៃការចូលរួមដោយស្ម័គ្រចិត្តរបស់វិស័យឯកជន ជាមួយនឹងវិធីសាស្ត្រថ្មីៗ សម្រាប់ ។
បើយោងតាមការផ្សព្វផ្សាយនោះ ឆ្នាំនេះ ខេត្តសៀមរាបមានគម្រោងកម្មវិធីកំសាន្តជាច្រើន ហើយជាពិសេសនោះតាមបណ្តាសណ្ឋាគារមួយចំនួន ក៏មានបង្កើតកម្មវិធីដើម្បីបង្ករបរិយាកាសសប្បាយរីករាយសម្រាប់ភ្ញៀវកំសាន្ត និងស្វែងយល់អំពីវប្បធម៌ ប្រពៃណី ទំនៀមទម្លាប់ខ្មែរផងដែរ ។
គេសង្កេតឃើញថា ជារៀងរាល់ឆ្នាំ បើទោះបីជាមានការអំពាវនាវពីសំណាក់អាជ្ញាធរយ៉ាងណាក៏ដោយ ក៏ស្ថានភាពនៃការតម្លើងថ្លៃសេវានានា នៅក្នុងឱកាសបុណ្យប្រពៃណីជាតិ មិនអាចទប់ស្កាត់បាននោះឡើយ ជាពិសេស សេវាធ្វើដំណើរ ម្ហូបអាហារ និងសេវាស្នាក់នៅ ក៏ប៉ុន្តែសម្រាប់ព្រះរាជពិធីបុណ្យអុំទុកឆ្នាំនេះ វិស័យឯកជនដែលប្រតិបត្តិការនៅក្នុងវិស័យទេសចរណ៍ដោយផ្ទាល់ បានផ្តើមគំនិត រួមដៃគ្នាដើម្បីវិស័យទេសចរណ៍ ៕
សមាគមទីភ្នាក់ងារទេសចរណ៍នៅខេត្តសៀមរាប អំពាវនាវរួមគ្នា សូមឲ្យបញ្ចុះតម្លៃ
សមាគមទីភ្នាក់ងារទេសចរណ៍នៅខេត្តសៀមរាប អំពាវនាវរួមគ្នា សូមឲ្យបញ្ចុះតម្លៃសេវាស្នាក់នៅ ម្ហូបអាហារ ក្នុងឱកាសព្រះរាជពិធីបុណ្យអុំទូកខាងមុខនេះ#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Wednesday, November 6, 2019
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
