នៅព្រឹកថ្ងៃទី០៦ ខែវិច្ឆិកា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា អញ្ជើញជាអធិបតីដ៏ខ្ពង់ខ្ពស់ក្នុងពិធីបើកសន្និសីទអគ្គព្រះរាជអាជ្ញាអាស៊ានចិនលើកទី១២ ក្រោមប្រធានបទ តួនាទីព្រះរាជអាជ្ញាក្នុងការប្រយុទ្ធប្រឆាំងអំពើជួញដូរមនុស្សនៅក្នុងតំបន់ ដែលរៀបចំឡើងនៅខេត្តសៀមរាប ខណៈដែលអគ្គព្រះរាជអាជ្ញា នៃព្រះរាជាណាចក្រកម្ពុជា បានធ្វើជាម្ចាស់ផ្ទះរៀបចំសន្និសីទអគ្គព្រះរាជអាជ្ញាអាស៊ាន-ចិន លើកទី១២ ក្នុងរយៈពេលពីរថ្ងៃ គឺថ្ងៃទី០៦ដល់ថ្ងៃទី០៧ខែវិច្ឆិកាឆ្នាំ២០១៩ នៅខេត្តសៀមរាប ដោយមានការចូលរួមពីសំណាក់ឯកឧត្តម លោកជំទាវ លោក លោកស្រី ជាតំណាងព្រឹទ្ឋសភា តំណាងរដ្ឋសភា និងអមដោយឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រីនៃរាជរដ្ឋាភិបាលកម្ពុជាជាច្រើនរូបទៀត ប្រធានក្រុមប្រឹក្សាខេត្តសៀមរាប អភិបាលខេត្តសៀមរាប អគ្គព្រះរាជអាជ្ញា អគ្គរដ្ឋអាជ្ញា ឬប្រធានប្រតិភូ មកពីបណ្តាប្រទេសនៃសមាគមអាស៊ាន និងប្រទេសចិន ។
មានប្រសាសន៍ក្នុងឱកាសនោះ សម្តេចតេជោ ហ៊ុន សែន បានថ្លែងនូវអំណរគុណចំពោះឯកឧត្តម លោកជំទាវអគ្គព្រះរាជអាជ្ញា អគ្គរដ្ឋអាជ្ញា នៃបណ្តាប្រទេសសមាគមអាស៊ាន និងសាធារណរដ្ឋប្រជាមានិតចិន និងភ្ញៀវកិត្តិយសជាតិ អន្តរជាតិទាំងអស់ ដែលកំពុងមានវត្តមាននៅលើទឹកដីខេត្តសៀមរាបអង្គរនេះ ហើយកម្ពុជាពិតជាមានកិត្តិយសដែលបានធ្វើជាម្ចាស់ផ្ទះរៀបចំសន្និសីទដ៏មានសារៈសំខាន់នេះ ស្របពេលដែលប្រទេសសមាជិកអាស៊ាន ក៏ដូចជាប្រទេសនៅក្នុងតំបន់កំពុងរួមគ្នាប្រយុទ្ធប្រឆាំងអំពើជួញដូរមនុស្ស ដែលជាឧក្រិដ្ឋកម្មឆ្លងដែនប្រកបដោយគ្រោះថ្នាក់ ហើយកំពុងរីករាលដាលនៅក្នុងតំបន់របស់យើង ។
សម្តេចតេជោបានមានប្រសាសន៍បន្ថែមថា អំពើជួញដូរមនុស្ស គឺជាគោលនយោបាយដ៏សំខាន់ដែលរាជរដ្ឋាភិបាលបានផ្តោតការយកចិត្តទុកដាក់ខ្ពស់ និងបានអនុវត្តកន្លងមក តាមរយៈការផ្សព្វផ្សាយគ្រប់ទម្រង់នៃ «អំពើជួញដូរមនុស្ស » តាំងពីថ្នាក់ជាតិរហូត ដល់ថ្នាក់មូលដ្ឋាន ដែលជាក់ស្តែងរាជរដ្ឋាភិបាល បានប្រារព្ធទិវាប្រយុទ្ធប្រឆាំងអំពើជួញដូរមនុស្សនៅឆ្នាំ ២០១៨ កន្លងមក ហើយរាជរដ្ឋាភិបាលបានធ្វើកិច្ចសហប្រតិបត្តិការយ៉ាងជិតស្និទ្ធ ជាមួយអង្គការជាតិអន្តរជាតិនានា និងទូរទស្សន៍ បង្កើតឱ្យមានជាឃ្លីបវីឌីអូ និងបទយកការណ៍ ដើម្បីបង្ហាញឱ្យប្រជាពលរដ្ឋគ្រប់ស្រទាប់យល់ដឹងនូវអំពើជួញដូរមនុស្សជាមួយនឹងការបង្កើតនូវយន្តការផ្សព្វផ្សាយជាប្រចាំឱ្យបានទូលំទូលាយនៅទូទាំងប្រទេស ដូច្នេះ ដើម្បីដោះស្រាយបញ្ហាសកលនេះឱ្យបានទាន់ពេលវេលា បញ្ហាប្រទេសសមាជិកអាស៊ាន- ចិនត្រូវមានគោលការណ៍រួមមួយ ឯកភាពគ្នា សហការគ្នាយ៉ាងជិតស្និទ្ធ ប្រកបដោយប្រសិទ្ធភាព និងតម្លាភាព ។
ក្នុងឱកាសនោះដែរ សម្តេចតេជោនាយករដ្ឋមន្ត្រី បានចែករំលែកនូវអនុសាសន៍មួយចំនួនដល់អង្គសន្និសីទ រួមមាន ៖
១. អគ្គព្រះរាជអាជ្ញាអាស៊ាន-ចិន ត្រូវរួមគ្នាធ្វើកិច្ច សហប្រតិបត្តិការឱ្យបានជិតស្និទ្ធជាមួយបញ្ហាស្ថាប័ន និងប្រទេសពាក់ព័ន្ធនឹង « អំពើជួញដូរមនុស្ស» ជាពិសេសនៅក្នុងប្រទេសឆ្លងកាត់ និងប្រទេសគោលដៅ ដើម្បីឆ្លើយតប និងដោះស្រាយឱ្យបានទាន់ពេលកំណត់ ប្រកបដោយប្រសិទ្ធភាព និងតម្លាភាព ។
២. អគ្គព្រះរាជអាជ្ញាអាស៊ាន-ចិន ត្រូវរួមគ្នាពិនិត្យ និងវាយតម្លៃបញ្ហា « អំពើជួញដូរមនុស្ស » តាមរយៈស្មារតីទទួលខុសត្រូវខ្ពស់ ប្រកបដោយគុណភាព និងប្រសិទ្ធភាព ជាមួយប្រទេស និងស្ថាប័នពាក់ព័ន្ធ ដូចមានចែងក្នុងកិច្ចព្រមព្រៀង ឬ អនុស្សរណៈនៃការយោគយល់គ្នាដែលបានចុះហត្ថលេខាកន្លងមក ។
៣. អគ្គព្រះរាជអាជ្ញាអាស៊ាន-ចិន និងស្ថាប័នពាក់ព័ន្ធត្រូវរួមគ្នាបន្ត និងបង្កើនកិច្ចសហការឱ្យបាទូលំទូលាយ បង្កលក្ខណៈងាយស្រួល និងចូលរួមផ្តល់ធនធានសម្រាប់ប្រតិបត្តិការជាប្រព័ន្ធដើម្បីអាចឆ្លើយតបបញ្ហាបានទាន់ពេលវេលាស្តីពី «អំពើជួញដូរមនុស្ស »ប្រកបដោយប្រសិទ្ធភាពខ្ពស់ ។
៤.អគ្គព្រះរាជអាជ្ញាអាស៊ាន-ចិនត្រូវរួមគ្នាធ្វើកំណត់ត្រា និងចងក្រងរបាយការណ៍ជាមួយនឹងភស្តុតាងជាក់ស្តែង ដើម្បីបង្ហាញអំពីកិច្ចខិតខំប្រឹងប្រែងរួមគ្នាជាមួយស្ថាប័នពាក់ព័ន្ធ ក្នុងការចូលរួមប្រយុទ្ធប្រឆាំងអំពើជួញដូរមនុស្ស ដែលជាឧក្រិដ្ឋកម្មបង្កគ្រោះថ្នាក់ដល់សង្គមជាតិ និងកំពុងប៉ះពាល់ដល់កិច្ចដំណើរការអភិវឌ្ឍសង្គម-សេដ្ឋកិច្ចនៅក្នុងតំបន់ និងសកលលោក ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្ដែងនូវក្ដីសង្ឃឹមថា អង្គសន្និសីទនឹងបន្តប្រើប្រាស់យន្តការអត្តព្រះរាជអាជ្ញាអាស៊ាន-ចិន ដែលជាវេទិកាពង្រឹងកិច្ចសហប្រតិបត្តិការពារប្រកបដោយឆន្ទៈរួមតែមួយ ក្នុងការប្រយុទ្ធប្រឆាំង «អំពើជួញដូរមនុស្ស » និងបទល្មើសឆ្លងដែនគ្រប់រូបភាពដើម្បីធានានូវសន្តិសុខ និងសុវត្ថិភាពឆ្លងដែនដល់បញ្ហាប្រជាជននៅក្នុងប្រទេសអាស៊ាន-ចិន និងនៅក្នុងតំបន់ផងដែរ។
សូមបញ្ជាក់ថា ក្នុងសេចក្តីប្រកាសព័ត៌មានរបស់មហាអយ្យការអមតុលាការកំពូល បានបញ្ជាក់ថា៖ សន្និសីទអគ្គព្រះរាជអាជ្ញាអាស៊ាន-ចិន គឺជាយន្តការកិច្ចសហប្រតិបត្តិការក្នុងតំបន់ក្នុងវិស័យអយ្យការ ដែលទទួលបានការឧបត្ថម្ភគាំទ្រពីអយ្យការប្រជាជនជាន់ខ្ពស់នៃសាធារណរដ្ឋប្រជាមានិតចិន ។ ចាប់តាំងពីការបង្កើតឡើងដំបូងក្នុងឆ្នាំ២០០៤ សន្និសីទបានប្តេជ្ញាលើកកម្ពស់ការកសាងសមត្ថភាពរបស់ស្ថាប័នរដ្ឋអាជ្ញា ក្នុងការប្រយុទ្ធប្រឆាំងឧក្រិដ្ឋកម្មការពារសុខុមាលភាព និងការថែរក្សាសន្តិភាព និងស្ថេរភាពនៅក្នុងតំបន់អាស៊ាន និងចិន។
អង្គសន្និសីទនេះបានរៀបចំចំនួន១១លើករួចមកហើយ ដែលលើកទី១ធ្វើនៅទីក្រុងគួម៉ិញខេត្តយូណាន់នៃសាធារណរដ្ឋប្រជាមានិតចិនកាលពីឆ្នាំ២០០៤ និងចុងក្រោយលើកទី១១ រៀបចំឡើងនៅទីក្រុងបិនដាសេរីប៊េហ្គា នៃព្រះរាជាណាចក្រប្រ៊ុយណេ ដារុយ សាឡឹម កាលពីថ្ងៃទី១៤-១៥ខែសីហាឆ្នាំ២០១៨។
គោលបំណងសំខាន់បំផុតនៃអង្គសន្និសីទ ដែលបានកំណត់នៅក្នុងសេចក្តីប្រកាសរួមមានចុះហត្ថលេខាដោយ អគ្គព្រះរាជអាជ្ញា រដ្ឋអាជ្ញានៃបណ្តាប្រទេសសមាជិកអាស៊ាន និងអគ្គរដ្ឋអាជ្ញានៃសាធារណរដ្ឋប្រជាមានិតចិនកាលពីថ្ងៃទី៧-៩ខែកក្កដាឆ្នាំ២០០៤ នៅទីក្រុងគួនម៉ិញខេត្តយូណាន់ បានកំណត់យ៉ាងច្បាស់អំពីការតាំងចិត្តរបស់ខ្លួនក្នុងការប្រយុទ្ឋប្រឆាំងបទឧក្រិដ្ឋឆ្លងដែន និងឆ្លងតំបន់ ដោយអំពាវនាវដល់ស្ថាប័នអយ្យការឱ្យសហការគ្នាឱ្យបានជិស្និទ្ឋដើម្បី ប្រយុទ្ឋប្រឆាំងអំពើភារវកម្ម ភារវកម្មហិរញ្ញវត្ថុ ការជួញដូរគ្រឿងញៀន ការរត់ពន្ឋឆ្លងដែន អំពើពុករលួយ ការលាងលុយកខ្វក់ ឧក្រិដ្ឋកម្មបច្ចេកវិទ្យាជាន់ខ្ពស់ និងឧក្រិដ្ឋកម្មឆ្លងដែនមានអង្គការចាត់តាំង។
សន្និសីទអគ្គព្រះរាជអាជ្ញាអាស៊ាន-ចិនជាវេទិការនៃមហាអយ្យការក្នុងតំបន់ដើម្បីចែករំលែកនូវបទពិសោធនិងការអនុវត្តល្អក្នុងការប្រយុទ្ឋប្រឆាំង ការទប់ស្កាត់ ការបង្ក្រាប និងការដាក់ទណ្ឌកម្មចំពោះឧក្រិដ្ឋកម្មឆ្លងដែនរួមទាំងអំពើជួញដូរមនុស្សផងដែរ ហើយក៍ជាយន្តការសម្រាប់ពង្រឹងកិច្ចសហប្រតិបត្តិការរវាងបណ្តាប្រទេសក្នុងតំបន់អាស៊ាន ចិន។សន្និសីទអគ្គព្រះរាជអាជ្ញាអាស៊ាន-ចិនលើកទី១២នាពេលនេះគឺដើម្បីរកដំណោះស្រាយក៍ដូចជាកិច្ចសហប្រតិបត្តិការរួមគ្នា ហើយអគ្គព្រះរាជអាជ្ញាអាស៊ានចិននឹងចេញនូវសេចក្តីប្រកាសរួមមួយជាគោលសម្រាប់អនុវត្តស្របទៅនឹងអនុសញ្ញាអង្គការសហប្រជាជាតិស្តីពីការប្រយុទ្ឋប្រឆាំងនឹងឧក្រិដ្ឋកម្មឆ្លងដែន ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
