ក្នុងឱកាសចុះត្រួតពិនិត្យពលនៃកងកម្លាំងប្រដាប់អាវុធគ្រប់ប្រភេទនៅក្នុងខេត្ត នៅអាកាសយានដ្ឋានកងទ័ពអាកាសខេត្តសៀមរាប នាព្រឹកថ្ងៃទី០៣ ខែវិច្ឆិកា ឆ្នាំ២០១៩នេះ ឯកឧត្ដម ទៀ សីហា អភិបាលខេត្តសៀមរាប បានមានប្រសាសន៍ថា បើតាមបណ្ដាញទំនាក់ទំនងសង្គមរបស់ជនក្បត់ជាតិទណ្ឌិត សម រង្ស៊ី បានប្រកាសថា នឹងចូលមកប្រទេសកម្ពុជានៅថ្ងៃទី០៩ ខែវិច្ឆិកា ខាងមុខនេះ ដែលគោលបំណងរបស់ជនក្បត់ជាតិរូបនេះ គឺចង់ផ្តួលរំលំរាជរដ្ឋាភិបាលស្របច្បាប់ដែលកើតចេញពីការបោះឆ្នោតស្របច្បាប់ពិតៗ និង ផ្លាស់ប្ដូររបបរាជានិយមអាស្រ័យរដ្ឋធម្មនុញ្ញ អាចនិយាយបានថា ជាការធ្វើបដិវត្តពណ៌ ជាពិសេសគឺចង់ផ្លាស់ប្ដូរពីប្រទេសដែលកំពុងមានសន្តិភាព ឲ្យធ្លាក់ចូលក្នុងភាពវឹងវវវិញ ហើយបញ្ហានៃការវិលចូលមកកម្ពុជារបស់ជនក្បត់ជាតិទណ្ឌិត សម រង្ស៊ី នេះ ត្រូវបានប្រមុខរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី បានប្រកាសចាត់វិធានការចាប់ខ្លួនឲ្យខាងតែបាន ព្រមទាំងបានណែនាំដល់អាជ្ញាធរខេត្ត រាជធានី និង កងកម្លាំងប្រដាប់អាវុធទាំងអស់ ត្រូវអនុវត្តការងារនេះឲ្យមានប្រសិទ្ធភាព ។
ឯកឧត្ដម ទៀ សីហា មានប្រសាសន៍បន្ថែមថា ក្នុងនាមកងកម្លាំងប្រដាប់អាវុធ ត្រូវតែការពារឲ្យបានដាច់ខាត នូវបូរណភាពទឹកដី ការពារសន្តិសុខ ការពារសណ្ដាប់ធ្នាប់សាធារណៈ ការពារសុខសន្តិភាព និង ការពារសេចក្ដីសុខក្សេមក្សាន្តរបស់ប្រជាពលរដ្ឋយើង ហើយត្រូវប្រឆាំងដាច់ខាត និង ចាត់វិធានការចាប់ខ្លួនទណ្ឌិត សម រង្ស៊ី ប្រសិនបើជនរូបនេះបានចូលមកដល់ទឹកដីនៃខេត្តសៀមរាប ហើយសូមឲ្យកងកម្លាំងប្រដាប់អាវុធទាំងអស់ ត្រូវយកចិត្តទុកដាក់និងប្រុងប្រយ័ត្នខ្ពស់ ខណៈនៅខេត្តសៀមរាប មានច្រកចំនួន៣ គឺ ៖ ទី១. ច្រកអាកាសយាដ្ឋានអន្តរជាតិសៀមរាប , ទី២. តាមច្រកផ្លូវគោកនៃព្រំដែនកម្ពុជាថៃ ដូច្នេះសូមឲ្យស្នងការ និង មេបញ្ជាការកងកម្លាំងប្រដាប់អាវុធទាំងអស់ ត្រូវសហការឲ្យបានស្អិតរមួតជាមួយមេបញ្ជាការកងកម្លាំងប្រដាប់អាវុធនៅតាមបន្ទាត់ព្រំដែន និង ទី៣. គឺតាមច្រកផ្លូវទឹកនៃបឹងទន្លេសាប ដែលការងារនេះគឺ ស្នងការនគរបាលខេត្តសៀមរាប ត្រូវសហការជាមួយស្នងការនគរបាលខេត្តជាប់បឹងទន្លេសាប ដើម្បីចាត់វិធានការឲ្យមានប្រសិទ្ធភាព ហើយយើងក៏ធ្លាប់បានជួបពិភាក្សាគ្នាជាច្រើនលើករួចមកហើយដែរ ។
ឯកឧត្ដម ទៀ សីហា មានប្រសាសន៍បន្ថែមទៀតថា បញ្ហាសំខាន់ដែលយើងត្រូវដឹង ៖ គឺទី១. ជនក្បត់ជាតិរូបនេះ អាចនឹងមកពិតប្រាកដមែន ប៉ុន្តែយើងបានត្រៀមកម្លាំងរួចរាល់ហើយដើម្បីចាប់ខ្លួនទាល់តែបាន ចាប់ពីថ្ងៃនេះដល់ថ្ងៃទី០៩ ឬក៏ថ្ងៃទី១០ , ទី២. គឺគាត់នឹងមិនត្រឡប់មកកម្ពុជាវិញទេ ប៉ុន្តែគាត់នឹងបំផុសឲ្យក្រុមអ្នកគាំទ្រគាត់ ទៅបង្កជាចលាចល និង បង្កជាអសន្តិសុខ ទាំងនៅក្នុងក្នុងទូទាំងខេត្ត និង នៅជុំវិញព្រលានយន្តហោះ និងទី៣. ពួកហ្នឹងមិនធ្វើអ្វីទាំងអស់ ទាំងជនកម្បត់ជាតិ សម រង្ស៊ី និង ទាំងបក្សពួកក្រុមឧទ្ទាម ប៉ុន្តែពួកនេះទៅដើរបំផុសដល់ប្រជាពលរដ្ឋនៅតាមភូមិ ដែលមានការយល់ដឹងតិចតួច និង ចាញ់បោកដោយសារការញុះញង់នេះ ឲ្យធ្វើសកម្មភាពបង្កចលាចល និង បង្កជាអសន្តិសុខ ដែលបញ្ហានេះ សូមឲ្យកងកម្លាំងរបស់យើង ត្រូវមានភាពអត់ធ្មត់ កុំឲ្យបង្កនូវភាពហិង្សាជាមួយបងប្អូនប្រជាពលរដ្ឋយើង ។
ឯកឧត្ដមអភិបាលខេត្តសៀមរាប មានប្រសាសន៍ទៀតថា សម្តេចតេជោនាយករដ្ឋមន្ត្រី បានយកអាយុជីវិតធ្វើជាដើមទុន ដើម្បីស្វែងរកសន្តិភាពជូនប្រជាជនកម្ពុជា និងបម្រើប្រជាជន នៅក្នុងគ្រប់កាលៈទេសៈ ដែលខុសពីអ្នកនយោបាយមួយចំនួន បានយកជោគវាសនាប្រទេសជាតិ និងអាយុជីវិតប្រជាជន ជាល្បែងក្នុងនយោបាយបម្រើឲ្យ មហិច្ឆតាល្មោភចង់បានអំណាចរបស់ខ្លួន ដោយមិនគិតពីការស្លាប់រស់របស់ប្រជាជន និងប្រទេសជាតិ ដូច្នេះ សូមឲ្យកងកម្លាំងប្រដាប់អាវុធទាំងអស់ ត្រូវប្តេជ្ញាចិត្តការពាររក្សាតម្លៃ នៃសន្តិភាពជាតិមាតុប្រទេសឲ្យបានគង់វង្សជារៀងរហូត ដោយមិនត្រូវឲ្យជនក្បត់ជាតិទណ្ឌិត សម រង្ស៊ី មកបំផ្លាញសន្តិភាពដែលកើតចេញពីការបោះឆ្នោតស្របច្បាប់ពិតៗ ហើយប្តេជ្ញាមិនឲ្យជនក្បត់ជាតិនេះចូលមកលើទឹកដីកម្ពុជាបានឡើយ ។
ក្នុងឱកាសនោះដែរឯកឧត្ដម ទៀ សីហា អភិបាលខេត្តសៀមរាប បានសម្ដែងនូវការកោតសរសើរចំពោះ កងកម្លាំងប្រដាប់អាវុធទាំងអស់ ដែលកន្លងមក បានបំពេញតួនាទី និង ភារកិច្ចរបស់ខ្លួនបានយ៉ាងល្អ ក្នុងការការពារនូវសន្តិសុខ សុខសុវត្ថិភាព និង សណ្ដាប់ធ្នាប់សាធារណៈក្នុងទូទាំងខេត្ត ទាំងសម្រាប់ប្រជាពលរដ្ឋក្នុងខេត្ត ភ្ញៀវជាតិ និង ភ្ញៀវអន្តរជាតិ ដែលបានចូលមកទស្សនាកំសាន្តនៅក្នុងខេត្តសៀមរាប ប៉ុន្តែត្រូវចងចាំ និង ត្រូវមានស្មារតីសេហ្នាជាតិ ការពារសន្តិភាពជូនប្រទេសជាតិ មិនត្រូវជឿលើសម្តីនៃការញុះញង់របស់ជនក្បត់ជាតិទណ្ឌិត សម រង្ស៊ី ជាជនក្បត់ជាតិ ចង់ផ្តួលរំលំរាជរដ្ឋាភិបាលស្របច្បាប់ឡើយ ដោយត្រូវចូលរួមថែរក្សាការពារឲ្យបានដាច់ខាត នូវសន្ដិភាពដែលកំពុងមានសព្វថ្ងៃ ទោះក្នុងតម្លៃណាក៏ដោយ ដូច្នេះយើងទាំងអស់គ្នាកុំបំផ្លាញអ្វីៗដែលមានស្រាប់ ត្រូវរួមគ្នាបន្តកសាងជាបន្តបន្ទាប់ លើមូលដ្ឋានកំពុងមាននេះ ជាពិសេស ការកសាងឱកាសសម្រាប់អ្នកជំនាន់ក្រោយ ក្នុងនោះមានឱកាសសិក្សារៀនសូត្រ ដើម្បីឲ្យពួកគេក្លាយខ្លួនជាអ្នកដឹកនាំនាពេលអនាគត អាចចូលរួមក្នុងការអភិវឌ្ឍប្រទេសជាតិ និងស្រុកភូមិកំណើតរបស់ខ្លួន ៕
អត្ថបទ ៖ លោក លីវ សាន្ត
រូបថត ៖ លោក ស៊ាន សុផាត និង លោក ខេង ឧត្ដម
