អគារសិក្សាថ្មី១ខ្នង ស្មើនឹង៥បន្ទប់ ជាថ្នាក់បញ្ញើ សម្រាប់សិស្សានុសិស្សដែលប្រឡងជាប់សញ្ញាបត្រមធ្យមសិក្សាបឋមភូមិ នៅសាលាបឋមសិក្សានិងអនុវិទ្យាល័យ ស្រីវិបុលកេរិ៍ត ស្ថិតនៅក្នុងភូមិត្រាច ឃុំបល្ល័ង្ក ស្រុកប្រាសាទបាគង ខេត្តសៀមរាប ដែលជាអំណោយរបស់លោក អូអេ មីតស៊ូម៉ាសា ជាសប្បុរសជនជប៉ុន តាមរយៈមូលនិធិអាហារូបករណ៍ ស៊ូមីតា-កម្ពុជា ( SSFC ) ត្រូវបានរៀបចំកាត់ខ្សែបូរសម្ពោធដាក់ឲ្យប្រើប្រាស់ជាផ្លូវការហើយ កាលពីព្រឹកថ្ងៃទី០២ ខែវិច្ឆិកា ឆ្នាំ២០១៩ ម្សិលមិញនេះ ក្រោមអធិបតីភាពឯកឧត្តមអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប ។
លោក ធឿន ប៊ុនគង់ នាយកអនុវិទ្យាល័យ ស្រីវិបុលកេរិ៍ត បានឲ្យដឹងថា វត្តមានអគារសិក្សាថ្មីនេះ គឺពិតជាការស្វែងរកឃើញដំណោះស្រាយមួយដ៏មានប្រសិទ្ធភាព កែលម្អបរិយាកាសអប់រំនៅមូលដ្ឋានជនបទមួយនេះ ចាកចេញពីការព្រួយបារម្ភ នៃបញ្ហាប្រឈម បោះបង់ការសិក្សារបស់សិស្ស និង អាចនិយាយបានថា ជាការផ្តល់លិខិតឆ្លងដែននៃភាពក្រីក្រ ដល់សិស្សទាំងឡាយដែលខិតខំរៀនសូត្រ ហើយទឹកចិត្តគ្រូបង្រៀន គឺមិនចង់បានលាភសក្ការៈអ្វីពីសិស្សនោះទេ តឺចង់ឃើញសិស្សរបស់ខ្លួន បានក្លាយជាពលរដ្ឋល្អ ជាសសរទ្រូងនៃប្រទេសជាតិ មានអនាគតល្អរុងរឿង ។
លោក សយ សត្យាវង្ស ប្រធានមន្ទីរអប់រំយុវជន និងកីឡាខេត្តសៀមរាប បានទទួលស្គាល់ថា ៖ សម្រាប់សិស្សានុសិស្សនៅក្នុងមូលដ្ឋានជនបទមួយនេះ ពិតបានជួបការលំបាក ដែលសិស្សត្រូវប្រឈមក្នុងការធ្វើដំណើរឆ្ងាយ ដើម្បីបន្តការសិក្សារបស់ខ្លួននៅវិទ្យាល័យ ហ៊ុនសែន ប្រាសាទបាគង ដែលកត្តាទាំងនោះ គឺជាក្តីព្រួយបារម្ភចំពោះករណីបោះបង់ការសិក្សារបស់សិស្ស ហើយនេះជាលើកដំបូងហើយនៅខេត្តសៀមរាប ដែលបើកសម្ពោធឲ្យប្រើប្រាស់ថ្នាក់ផ្ញើនៅអនុវិទ្យាល័យ សម្រាប់ការបង្រៀនសិស្ស ថ្នាក់កម្រឹតវិទ្យាល័យ វាជាដំណោះស្រាយមួយ សមស្របតាមគោលនយោបាយរបស់រាជរដ្ឋាភិបាល ដែលបង្ខិតសាលាឲ្យខិតចូលជិតភូមិស្ថានរបស់សិស្ស ។
មានប្រសាសន៍ក្នុងឱកាសនោះ ឯកឧត្តមអ្នកឧកញ៉ា សៀង ណាំ បានបង្ហាញនូវជំហរគាំទ្រចំពោះមូលនិធិអាហារូបករណ៍ ស៊ូមីតា-កម្ពុជា ( SSFC ) ដែលបានជួយកសាងអគារសិក្សាថ្នាក់ផ្ញើនេះ ដែលចាត់ទុកថា ជាដំណោះស្រាយមួយចំគោលដៅនៃតម្រូវការរបស់សហគមន៍ ស្របតាមពាក្យស្លោកដែលថា ការអប់រំសម្រាប់ទាំងអស់គ្នា ទាំងអស់គ្នាសម្រាប់ការអប់រំ ខណៈបច្ចប្បន្ននេះបានក្លាយជាកម្មវត្ថុគន្លឹះរបស់រាជរដ្ឋាភិបាល ក៏ដូចជាក្រសួងអប់រំ ដែលវិស័យអប់រំសិក្សា បណ្តុះបណ្តាលធនធានមនុស្សនេះ គឺជាយាននាំប្រទេសជាតិឈានទៅរកការអភិវឌ្ឍប្រកបដោយជោគជ័យ ហើយការប្រឹងប្រែង អាចសម្រេចបានលទ្ធផលល្អប្រសើរ ក៏អាស្រ័យដោយការយកចិត្តទុកដាក់របស់រាជរដ្ឋាភិបាល និងកិច្ចសហការចូលរួមផងដែរ រវាងកម្លាំងក្នុងប្រព័ន្ធអប់រំ សហគមន៍ ដៃគូអភិវឌ្ឍ វិស័យឯកជន និងសប្បុរសជន ។
គួររំលឹកដែរថា កាលក្នុងអំឡុងឆ្នាំ២០១៣ មូលនិធិ SSFC បាន សាងសង់អាគារសិក្សា២ខ្នង ស្មើនឹង៨បន្ទប់ ជូនសាលាបឋមសិក្សា-អនុវិទ្យាល័យ ស្រីវិបុលកេរិ៍ត និងផ្តល់អាហារូបករណ៍ដល់សិស្សក្រីក្រ ជាសម្ភារសិក្សា ឯកសណ្ឋានសិស្ស អង្ករ ទោចក្រយាន និងថវិកាប្រចាំខែផងដែរ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
