នៅព្រឹកថ្ងៃទី០៣ ខែ វិច្ឆិកា ឆ្នាំ២០១៩ ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំយុទ្ធនាសម្អាតបរិស្ថានក្រុងសៀមរាប ក្រោមប្រធានបទ សៀមរាបផ្ទះខ្ញុំ ដោយមានការចូលរួមពីសំណាក់ឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំនិងមន្ត្រីរាជការនៃមន្ទីរ អង្គភាពនានាក្នុងខេត្ត តំណាងស្ថានកុងស៊ុលចិនប្រចាំខេត្ត សមាជិកនៃសហភាពសហព័ន្ធយុវជនកម្ពុជាខេត្ត សិស្សានុសិស្ស សមាគមពាណិជ្ជកម្មចិន ប្រជាពលរដ្ឋជាច្រើនរូប។
លោក នួន ពុទ្ធារ៉ា អភិបាលក្រុងសៀមរាប បានដឹងថា ទិវាសម្អាតបរិស្ថានក្រុងសៀមរាបនេះ គឺជាការចូលរួមប្រឡងប្រណាំងទីក្រុងស្អាត ហើយក៏ជាគោលបំណងធ្វើឲ្យបងប្អូនប្រជាពលរដ្ឋខេត្តសៀមរាប បានជ្រាបអំពីបរិស្ថាន ការចូលរួមថែរក្សាបរិស្ថាន ដើម្បីធ្វើយ៉ាងណារក្សាសោភ័ណភាពក្រុងប្រវត្តិសាស្ត្រសៀមរាប ដែលជាផ្ទះមហាគ្រួសារដ៏ធំរបស់យើងទាំងអស់គ្នា ពិសេសដើម្បីទទួលអំណរសាទរ ក្នុងកិច្ចប្រជុំព្រះរាជអាជ្ញាអាស៊ាន ពិធីបណ្យឯករាជ្យជាតិ និងព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុកនៅខេត្តសៀមរាប ដែលជាបុណ្យប្រពៃណីជាតិខ្មែរយើង នៅថ្ងៃខាងមុខ ឲ្យមានភាពស្រស់បំព្រង នៅលើទឹកដីអច្ឆិរយៈ នៃព្រះរាជាណាចក្រកម្ពុជា ។
មានប្រសាសន៍ក្នុងឱកាសនោះរ ឯកឧត្តម ទៀ សីហា អភិបាលខេត្តសៀមរាប បានសម្ដែងនូវការកោតសរសើរដល់អាជ្ញាធរគ្រប់លំដាប់ថ្នាក់ មន្ទីរ អង្គភាពទាំងអស់ក្នុងខេត្ត សហភាពសហព័ន្ធយុវជនកម្ពុជាខេត្ត ព្រមទាំងប្រតិបត្តិករទេសចរណ៍ និង ប្រជាពលរដ្ឋ ដែលបានចូលរួមក្នុងការសម្អាតបរិស្ថាន អនាម័យក្រុងសៀមរាបនាពេលនេះ សំដៅកាត់បន្ថយនូវកាកសំណល់ ពិសេសចំពោះថង់ប្លាស្ទីកដែលប្រជាពលរដ្ឋបានបោះចោលដោយគ្មានសណ្តាប់ធ្នាប់ ធ្វើឲ្យប៉ះពាល់ដល់សោភ័ណភាពក្រុង និង ដើម្បីធ្វើឲ្យក្រុងសៀមរាបស្រស់ស្អាត គ្មានសម្រាមថង់ផ្លាស្ទីក ។
ឯកឧត្តម ទៀ សីហា មានប្រសាសន៍បន្ថែមថា រាជរដ្ឋាភិបាល អាណត្តិទី៦ បានផ្តល់ភាពសំខាន់ទៅលើបញ្ហាបរិស្ថាន ចំពោះការអភិវឌ្ឍន៍ប្រទេសជាតិ ដោយបានបង្កើតនូវគណៈកម្មាធិការជាតិ វាយតម្លៃទីក្រុងស្អាត ដែលដឹកនាំដោយក្រសួងទេសចរណ៍ ក្នុងគោលបំណង ដើម្បីលើកទឹកចិត្ត ដល់គ្រប់បណ្តារាជធានី ខេត្ត ចូលរួមប្រកួតប្រជែងសម្អាតបរិស្ថាន អនាម័យ ឲ្យខេត្តរបស់ខ្លួនមានសោភ័ណភាព ដោយមានការគ្រប់គ្រងកាកសំណល់ និង បញ្ជ្រាបការយល់ ដឹងអំពីបរិស្ថាន និង សណ្តាប់ធ្នាប់ល្អដល់ប្រជាពលរដ្ឋ ជាពិសេស យុទ្ធនាការសម្អាតបរិស្ថានទីក្រុងថ្ងៃនេះ គឺជាការទទួលសាទរក្នុងទិវាបុណ្យឯករាជ្យជាតិ ៩វិច្ឆិកា និង ពិសារអំបុកការពារជាតិ សាសនា ព្រះមហាក្សត្រ និង ព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុក នៅថ្ងៃខាងមុខនេះ ។
សូមបញ្ជាក់ថា ការបើកយុទ្ធនាកាសម្អាតក្រុងសៀមរាបថ្ងៃនេះ បានធ្វើការបែងចែកតាមគោលដៅចំនួន០៧ក្រុម ទៅតាមដងផ្លូវវិថីនានាក្នុងក្រុងសៀមរាប ៕
អត្ថបទ និង រូបថត ៖ លោក ម៉ី សុខារិទ្ធ
រូបថត ៖ សហការី
កែសម្រួលអត្ថបទ ៖ លោក លីវ សាន្ត
