តាមការឲ្យដឹងថា ពីសមត្ថកិច្ចខេត្តសៀមរាប កាលពីវេលាម៉ោង ០១ និង៥០នាទី ថ្ងៃទី០១ ខែវិច្ឆិកា ឆ្នាំ២០១៩នេះ កំលាំងនគរបាលខេត្ត បានធ្វើការឃាត់ខ្លួនជនបរទេសម្នាក់ ដែលបានធ្វើសកម្មភាពយកដបស្រាវាយទៅលើបុរសជាអ្នករត់កង់បីម្នាក់ ត្រូវចំថ្ពាល់ខាងស្តាំ និងស្មារខាងស្តាំ បណ្តាលឲ្យបែកហូរឈាម នៅលើចំនុចផ្លូវមាត់លូ ស្ថិតក្នុងភូមិស្ទឹងថ្មី សង្កាត់ ស្វាយដង្គំ ក្រុង/ខេត្តសៀមរាប ។
សមត្ថកិច្ច បានឲ្យដឹងទៀតថា ជនបង្កខាងលើមានឈ្មោះ DOWNER JARED MARTIN ភេទ ប្រុស កើតថ្ងៃទី៣០ ខែសីហា ឆ្នាំ១៩៨៩ ជនជាតិអង់គ្លេស កាន់លិខិតឆ្លងដែនលេខ៥៣៧៦៤០២២២ មុខរបរគ្មាន ស្នាក់នៅសណ្ឋាគារ Siem Reap Chilled Backpacker ក្នុងភូមិវត្តបូព៌ សង្កាត់សាលាកំរើក ក្រុង/ខេត្តសៀមរាប ។ ចំណែកជនរងគ្រោះមានឈ្មោះ អឿត សំណាង ភេទ ប្រុស អាយុ ២៧ឆ្នាំ ជនជាតិ ខ្មែរ មុខរបរ អ្នករត់រ៉ឺម៉កម៉ូតូកង់បី មានទីលំនៅក្នុងភូមិជ្រាវ សង្កាត់ជ្រាវ ក្រុង/ខេត្តសៀមរាប ។
ក្រោយកើតហេតុភ្លាមៗ សមត្ថកិច្ចនៅទីតាំងផ្ទាល់ ក៏បានធ្វើការឃាត់ខ្លួនជនបង្ក និងរងគ្រោះខាងជាបណ្តោះអាសន្ន នៅស្នងការដ្ឋាននគរបាលខេត្ត ដើម្បីបន្តការសាកសួរ និងរៀបចំកសាងសំណុំរឿងបញ្ជូនទៅសាលាដំបូងខេត្តចាត់ការបន្តតាមនីតិវិធី ។
អត្ថបត្ត និង រូបភាព ៖ ថាច់ ពិសុទ្ធ
កែសម្រួល ៖ អ៊ុន ណារាជ្យ
