នៅព្រឹកថ្ងៃទី០១ ខែវិច្ឆិកា ឆ្នាំ២០១៩ ឯកឧត្តម ទៀ សីហា អភិបាលខេត្តសៀមរាប បានអញ្ជើញជាអធិបតី ក្នុងពិធីបើកបវេសនកាលឆ្នាំសិក្សាថ្មី២០១៩-២០២០ នៅវិទ្យាល័យ១០មករា១៩៧៩ ក្នុងក្រុងសៀមរាប រួមជាមួយវត្តមានថ្នាក់ដឹកនាំមន្ត្រីរាជការ អាជ្ញាធរមូលដ្ឋានគណៈគ្រប់គ្រងសាលា លោកគ្រូអ្នកគ្រូ សិស្សានុសិស្ស មាតាបិតាអាណាព្យាបាលសិស្ស ជាច្រើនផងដែរ។
ក្នុងរបាយការណ៍ស្វាគមន៍របស់លោក គឹម ឡេង នាយកវិទ្យាល័យ១០ មករា ១៩៧៩ បានលើកឡើងពីវិធានការនិងទិសដៅផែនការសម្រាប់អនុវត្តបន្ត ដោយផ្តោតការយកចិត្តទុកដាក់និងបង្កើនការទទួលខុសត្រូវលើភារកិច្ចគ្រប់គ្រងសាលារៀន គ្រប់គ្រងគ្រូបង្រៀននិងសិស្សានុសិស្សឱ្យបង្រៀននិងរៀនសូត្របានល្អប្រកបដោយប្រសិទ្ឋិភាព និងពង្រឹងកិច្ចសហការរវាងសាលារៀន គ្រួសារ និងសង្គមជាពិសេសជាមួយសហគមន៍ជាតិនិងអន្តរជាតិសំដៅគៀងគរការឧបត្ថម្ភ ទាំងស្មារតីនិងសម្ភារៈដើម្បីឆ្លើយតបទៅនឹងតម្រូវការក្នុងការសិក្សារៀនសូត្ររបស់ក្មួយៗ។
បន្ទាប់ពីអានសារលិខិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសទិវាបើកបវេសនកាលឆ្នាំសិក្សាថ្មី២០១៩-២០២០ រួចមក ឯកឧត្តម ទៀ សីហា ប្រសាសន៍បញ្ជាក់បន្ថែមថា៖ រាជរដ្ឋាភិបាលកម្ពុជាក្រោមកិច្ចដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា បានខិតខំប្រឹងប្រែងនាំសុខសន្តិភាព និងការអភិវឌ្ឍជូនប្រទេសជាតិ ឱ្យមានការរីកចម្រើនលូតលាស់លើគ្រប់វិស័យ។ នៅក្នុងសម័យតេជោ យុវវ័យបច្ចុប្បន្ន ធំដឹងក្តីឡើងជួបតែការអភិវឌ្ឍ និងភាពសុខក្សេមក្សាន្ត នៅគ្រប់ទីកន្លែង ដែលខុសពីជំនាន់ឪពុកម្តាយ អ៊ុពូមីងរបស់ប្អូនៗ ក្មួយៗ។
ឯកឧត្តមបានផ្តាំផ្ញើដល់ សិស្សានុសិស្សទាំងអស់ត្រូវ ខិតខំប្រឹងប្រែង ស្តាប់ការពន្យល់ណែនាំរបស់លោកគ្រូអ្នកគ្រូ និងមាតាបិតាអាណាព្យាបាលរបស់ខ្លួន ត្រូវគោរពវិន័យសាលា ចៀសឱ្យឆ្ងាយពីគ្រឿងញៀន និងអំពើអបាយមុខផ្សេងៗ។ លើសពីនោះ សូមកុំខ្ជះខ្ជាយពេលវេលាឥតប្រយោជន៍ ជាមួយបណ្តាញសង្គមហ្វេសប៊ុក។ ប្អូនៗ ក្មួយៗ គួរនាំគ្នាប្រើបណ្តាញសង្គមទាំងនោះ ដើម្បីស្រាវជ្រាវឯកសារ ដើម្បីជាចំណេះដឹង ចៀសវាងការលេងបែបអវិជ្ជមានវានាំឱ្យមានឥទ្ឋិពលមិនល្អដល់សង្គមជាតិយើង។
ឯកឧត្តមអភិបាលខេត្ត ក៏បានរំលឹកដល់ សិស្សានុសិស្សទាំងអស់ ត្រូវរួមគ្នាសំអាតអនាម័យ បរិស្ថានជុំវិញសាលារៀន តាមដងផ្លូវសាធារណៈទូទៅទៅតាមការណែនាំរបស់គណៈគ្រប់គ្រងសាលា ក៏ដូចជាអាជ្ញាធរខេត្ត ដើម្បីលើកមុខលើកមាត់ និងរក្សាសោភ័ណ្ឌភាពខេត្តរបស់យើង ឱ្យមានភាពស្រស់បំព្រងជានិច្ច ឱ្យសមជាទីក្រុងវប្បធម៌ប្រវត្តិសាស្ត្រ ដែលសម្បូរទៅដោយប្រាង្គប្រាសាទបុរាណ និងជាគោលដៅទេសចរណ៍ដ៏សំខាន់របស់ប្រទេសយើងទាំងអស់គ្នា។
អត្ថបត្ត និង រូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
