នៅថ្ងៃទី៣០ ខែតុលា ឆ្នាំ២០១៩ អាជ្ញាធរមីនកម្ពុជា បានរៀបចំពិធីអង្គវិបស្សនាការងាររបស់អគ្គលេខាធិការដ្ឋានអាជ្ញាធរមីនកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន នៅខេត្តសៀមរាប ក្នុងគោលបំណងលើកកម្ពស់ប្រសិទ្ធភាពការងារ តាមរយ:ការបង្ហាញពីសមិទ្ធផលសម្រេចបាន ប្រឈមដែលបានជួបប្រទះ ក្នុងរយៈពេល១០ឆ្នាំកន្លងមក ដើម្បីរិះរកដំណោះស្រាយរួមគ្នា និងការកំណត់ទិសដៅការងារសម្រាប់អនុវត្តបន្ត។
ថ្លែងបើកពិធី ឯកឧត្តមនាយឧត្តមសេនីយ៍ សែម សុវណ្ណនី អនុប្រធានទី២ អាជ្ញាធរមីនកម្ពុជា មានប្រសាសន៍ថា៖វិបស្សនាគឺជា ការប្រជុំការងារមួយមានលក្ខណៈមិនផ្លូវការ ខុសពីការប្រជុំនៅកន្លែងធ្វើការ ហើយការប្រជុំនេះត្រូវហ៊ានផ្តល់ និងទទួលយោបល់ក្នុងន័យស្ថាបនាត្រង់ទៅត្រង់មក យកមកត្រួតពិនិត្យ និងវាយតម្លៃឡើងវិញនឹងរកឲ្យឃើញនូវបញ្ហាប្រឈម ចំណុចខ្វះខាត ចំណុចខ្លាំង និងចំណុចខ្សោយ លើការងារជាបុគ្គល និងតាមនាយកដ្ឋាននីមួយៗ។ មួយវិញទៀត ការប្រជុំនាពេលនេះ គឺជាការពិភាក្សាការងារស្ថាប័នទាំងមូល និងការងារគម្រោងនានា ដែលបានអនុវត្តកន្លងមក ដើម្បីរិះរកដំណោះស្រាយ និងវិធានការណ៍កែលម្អ ឲ្យកាន់តែប្រសើរឡើង។ ក្នុងនោះ ការប្រជុំនេះ នឹងផ្ដល់នូវចំណេះដឹង និងការណែនាំបន្ថែម ដែលអាចជាទុន សំរាប់អនុវត្តន៍ការងារឲ្យកាន់តែប្រសើរឡើងថែមទៀត ដើម្បីសម្រេចការងារតាមផែនការប្រចាំឆ្នាំ និងផែនការយុទ្ធសាស្ត្រជាតិសកម្មភាពមីន ស្របតាមគោលដៅចម្បងរបស់រាជរដ្ឋាភិបាលកម្ពុជា ក្នុងការជំរុញកំណើនសេដ្ឋកិច្ច និងកាត់បន្ថយភាពក្រីក្រ។
មានប្រសាសន៍នៅរសៀលថ្ងៃដដែលនេះ ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនកម្ពុជា និងក្នុងនាមសម្តេចតេជោនាយករដ្ឋមន្ត្រីកម្ពុជា បានមានប្រសាសន៍កោតសរសើរ ចំពោះកិច្ចខិតខំប្រឹងប្រែងពីគ្រប់ភាគីពាក់ព័ន្ធដែលសម្រេចបានសមិទ្ធផលជាច្រើននាពេលកន្លងមក ពិសេសបានធ្វើឲ្យអត្រាជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមមានការធ្លាក់ចុះជាបន្តបន្ទាប់។
ព័ត៌មានជាតិ ថ្មីៗ
ឯកឧត្តមទេសរដ្ឋមន្ត្រី មានប្រសាសន៍ថា អាជ្ញាធរមីន ក្រៅអំពីកិច្ចការ ដែលយើងកំពុងអនុវត្តនៅក្នុងប្រទេសកម្ពុជា អាជ្ញាធរមីននៅមានបេសកកម្មជាប្រវត្តិសាស្ត្រលើវិស័យមីន ជាលក្ខណៈអន្តរជាតិបន្ថែមទៀតបាននឹងកំពុងរួមចំណែកយ៉ាងសកម្មក្នុងការជួយសម្រួលទុក្ខលំបាករបស់បណ្តាប្រទេស ដែលរងផលប៉ះពាល់ដោយសារមីន តាមរយៈការបញ្ជូនកងនោះមិនទៅបំពេញបេសកកម្មរក្សាសន្តិភាព ក្នុងក្របខណ្ឌ អង្គការសហប្រជាជាតិ រួមមានៈ នៅសាធារណរដ្ឋ ស៊ូដង់ ស៊ូដង់ខាងត្បូង, លីបង់, សាយប្រឹស, ម៉ាលី អាហ្វ្រិកកណ្តាល និងកំពុងត្រៀមបញ្ជូនទៅប្រទេសមួយចំនួនទៀតតាមសំណើរបស់ អង្គការសហប្រជាជាតិ ។
ជាមួយគ្នានោះ ឯកឧត្តមទេសរដ្ឋមន្ត្រី ក៏បានបន្តផ្តល់នូវអនុសាសន៍មួយចំនួនដូចជា ៖១) បន្តអនុវត្តផែនការយុទ្ធសាស្ត្រជាតិសកម្មភាពមីន ដើម្បីសម្រេចបានគោលដៅកម្ពុជាមួយគ្មានមីននៅឆ្នាំ២០២៥។ ២) បន្តស្វែងរកការគាំទ្រ និងកិច្ចសហការជាមួយភាគីពាក់ព័ន្ធ ដើម្បីធានាប្រព័ន្ធគ្រប់គ្រងទិន្នន័យមានលក្ខណៈពេញលេញ។ ៣) បន្តកជំរុញ និងលើកកម្ពស់នូវការបញ្ជ្រាបយេនឌ័រក្នុងសកម្មភាពមីន។ ៤) បន្តអនុវត្តសារាចរលេខ០៥ ស្តីពីការពង្រឹងការងារគ្រប់គ្រងវិស័យសកម្មភាពមីន និងសារាចរណ៍លេខ០៤ ស្តីពីការពង្រឹងបន្ថែមលើការងារគ្រប់គ្រងវិស័យសកម្មភាពមីន។ ៥) ត្រៀមអនុវត្តគម្រោងថវិកាកម្មវិធី ដែលបានកំណត់ដោយក្រសួងសេដ្ឋកិច្ច និងហិរញ្ញវត្ថុ។ ៦) រៀបចំឯកសារណែនាំពីរបៀបរបបការងារ របស់អគ្គលេខាធិដ្ឋានអាជ្ញាធរមីន។ ៧) រៀបចំបណ្ណាល័យ ដើម្បីគ្រប់គ្រងឯកសារ។ ៨) រៀបចំប្រព័ន្ធគ្រប់គ្រងវត្តមានមន្ត្រី បុគ្គលិក។ ៩) ត្រូវគ្រប់គ្រងទ្រព្យសម្បត្តិអាជ្ញាធរមីនអោយល្អ។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
