នាព្រឹកថ្ងៃទី០៩ ខែធ្នូ ឆ្នាំ២០១៩នេះ រដ្ឋបាលខេត្តសៀមរាបបានបន្តរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ក ឆ្នាំ២០១៩ នៅក្នុងបរិវេទរដ្ឋបាលស្រុកអង្គរធំ ដោយមានការអញ្ជើញចូលរួមក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្តស្តីទី និងលោក ពិន ប្រាកដ អភិបាលរងខេត្តតំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ដោយមានការអញ្ជើញចូលរួមពីថ្នាក់ដឹកនាំមន្ទីរ អង្គភាពក្នុងខេត្ត សិស្សានុសិស្ស អាជ្ញាធរ និង ប្រជាពលរដ្ឋមកពីស្រុក អង្គរធំនិង ស្រុកបន្ទាយស្រី ដែលមានសមាជិកសមាជិកាចូលរួមសរុប ប្រមាណជាង៥១៤នាក់ និង វាគ្មិនតំណាងមន្ទីរ-អង្គភាពជុំវិញខេត្ត ចំនួន៤៤នាក់ផងដែរ ។
វេទិកានេះ មានគោលបំណង ដើមី្បផ្តល់ឱកាសជូនដល់បងប្អូនប្រជាពលរដ្ឋ អ្នកពាក់ព័ន្ធទាំងអស់ ដែលបាន មកពីស្រុកបន្ទាយស្រី និង ស្រុកអង្គរធំ បានស្វែងយល់ពីស្ថានភាពទូទៅ នៃការអភិវឌ្ឍខេត្ត ក្រុង ស្រុក ឃុំ សង្កាត់ និង បញ្ហាប្រឈម ដែលកើតកន្លងមក ហើយវេទិកានេះ នឹងផ្តល់ឱកាស ដល់បងប្អូនប្រជាពលរដ្ឋ ក្នុងការបញ្ចេញនូវមតិយោបល់របស់ខ្លួនពាក់ព័ន្ធនឹងកង្វល់ សំណូមពរ ក៏ដូចជាតម្រូវការជាក់ស្តែងក្នុងមូលដ្ឋានរបស់ខ្លួន ដើមី្បសម្រេចបាននូវចក្ខុវិស័យអភិវឌ្ឍន៍សម្រាប់រយៈពេល៥ឆ្នាំនៃអាណត្តិទី៣របស់ក្រុមប្រឹក្សាខេត្តសៀមរាប ក្នុងនោះគោលបំណងផ្នែកសេដ្ឋកិច្ច គឺលើកកម្ពស់ជីវភាពប្រជាពលរដ្ឋក្នុងខេត្ត ឲ្យកាន់តែល្អប្រសើរ និង គោលបំណងផ្នែកសង្គមកិច្ច គឺធ្វើឲ្យកាន់តែប្រសើរឡើង នូវសុខមាលភាពរបស់ប្រជាពលរដ្ឋ ធ្វើការថែរក្សាអភិរក្សសីលធម៌ វប្បធម៌ ប្រពៃណី ទំនៀមទំលាប់ដ៏ស្រស់ផូរផង់របស់ខ្មែរយើងឲ្យបានគង់វង្ស និង លើកកម្ពស់គុណភាពអប់រំឲ្យកាន់តែល្អប្រសើរ ។ ការប្រើប្រាស់ដីធ្លី និង គ្រប់គ្រងធនធានធម្មជាតិ បរិស្ថាន គ្រោះមហន្តរាយ និង ការប្រែប្រួលអាកាសធាតុ ដោយថែរក្សាការពារធនធានធម្មជាតិ និងបរិស្ថានក្នុងខេត្ត កាត់បន្ថយជម្លោះដីធ្លី និង ការយកចិត្តទុកដាក់ ព្រមទាំងកាត់បន្ថយផលប៉ះពាល់គ្រោះមហន្តរាយ ។
ក្នុងនោះដែរសមាជិកនៃអង្គវេទិកាទទួលបានសំណួរនិងកង្វល់ផ្ទាល់មាត់ពីបងប្អូនប្រជាពលរដ្ឋចំនួន១៣សំណួរ-សំណូមពរ ដែលត្រូវបានវាគ្មិនបកស្រាយបំភ្លឺ១១សំណួរសំណូមពរ និងស្ថិតក្នុងការតាមដានបន្ត ២សំណួរ ។ ដោយឡែកសំណួរ-សំណូមពរជាលាយលក្ខ័ជាអក្សរមិនទាន់បានឆ្លើយបំភ្លឺមានចំនួន៣០សំណួរ-សំណូមពរ ដែលក្រុមប្រឹក្សាខេត្តទទួលយកទៅពិនិត្យពិភាក្សា ក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតបជម្រាបជូនដំណឹងជាលាយលក្ខណ៏អក្សរ ដល់ម្ចាស់សំណួរ បងប្អូនប្រជាពលរដ្ឋ តាមរយៈក្រុមប្រឹក្សាឃុំ ។ ក្នុងនោះដែលចំពោះសំណូមពរដែលបានលើកឡើង គឺបញ្ហា ការធ្វើប័ណ្ណកម្មសិទ្ធិសម្គាល់អចនទ្រព្យ ហេដ្ឋារចនាសម្ព័ន្ធ សៀវភៅគ្រួសារនិងអត្តសញ្ញាណប័ណ្ណ តម្លៃកសិផលកសិកម្មនិងការងារសាសនា បញ្ហារដីធ្លីភូមិធម្មជាតិរុនតាឯក បញ្ហារក្រុមហ៊ុនបូមខ្សាច់នៅស្រុកបន្ទាយស្រីដែលធ្វើអោយទឹកល្អក់ បង្ករអោយប៉ះពាល់ដល់ការធ្វើកសិកម្ម ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះដែរ ឯកឧត្តម អ៊ាន ឃុន ក៏បានធ្វើការបូកសរុប និងថ្លែងអំណរគុណ ដល់បងប្អូនដែលបានចំណាយពេលចូលរួម ក្នុងអង្គវេទិកាផ្សព្វផ្សាយនិងពិគ្រោះយោបល់ របស់ក្រុមប្រឹក្សាខេត្តសៀមរាប អាណត្តិទី៣ឆ្នាំ២០១៩ ដែលបានធ្វើឲ្យ យើង បានយល់កាន់តែច្បាប់រាល់ការអភិវឌ្ឍន៍របស់រាជរដ្ឋាភិបាល ក៏ដូចអាជ្ញាធរខេត្ត ក្រុង ស្រុក និង ដឹងពីទុក្ខកង្វល់របស់ប្រជាពលរដ្ឋនៅតាមមូលដ្ឋាន និង តម្រូវការចាំបាច់របស់ប្រជាពលរដ្ឋផងដែរ ។
ឯកឧត្តម អ៊ាន ឃុន មានប្រសាសន៍បន្តថា អង្គវេទិកាអស់រយៈពេលពេញមួយព្រឹកនេះ ជាសញ្ញាវិជ្ជមានថ្មីបន្ថែមទៀត ចំពោះ កិច្ចខិតខំប្រឹងប្រែង ក្នុងកិច្ចពិគ្រោះយោបល់ ពិភាក្សា ដើម្បីពិនិត្យ ពិចារណា និង ធ្វើការឆ្លុះបញ្ចាំងទៅលើសមិទ្ធផលដែលសម្រេចបាន និងបញ្ហាប្រឈមក្នុងឆ្នាំ២០១៩ ជាពិសេសគម្រោងសកម្មភាពជាអាទិភាពសម្រាប់ឆ្នាំ២០២០របស់រដ្ឋបាលខេត្ត ដែលជាកម្លាំងចលករជម្រុញឲ្យការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិកាន់តែមានល្បឿនទៅមុខឥតឈប់ឈរ។
ឯកឧត្តម មានប្រសាសន៍បន្ថែមទៀតថា ចំពោះសំណួរ និង កង្វល់ ដែលអង្គវេទិកានាពេលនេះ ពុំទាន់អាចបកស្រាយបំភ្លឺបាន ក្រុមប្រឹក្សាខេត្ត នឹងយកសំណួរ និង កង្វល់ទាំងនេះ ទៅពិនិត្យ ពិភាក្សា ក្នុងក្របខណ្ឌក្រុមប្រឹក្សាខេត្តហើយនឹងធ្វើការឆ្លើយតប និង ជម្រាបជូនដំណឹងជាលាយលក្ខណ៏អក្សរ ដល់ម្ចាស់សំណួរ បងប្អូនប្រជាពលរដ្ឋ តាមកាលវេលាសមគួរ តាមរយៈមេឃុំ ក្រុមប្រឹក្សាឃុំ តាមមូលដ្ឋានដែលបងប្អូនរស់នៅ ៕
អត្ថបទ និង រូបភាព ៖ ធន់ ពូថេ
