កិច្ចប្រជុំសាមញ្ញលើកទី៧ របស់ក្រុមប្រឹក្សាខេត្តសៀមរាប អាណត្តិទី៣

នៅព្រឹកថ្ងៃទី១២ ខែ ធ្នូ ឆ្នាំ២០១៩នេះ នៅរដ្ឋបាលសាលាខេត្តសៀមរាប មានបើកកិច្ចប្រជុំសាមញ្ញលើកទី៧ របស់ ក្រុម ប្រឹក្សាខេត្តសៀមរាប អាណត្តិទី៣ ក្រោមកិច្ចដឹកនាំប្រជុំរបស់ឯកឧត្តម អ៊ាន ឃុន ប្រធានក្រុមប្រឹក្សាខេត្តស្តីទី និង លោក ពៅ ពិសិដ្ឋ អភិបាលរងខេត្តសៀមរាប ឯកឧត្តម ទៀ សីហា អភិបាលខេត្តសៀមរាប ដើមី្បពិនិត្យពិភាក្សា និង អនុម័តទៅលើ របៀបវារៈសម័យប្រជុំសាមញ្ញលើកទី៧ ចំណុចចំនួន០៣។

ឯកឧត្តម ប្រធានក្រុមប្រឹក្សាខេត្តស្តីទី មានប្រសាសន៍បើកអង្គប្រជុំថា នេះជាកិច្ចប្រជុំសាមញ្ញ ដែលក្រុមប្រឹក្សាខេត្តតែងតែបានអនុវត្តរបបប្រជុំនេះយ៉ាងទៀងទាត់ តាមគោលការណ៍របស់រាជរដ្ឋាភិបាលកម្ពុជា ក្នុងគោលបំណងពិនិត្យ ពិភាក្សា និងតាមដានការងាររបស់រដ្ឋបាលខេត្ត រដ្ឋបាលក្រុង ស្រុក មន្ទីរ អង្គភាព ស្ថាប័នពាក់ព័ន្ធទាំងអស់ក្នុងខេត្ត ដែលបានអនុវត្តការងារកន្លងមក ។

របៀបវារ:ចំនួន ៣ យកមកធ្វើការពិនិត្យ ពិភាក្សា ដោះស្រាយ និងអនុម័តនូវសំណើនានា របស់ក្រុមប្រឹក្សាខេត្ត រដ្ឋបាលខេត្ត និងមន្ទីរ អង្គភាពពាក់ព័ន្ធ ក្នុងនោះមានដូចជា៖
១- ពិនិត្យ និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៦ របស់ក្រុមប្រឹក្សាខេត្ត កាលពីថ្ងៃទី១៤ ខែវិច្ឆិកា ឆ្នាំ២០១៩ ។
២- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំខែវិច្ឆិកា ឆ្នាំ២០១៩ ស្ដីពីការអនុវត្តការងារ របស់រដ្ឋបាលខេត្តសៀមរាប ។
៣- បញ្ហាផ្សេងៗ ។

ក្នុងឱកាសនោះ ក៏មានការលើកជាសំណួរ ស្នើរឱ្យថ្នាក់ដឹកនាំ មន្ទីរ អង្គភាពពាក់ព័ន្ឋឆ្លើយតប និងបកស្រាយ រួមមាន៖
– ការដាក់ឈ្មោះផ្លូវឲ្យបានច្បាស់លាស់
– ការធ្វើបណ្ណ័ក្រីក្រជូនប្រជាពលរដ្ឋ និង ប័ណ្ណបេឡាជាតិរបបសន្តិសុខសង្គម ដល់មន្ត្រីរាជការ កម្មករនិយោជិក (ប.ស.ស)
– ការត្រៀមលក្ខណៈបង្កាការខ្វះខាតទឹកនៅរដូវប្រាំង និង បញ្ហាធារាស្ត្រ ,
– ការងាររៀបចំប្លង់គោលក្នុងក្រុងសៀមរាប ,
– បញ្ហាចរាចរណ៍ក្នុងក្រុងសៀមរាប ,
– បញ្ហាបរិស្ថានទៅតាមបណ្តាស្រុក
– ការអនុវត្ត ផ.អ៣
– ព្រមទាំងបញ្ហាគ្រឿងញៀន ដែលប្រជាពលរដ្ឋមិនបានលើកឡើងនៅក្នុងអង្គវេទិកាផ្សព្វផ្សាយ ពិគ្រោះយោបល់របស់ក្រុមប្រឹក្សាខេត្ត នៅតាមគោលដៅដែលបានធ្វើកន្លងមក ។

ជាមួយនោះ លោក អភិបាលរងខេត្ត ក៏បានអនុញ្ញាតដល់បណ្តាមន្ទីរ អង្គភាពជំនាញពាក់ព័ន្ធ ធ្វើការបកស្រាយបំភ្លឺ នូវគ្រប់រាល់បញ្ហា ជូនសមាជិកក្រុមប្រឹក្សាខេត្ត ដែលបានលើកជាសំណួរ និងបញ្ហានៅក្នុងកិច្ចប្រជុំនេះ ។ លោក អភិបាលរងខេត្ត បានគូសបញ្ជាក់ថា នៅពេលខាងមុខនេះ ថ្នាក់ជាតិ និងធ្វើប្រតិភូកម្ម ទៅដល់ថ្នាក់ក្រោមជាតិ ថ្នាក់ក្រុង ស្រុក ដើមី្បធ្វើការគ្រប់គ្រងគ្រប់ស្ថាប័នជំនាញ ដោយមិនទុកដូចមុនឡើយ ។

បន្ទាប់ពីអង្គប្រជុំធ្វើការពិនិត្យ ពិភាក្សា ព្រមទាំងបកស្រាយរួចមក ឯកឧត្តម ប្រធានក្រុមប្រឹក្សាខេត្តស្តីទី មានប្រសាសន៍បូកសរុប ក្នុងកិច្ចប្រជុំសាមញ្ញលើកទី៧នេះ ដោយជំរុញដល់ថ្នាក់ដឹកនាំខេត្ត មន្ទីរ អង្គភាព ក្រុង ស្រុក សំដៅឆ្ពោះទៅរកមូលដ្ឋានបម្រើប្រជាពលរដ្ឋឲ្យបានល្អបំផុត និង កែលម្អភាពអសកម្មនានា និង ដោះស្រាយបញ្ហាប្រឈមដែលនៅសេសសល់ ។

ឯកឧត្តមបានគូសបញ្ជាក់បន្ថែមថា កំណែទម្រង់វិមជ្ឈការ និង វិសហមជ្ឈការ គឺ ជាកាលានុវត្តភាព សំដៅបង្កើតប្រព័ន្ធរដ្ឋបាលថ្នាក់ក្រោមជាតិ ដែលឆ្លុះបញ្ចាំង នូវគោលការណ៍ជាគន្លឺះនានា នៃអភិបាលកិច្ចល្អ រួមមាន គណនេយ្យភាព នីតិរដ្ឋ តម្លាភាព ការចូលរួមការលើកស្ទួយសមធម៌ ការឆ្លើយតប និងប្រសិទ្ធភាព ។ ចំពោះខ្វះខាតទឹកប្រើប្រាស់នារដូវប្រាំងនេះ អង្គភាពពាក់ព័ន្ធ ត្រូវយកចិត្តទុកដាក់ខ្ពស់ ចំពោះមុខ ត្រូវត្រៀមលក្ខណៈឲ្យបានគ្រប់គ្រាន់ទាំងមធ្យោបាយ សម្ភារៈ ក្នុងការចុះជួយអន្តរាគមន៍បងប្អូនប្រជាពលរដ្ឋនៅតាមមូលដ្ឋាន។ មួយវិញទៀត អាជ្ញាធរខេត្ត ចាំបាច់ត្រូវធ្វើការពង្រីងនូវ ហេដ្ឋារចនាផ្លូវថ្នល់ ស្ពាន លូ ដើមី្បបម្រើនូវតម្រូវការចាំបាច់របស់បងប្អូន ទាំងនៅក្នុងក្រុង និង ស្រុក ។ ក្នុងនោះ ឯកឧត្តមបានធ្វើការសង្កត់ធ្ងន់ ចំពោះបណ្តាមន្ទីរ អង្គភាព ការផ្តល់របាយការណ៍មិនបានទាន់ពេលដល់រដ្ឋបាលខេត្ត សូមឲ្យធ្វើការកែប្រែជាបន្ទាន់ ត្រូវគោរពឲ្យបាននូវការកំណត់របស់រដ្ឋបាលខេត្ត អំពីការផ្តល់របាយការណ៍ ខែ ត្រីមាស ឆមាស និង ឆ្នាំឲ្យបានទៀងទាត់ ដើមី្បត្រៀមលក្ខណៈក្នុងការធ្វើសន្និបាតបូកសរុបរបស់ខេត្ត នៅពេលខាងមុខនេះផងដែរ ។ ទន្ទឹមនោះ កម្លាំងសមត្ថកិច្ច និង មន្ទីរជំនាញ ត្រូវយកចិត្តទុកដាក់ខ្ពស់ ត្រួតពិនិត្យចំពោះអ្នកបើកបររថយន្តគ្រប់ប្រភេទ អំពីសារធាតុញៀន ច្បាប់បើកបរជាដើម និង ត្រូវបង្កើនការធ្វើសុវត្ថិភាពចរាចរណ៍នៅតាមបណ្តាសាលារៀនក្នុងក្រុង និង ស្រុក ក្នុងការកាត់បន្ថយនូវការគ្រោះថ្នាក់ចរាចរណ៍ ផងដែរ ៕

អត្ថបទ និង រូបភាព៖ ម៉ី សុខារិទ្ធ និង យូ វង្ស
កែសម្រួលអត្ថបទ៖ សេង ផល្លី