កាលពីថ្ងៃទី០៧ ខែមករា ឆ្នាំ២០២០ នៅខាងមុខសួនច្បារព្រះរាជដំណាក់ ក្នុងក្រុងសៀមរាប ខេត្តសៀមរាបមានរៀបចំ មីទ្ទីងអបអរសាទរ ខួបអនុស្សាវរីយ៍ ៤១ ឆ្នាំ ថ្ងៃជ័យជំនះ ៧មករា ដ៏មហោឡារិក ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ព្រមទាំងមានអ្នកចូលរួមមកពីគ្រប់មជ្ឈដ្ឋានប្រមាណ៦ពាន់នាក់។
ដោយឡែក និងជារួម ចំពោះការអបអរសាទរ ខួបអនុស្សាវរីយ៍ ៤១ឆ្នាំ ថ្ងៃជ័យជំនះ ៧មករា ១៩៧៩-២០២០ នៅទូទាំងប្រទេស ក៏ដូចជានៅក្នុងខេត្តសៀមរាបទាំងមូល ប្រជាពលរដ្ឋកម្ពុជាបានចាប់អារម្មណ៍ខ្លាំងបំផុត គឺពាក្យថា “អរគុណ! សន្តិភាព”។ នៅក្នុងប្រសាសន៍ របស់សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា នៅរាជធានីភ្នំពេញ ដែលបានផ្សាយបន្តផ្ទាល់ នៅក្នុងអង្គមីទ្ទីងក្នុងខេត្តសៀមរាប សម្ដេចបានថ្លែងអំណរគុណចំពោះជនរួមជាតិទាំងអស់ ដែលគាំទ្រចំពោះសារនយោបាយដ៏មានអត្ថន័យដ៏ជ្រាលជ្រៅនេះ ដែលសម្តេចតេជោយល់ថា សារនេះមានតម្លៃមិនសាបសូន្យ មិនថាកន្លងមក ថ្ងៃនេះ និងថ្ងៃអនាគត ព្រោះថា មនុស្សលោកត្រូវការសន្តិភាព លើកលែងតែពួកភេរវករប៉ុណ្ណោះ ដែលចង់បំផ្លាញសន្តិភាព ។
មានប្រសាសន៍ក្នុងក្រុងសៀមរាបនាឱកាសនោះ សម្តេចពិជ័យសេនា ទៀ បាញ់ រំលឹកឡើងវិញដែរថា ៖ មានថ្ងៃ៧មករា ឆ្នាំ១៩៧៩ ទើបមានអ្វីៗទាំងអស់ សម្រាប់ថ្ងៃនេះ ស្មារតី៧មករា មិនអាចរលុបចេញពីបេះដូងប្រជាជនកម្ពុជាបាននោះឡើយ ។ សម្តេចតេជោ ហ៊ុន សែន រួមជាមួយយុទ្ធមិត្តផ្សេងទៀត បានយកអាយុជីវិតធ្វើជាដើមទុន ដើម្បីរំដោះជាតិ មាតុភូមិ និងប្រជាជាតិកម្ពុជា ចេញពីចង្កូមមច្ចុរាជនៃរបបកម្ពុជាប្រជាធិបតេយ្យប្រល័យពូជសាសន៍ ដែលនេះជាថ្ងៃកំណើតទី២ របស់ប្រជាជនកម្ពុជានៅក្នុងរបបនោះ ។ ព្រះរាជាណាចក្រកម្ពុជា ក៏បានប្រសូត្រឡើងជាថ្មី លើដែនដីចាស់ ។ សង្គ្រាមរ៉ាំរៃ ពុំបានអនុញ្ញាតិឲ្យមាតុភូមិកម្ពុជាដ៏កម្សត់ បានឈានឆ្ពោះទៅរកការអភិវឌ្ឍនោះឡើយ ។ សម្តេចតេជោ ហ៊ុន សែន ដើម្បីសន្តិភាព បានយកជីវិតធ្វើជាដើមទុនជាលើកទី២ ដាក់ចេញនូវគោលនយោបាយ ឈ្នះ ឈ្នះ ដែលជារូបមន្តបន្សាបសង្គ្រាមដោយសន្តិវិធី ស្ថាបនាសន្តិភាព ដែលពិភពលោកពុំធ្លាប់មាន និងជាបទពិសោធន៍ដែលពិភពលោក មិនអាចធ្វើបាន បញ្ចប់សង្គ្រាម ដោយមិនធ្វើសង្គ្រាម ។
មនុស្សជាង៦ពាន់នាក់ ចូលរួមទិវារំលឹកខួបអនុស្សាវរីយ៍ ៤១ ឆ្នាំ ថ្ងៃជ័យជំនះ
មនុស្សជាង៦ពាន់នាក់ ចូលរួមទិវារំលឹកខួបអនុស្សាវរីយ៍ ៤១ ឆ្នាំ ថ្ងៃជ័យជំនះ ៧មករានៅខេត្តសៀមរាប#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Wednesday, January 8, 2020
អត្ថបទ និង រូបភាព៖ ងិន គឹមឡេង
កែសម្រួល ៖ សេង ផល្លី
