រថយន្តដឹកអ្នកដំណើររបស់ក្រុមហ៊ុន Giant Ibis មួយគ្រឿង ដាច់ហ្វ្រាំងធ្លាក់ប្រឡាយ ក្នុងស្រុកប្រាសាទបាគង

កាលវេលាម៉ោងប្រមាណ ៦ល្ងាចថ្ងៃទី ២១ ខែមករា ឆ្នាំ២០២០ នៅតាមបណ្តោយផ្លូវ ជាតិលេខ៦ ស្ថិតក្នុងភូមិ រកាកំបុត ស្រុកប្រាសាទបាគង ខេត្តសៀមរាប មានករណីគ្រោះថ្នាក់ចរាចរណ៍មួយកើតឡើង បង្កដោយរថយន្តដឹកអ្នកដំណើរមួយគ្រឿង របស់ក្រុមហ៊ុន ចាយអ៊ិន អាយប៊ីស (Giant Ibis) បានដាច់ហ្រាំ្វង រ៉េចង្កូតធ្លាក់ចូលប្រឡាយ តែពុំមានមនុស្សគ្រោះថ្នាក់ដល់អាយុជីវិតឡើយ។

តាមការឲ្យដឹងពីកម្លាំងនគរបាលផ្នែកចរាចរ នៃអធិការដ្ឋាននគរបាលស្រុកប្រាសាទបាគង រថយន្តដឹកអ្នកដំណើររបស់ក្រុមហ៊ុន ចាយអ៊ិន អាយប៊ីសនេះ មានទិសដៅពីកើតមកលិច បានរ៉េចង្កូតធ្លាក់ចូលប្រឡាយក្បែរផ្លូវ តែពុំបង្កឲ្យមានគ្រោះថ្នាក់បាត់បង់ជីវិត ឬរបួសស្នាម ដល់អ្នកដំណើរឡើយ។

អធិការនគរបាលស្រុកប្រាសាទបាគងបានឲ្យដឹងថា អ្នកដំណើរ នៅក្នុងរថយន្តនោះសុទ្ធសឹងជាជនបរទេស មានចំនួន២៧នាក់ ក្នុងនោះស្រី ១៨នាក់។ បន្ទាប់ពីធ្វើអន្តរាគមន៍គ្រប់គ្រងកន្លែងកើតហេតុ សមត្ថកិច្ច រួមនិងភាគីពាក់ព័ន្ធបាន ផ្ទេរអ្នកដំណើររួមនិងអីវ៉ាន់ ទៅរថយន្តមួយគ្រឿងផ្សេងទៀត ដើម្បីបន្តដំណើរ។ ចំណែកឯ អ្នកបើកបររថយន្ត សមត្ថកិច្ច បាននាំខ្លួនមកអធិការដ្ឋាន ដើម្បីធ្វើការសាកសួរ ជានោះ សមត្ថកិច្ចបញ្ជាក់ថា អ្នកបើកបររថយន្ត ពុំមានសារធាតុញៀនក្នុងខ្លួនឡើយ បន្ទាប់ពីការធ្វើតេស្ត៕