កាលពីរសៀលថ្ងៃទី២២ ខែមករា ឆ្នាំ២០២០ សិស្សថ្នាក់ទី៧ នៃវិទ្យាល័យ ហ៊ុនសែន ស្វាយធំ ស្ថិតក្នុងឃុំកណ្តែក ស្រុកប្រាសាទបាគង ខេត្តសៀមរាប ៥៥នាក់ ក្នុងនោះស្រី ៣២នាក់ ត្រូវបានបញ្ជូលទៅ ទៅមណ្ឌលសុខភាពភ្លាមៗ បន្ទាប់ពីមានអាការៈ ឈឺក្បាល ហៀរទឹកភ្នែក និងរកកលក្អួត។
តាមការឲ្យដឹងពី លោកអភិបាលស្រុកបាគង បន្ទាប់ពី អាជ្ញាធរមូលដ្ឋានបានបញ្ជូនសិស្សដែលមានអាការៈខាងលើរួចរាល់ហើយ លោកបានចាត់តាំងក្រុមការងារ ពិនិត្យ ស្រាវជ្រាវអំពីបញ្ហានេះ នៅតាមតូបលក់ចំណីអាហារ ដែលមាននៅបរិវេណសាលា រួមបរិស្ថានជុំវិញសាលា។
ជាលទ្ធផល លោកអភិបាលស្រុក បានបង្ហាញថា សិស្សសាលាដែលមានអាការៈខាងលើ គឺបណ្ដាលមកពីសារធាតុគីមីដែលនៅក្នុងសំរាម ដែលគេបានដុតនៅក្បែរសាលា។ លោកបាន ណែនាំដល់គណៈគ្រប់គ្រងសាលា ក៏ដូចជាប្រជាពលរដ្ឋទូទៅ ត្រូវបញ្ឈប់ការដុតសំរាមបែបនេះតទៀត ព្រោះប៉ះពាល់ដល់សុខភាព។
តាមការបញ្ជាក់ លោកអភិបាលស្រុក បច្ចុប្បន្ន ស្ថានភាពសិស្ស ខាងលើទាំង៥៥នាក់នេះ មានភាពប្រសើរជាធម្មតាវិញហើយ។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
