នាព្រឹកថ្ងៃទី ២៧ ខែមករា ឆ្នាំ ២០២០ នៅអាកាសយានដ្ឋានអន្តរជាតិខេត្តសៀមរាប ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល ច្រានចោល រាល់ព័ត៌មានក្លែងក្លាយទាំងអស់ ដែលបានផ្សព្វផ្សាយថា ជំងឺរលាកផ្លូវដង្ហើមប្រភេទថ្មី ឬហៅថាណូវ៉ែលកូរ៉ូណាបានមកដល់កម្ពុជា និងសូមទូរស័ព្ទមកលេខ១១៥ ដោយឥតគិថ្លៃ បើសង្ស័យថាមានឆ្លងជំងឺនេះនៅកម្ពុជា។
ក្នុងឱកាស ចុះត្រួតពិនិត្យវិធានការបង្ការ និងពិនិត្យទប់ស្កាត់ជំងឺណូវ៉ែលកូរ៉ូណា របស់មន្ត្រីចត្តាឡីស័ក របស់មន្ទីរសុខាភិបាលខេត្តសៀមរាប នៅអាកាសយានដ្ឋានអន្តរជាតិខេត្តសៀមរាប ឯកឧត្តមរដ្ឋមន្រ្តី បញ្ជាក់ថា ក្រសួងសុខាភិបាល បានដាក់ម៉ាស៊ីនស្កែនរកករណីជំងឺនេះ នៅតាមច្រកអាកាសយានដ្ឋានអន្តរជាតិភ្នំពេញ ខេត្តសៀមរាប ខេត្តក្រុងព្រះសីហនុ ច្រកព្រំដែនផ្លូវគោកអន្តរជាតិ បាវិត ខេត្តស្វាយរៀង ប៉ោយប៉ែត ខេត្តបន្ទាយមានជ័យ និងព្រែកចាក ខេត្តកំពត ព្រមទាំងច្រកចេញចូលផ្សេងៗទៀត។
គិតត្រឹមព្រឹកនាព្រឹកថ្ងៃទី ២៦ ខែមករា ឆ្នាំ ២០២០ម្សិលមិញនេះ នៅទូទាំងពិភពលោក មានអ្នកឆ្លងជំងឺ ជំងឺរលាកផ្លូវដង្ហើមប្រភេទថ្មី ឬហៅថាណូវ៉ែលកូរ៉ូណានេះ កើនដល់ ២០១៧នាក់ហើយ ក្នុងនោះស្លាប់ចំនួន៥៦នាក់ ដែលមានតែក្នុងប្រទេសចិនតែមួយប៉ុណ្ណោះ។ ប្រទេស និងតំបន់ ដែលត្រូវបានរាយការណ៍ថា បានឆ្លងជំងឺនេះ រួមមាន ចិន ថៃ ហុងកុង អូស្ត្រាលី ម៉ាឡេស៊ី សិង្ហបុរី បារាំង ជប៉ុន តៃវ៉ាន់ ម៉ាកាវ កូរ៉េខាងត្បូង សហរដ្ឋអាមេរិក វៀតណាម និងនេប៉ាល់ គឺពុំមានកម្ពុជាឡើយ។
ឯកឧត្តមរដ្ឋមន្រ្តី បានបញ្ជាក់សារជាថ្មីថា នៅទូទាំងប្រទេសកម្ពុជា នៅពុំទាន់រកឃើញករណីជំងឺណូវ៉ែលកូរ៉ូណា ឡើយ មានតែសេចក្ដីប្រកាសព័ត៌មានចេញដោយក្រសួងសុខាភិបាល តែប៉ុណ្ណោះដែលជាព័ត៌មានផ្លូវការ។ សូមប្រជាពលរដ្ឋ កុំបន្តចែករំលែក ព័ត៌មានក្លែងក្លាយ ដែលបង្កឲ្យចលាចល ក្នុងសង្គម និងចូលរួមលុបបំបាត់ព័ត៌មានក្លែងក្លាយទាំងនេះ ទាំងអស់គ្នា។
ឯកឧត្តមរដ្ឋមន្រ្តី លើកទឹកចិត្តដល់ប្រជាពលរដ្ឋទូទៅ ទាក់ទងមកកាន់លេខទូរស័ព្ទ១១៥ ដោយមិនគិតថ្លៃពីគ្រប់ប្រព័ន្ធទូរស័ព្ទ ប្រសិនបើសង្ស័យ ឬដឹងថាមានករណី ឆ្លងជំងឺជំងឺរលាកផ្លូវដង្ហើមប្រភេទថ្មី ឬហៅថាណូវ៉ែលកូរ៉ូណានេះ នៅក្នុងប្រទេសកម្ពុជា។
គួររំលឹកថា នៅក្នុងសេចក្ដីជូនដំណឹងផ្លូវការ របស់ក្រសួងសុខាភិបាលចុះនៅថ្ងៃទី២៦ ខែមករា ម្សិលមិញនេះ បានបញ្ជាក់ពីការត្រៀមខ្លួនរួចជាស្រេច ក្នុងករណីរកឃើញ រោគសញ្ញាណាមួយដែលអាចកើតជំងឺណូវ៉ែលកូរ៉ូណានេះ ក្រសួងបានត្រៀមបន្ទប់ដាក់អ្នកជំងឺ ឲ្យនៅដាច់ដោយឡែក នៅមន្ទីរពេទ្យមិត្តភាពខ្មែរសូវៀត មន្ទីរពេទ្យខេត្តព្រះសីហនុ មន្ទីរពេទ្យខេត្តសៀមរាប និង ព្រមទាំងបានផ្សព្វផ្សាយទៅកាន់មន្ទីរពេទ្យរដ្ឋទាំង២៥រាជធានី-ខេត្ត ដើម្បីត្រៀមខ្លួនឆ្លើយតបទៅនឹងករណីជំងឺនេះ។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
