នៅព្រឹកថ្ងៃទី៣០ ខែមករា ឆ្នាំ២០២០នេះ មានករណីរថយន្តធុនធំប្រភេទសន្តោងមួយគ្រឿង បានធ្លាក់ចេញពីផ្លូវ លើកំណាត់ផ្លូវជាតិលេខ៦៧ ស្ថិតក្នុងភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប បណ្ដាលឲ្យធ្លាក់សត្វជ្រូកជាង ៣០០ក្បាល តែមិនមានមនុស្សរងរបួសនោះទេ។
តាមការឲ្យដឹងពី ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ជ្រូកជាង ៣០០ ក្បាលនេះគឺនាំចូលតាមច្រកជាំស្រងាំ ខេត្តឧត្ដមានជ័យ។
ដោយឡែកតាមរបាយការណ៍របស់កងរាជអាវុធហត្ថស្រុកវ៉ារិន បង្ហាញថា រថយន្តដឹកជ្រូកមួយគ្រឿងដែលធ្លាក់ផ្លូវនោះ ម៉ាក ប៉េអង ពណ៌ ស ពាក់ស្លាកលេខ ភ្នំពេញ.3F0539។ គ្រោះថ្នាក់នេះ បង្កដោយអ្នកបើកបរខ្លួនឯងផ្ទាល់ នៅត្រង់ចំណុចផ្លូវកោង តែពុំបង្កឲ្យមានគ្រោះថ្នាក់ដល់អ្នកធ្វើចរាចរណ៍នៅតាមដងផ្លូវដទៃទៀតឡើយ។
អត្ថបទ និង រូបភាព ៖ លោក គឿន វេត
កែសម្រួលអត្ថបទ ៖ លោក សេង ផល្លី
