សមត្ថកិច្ចនគរបាលខេត្តសៀមរាប បានឲ្យដឹងថា នៅថ្ងៃទី០៥ ខែកុម្ភៈ ឆ្នាំ២០២០នេះ មនុស្សចំនួន០៣នាក់ដែលជាប់សង្ស័យពាក់ព័ន្ធនឹងករណីគ្រឿងញៀន រួមនឹងវត្ថុតាង ត្រូវបាននគរបាលគ្រឿងញៀន នៃស្នងការដ្ឋាននគរបាលខេត្តសៀមរាប បញ្ជូនខ្លួនទៅសាលាដំបូងខេត្ត ដើម្បីចាត់ការបន្តតាមនីតិវិធីច្បាប់ បន្ទាប់ពីកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ត សហការជាមួយកម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលក្រុងសៀមរាប និង កម្លាំងប៉ុស្តិ៍នគរបាលរដ្ឋបាលសង្កាត់ស្លក្រាម ឃាត់ខ្លួនបានក្នុងប្រតិបត្តិការចុះបង្ក្រាបបទរក្សាទុកជួញដូរចាត់ចែង និងប្រើ ប្រាស់ដោយខុសច្បាប់នូវសារធាតុ ញៀន នៅចំនុចលំនៅដ្ឋានស្ថិតនៅភូមិទ្រាំង សង្កាត់ស្លក្រាម ក្រុងសៀមរាប និងនៅលើដងផ្លូវស្ថិតនៅភូមិថ្នល់បណ្តោយ ឃុំព្រះដាក់ ស្រុកបន្ទាយស្រី ខេត្តសៀមរាប កាលពីវេលាម៉ោង ១០និង១០នាទី ថ្ងៃទី០៤ ខែកុម្ភៈ ឆ្នាំ២០២០ ម្សិលមិញនេះ ។
សមត្ថកិច្ច បានឲ្យដឹងទៀតថា ជនសង្ស័យទាំង០៣នាក់នោះ មានឈ្មោះ ៖ ១- ឈ្មោះ វ៉េ វត្ត ភេទប្រុស ឆ្នាំកំណើត ១៩៩៦ ជនជាតិខ្មែរ មុខរបរគ្មាន មានមានទីលំនៅភូមិថ្នល់បណ្តោយ ឃុំព្រះដាក់ ស្រុកបន្ទាយស្រី ជាប់សង្ស័យនឹងករណីរក្សាទុកជួញដូរ និងប្រើប្រាស់ ព្រមទាំងមានសារធាតុញៀនក្នុងខ្លួន , ២- ឈ្មោះ ហួត វ៉ើនឈាង ភេទប្រុស ឆ្នាំកំណើត១៩៩៩ ជនជាតិខ្មែរ មុខរបរគ្មាន មានទីលំនៅភូមិទ្រាំង សង្កាត់ស្លក្រាម ក្រុងសៀមរាប ជាប់សង្ស័យនឹងករណីចាត់ ចែង និងប្រើប្រាស់ ព្រមទាំងមានសារធាតុញៀនក្នុងខ្លួន និង ៣- ឈ្មោះ រ៉ម បូរីន ហៅវិន ភេទប្រុស ឆ្នាំកំណើត២០០២ ជនជាតិខ្មែរ មុខរបរគ្មាន មានទីលំនៅភូមិទ្រាំង សង្កាត់ស្លក្រាម ជាប់សង្ស័យនឹងករណីចាត់ចែង និងប្រើប្រាស់ ព្រមទាំងមានសារធាតុញៀនក្នុងខ្លួន។
សមត្ថកិច្ចនគរបាលខេត្តសៀមរាប បានឲ្យដឹងបន្ថែមថា ក្នុងប្រតិបត្តិការនេះ កម្លំាងនគរបាលជំនាញបានដកហូតវត្ថុតាង រួមមាន ៖ ម្ស៉ៅមេតំហ្វេតាមីនប្រភេទទឹកកក ចំនួន ០៦កញ្ចប់ ស្មើនឹងទម្ងន់២,៣ក្រាមទាំងសំបក , ឧបករណ៍ប្រើប្រាស់និងសម្ភារវេចខ្ចប់គ្រឿងញៀនមួយចំនួន និងទូរស័ព្ទដៃចំនួន០២គ្រឿង ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
