ដើម្បីបញ្ចៀសផលប៉ះពាល់ លើការបញ្ជាការហោះហើរ ជុំវិញតំបន់អាកាសយានដ្ឋានអន្តរជាតិ ខេត្តសៀមរាប នាព្រឹកថ្ងៃទី ០៦ ខែកុម្ភៈ ឆ្នាំ២០២០ ប្រតិភូក្រសួងព័ត៌មាន និងសម្របសម្រួលដោយមន្ទីរព័ត៌មានខេត្តសៀមរាប បានចុះត្រួតពិនិត្យលក្ខណៈបច្ចេកទេស នៅទីតាំងស្ថានីយវិទ្យុFM ចំនួនពីរ ក្នុងក្រុងសៀមរាប រួមមាន ស្ថានីយវិទ្យុមង្គលសុវណ្ណ និងស្ថានីយ៍វិទ្យុព្រះពុទ្ធសាសនាកម្ពុជរដ្ឋ។
ឯកឧត្តម តី ម៉ាលី អនុរដ្ឋលេខាធិការក្រសួងព័ត៌មាន បានឲ្យដឹងថា ដើម្បីធានាសុវត្ថិភាព ជើងហោះហើរក្នុងខេត្តសៀមរាប ក្រសួងព័ត៌មាន កន្លងថ្មីៗនេះ បានតម្រូវឲ្យស្ថានីយទាំងពីរផ្អាកការផ្សាយជាបណ្តោះអាសន្ន ដើម្បីត្រួតពិនិត្យ កែសម្រួលបច្ចេកទេសការផ្សាយ តាមស្ដង់ដាត្រឹមត្រូវ និងត្រូវបំពាក់ឧបករណ៍នៅផ្នែកម៉ាស៊ីនផ្សាយបន្ថែម (Cavity Filter)។
ឯកឧត្តម បានបន្តថា បន្ទាប់ពីស្ថានីយវិទ្យុទាំងពីរ អនុវត្តន៍តាមការណែនាំរបស់ក្រសួង ដោយធ្វើការកែសម្រួលក្ខណៈបច្ចេកទេសបានត្រឹមត្រូវ ក្រសួងបានអនុញ្ញាតឲ្យស្ថានីយវិទ្យុទាំងពីរនេះ ធ្វើការផ្សាយឡើងវិញជាធម្មតា ប៉ុន្តែមន្ត្រីជំនាញរបស់ក្រសួងព័ត៌មាន នឹងនៅតែបន្តធ្វើការតាមដានបន្តទៀត។
គួររំលឹកថា បញ្ហាឆ្លងហ្វេ្រកង់ វិទ្យុទាក់ទងលើការបញ្ជាការហោះហើរ VHF Air Band 118.30MHz-122.875MHz ត្រូវបានមន្ត្រីជំនាញក្រសួងព័ត៌មាន សហការណ៍ជាមួយមន្ត្រីជំនាញមន្ទីរព័ត៌មានខេត្តសៀមរាប បានរកឃើញ កាលពីថ្ងៃទី១២ ខែធ្នូ ឆ្នាំ២០១៩។ ក្រសួងបានតម្រូវឲ្យស្ថានីយវិទ្យុទាំងពីរនេះ ផ្អាកការផ្សាយជាបន្ទាន់ ដើម្បីធ្វើការកែសម្រួលលក្ខណៈបច្ចេកទេស ឱ្យបានត្រឹមត្រូវតាមស្តង់ដា ។
អត្ថបទ និង រូបថត : មន្ទីរព័ត៌មានខេត្តសៀមរាប
កែសម្រួលអត្ថបទ : លោក សេង ផល្លី
