(តូក្យូ)៖ អាជ្ញាធរជប៉ុនបានប្រកាសឲ្យដឹងនៅព្រឹកថ្ងៃអង្គារនេះថា ការធ្វើតេស្តរកមើលវីរុសកូរ៉ូណាថ្មី នៅក្នុងខ្លួនអ្នកដំណើរជាបន្តបន្តាប់ នៅលើកប៉ាល់ទេសចរណ៍ខ្នាតយក្ស ដាយមិនដ៍ ព្រីនសេស (Diamond Princess) បានរកឃើញអ្នកឆ្លងវីរុសមានប្រភពពីចិននេះ កើនឡើងដល់ ១៦១នាក់ហើយ ខណៈកាលពីថ្ងៃចន្ទម្សិលមិញនេះគឺមានតែ ១៣០នាក់ប៉ុណ្ណោះ។ នេះបើតាមការចេញផ្សាយដោយ Kyodo នាព្រឹកថ្ងៃអង្គារ ទី១១ ខែកុម្ភៈ ឆ្នាំ២០២០។
កប៉ាល់ទេសចរណ៍ Diamond Princess ជាកម្មសិទ្ធិរបស់ក្រុមហ៊ុនអាមេរិក Princess Cruise Lines Ltd. ត្រូវបានដាក់ឲ្យស្ថិតនៅក្រោមការពិនិត្យតាមដានរយៈពេលពីរសប្តាហ៍ នៅពេលមកដល់ទីក្រុង យ៉ូកូហាម៉ា (Yokohama) ប្រទេសជប៉ុន កាលពីថ្ងៃទី០៣ ខែកុម្ភៈ ឆ្នាំ២០២០ ក្រោយអតីតអ្នកដំណើរម្នាក់របស់កប៉ាល់ ដែលបានចុះនៅទីក្រុងហុងកុង កាលពីខែមុនត្រូវបានធ្វើតេស្តរកឃើញថា មានផ្ទុកវីរុសកូរ៉ូណាថ្មី។
គួរជម្រាបថា កប៉ាល់ទេសចរណ៍ Diamond Princess របស់ជប៉ុនដែលមានផ្ទុកអ្នកដំណើរ និងបុគ្គលិករបស់កប៉ាល់ផ្ទាល់សរុបជាង ៣,៧០០នាក់ បានមកដល់ទីក្រុងយូកូហាម៉ាកាលពីថ្ងៃទី០៣ ខែកុម្ភៈ បន្ទាប់ពីការធ្វើដំណើរជុំ 14 ថ្ងៃ។
ប៉ុន្តេអ្នកដំណើរដែលនៅលើកប៉ាលទាំងអស់ត្រូវជាប់គាំង ដើម្បីធ្វើតេស្តរកវីរុសកូរ៉ូណាប្រភេទថ្មី បន្ទាប់ពីការផ្ទុះឡើងនៃមេរោគនេះ ។
