នារសៀលថ្ងៃទី ១០ ខែកុម្ភៈឆ្នាំ២០២០ នៅអធិការដ្ឋាននគរបាលស្រុកស្រីស្នំ ខេត្តសៀមរាប មានរៀបចំពិធីប្រកាសផ្ទេរភារកិច្ចតែងតាំងមុខតំណែង និងបំពាក់ឋានន្តរស័ក្តិ ជូនដល់មន្ត្រីអធិការដ្ឋាននគរបាលស្រុកស្រីស្នំ សរុបចំនួន១៩៨នាក់ ក្នុងនោះស្រី២១នាក់ ក្រោមអធិបតីភាព លោកឧត្តមសេនីយ៍ត្រី តូច សាកល ស្នងការរង នៃស្នងការដ្ឋាននគរបាលខេត្តសៀមរាប និងអភិបាលស្រុកស្រីស្នំ។
មានប្រសាសន៍ក្នុងពិធីនោះ លោកឧត្តមសេនីយ៍ត្រី តូច សាកល បានថ្លែងកោតសរសើរដល់ មន្ត្រីនគរបាលស្រុកស្រីស្នំ ដែលបានខិតខំប្រឹងប្រែងបំពេញភារកិច្ច រហូតទទួលបានការតែងតាំងមុខតំណែង និងបំពាក់ឋានន្តរស័ក្តិនាពេលនេះ។ ជាមួយនោះ កងកម្លាំងនគរបាលទាំងអស់ ដែលមានវត្តមាននៅទីនេះ ក៏ត្រូវតែខិតខំបំពេញភារកិច្ចរបស់ខ្លួន ធ្វើយ៉ាងណា ពង្រឹងកងកម្លាំងនគរបាល ដើម្បីការពារសន្តិសុខសុវត្ថិភាព សណ្ដាប់ធ្នាប់សង្គមជូនប្រជាពលរដ្ឋនៅទូទាំងខេត្ត ក៏ដូចជានៅក្នុងមូលដ្ឋានឲ្យបានកាន់តែល្អប្រសើរទ្វេរឡើងថែមទៀត។
ក្នុងនោះដែរ លោកស្នងការរង ក៏បានអំពាវនាវដល់ មន្ត្រីនគរបាលទាំងអស់ ត្រូវមានសាមគ្គីភាព ឯកភាព និងកិច្ចសហការណ៍ប្រតិបត្តិការណ៍គ្នាល្អ និង ត្រៀមប្រចាំការ២៤ម៉ោងលើ២៤ម៉ោង ដើម្បីតាមដានត្រួតពិនិត្យសភាពការណ៍ ត្រៀមអន្តរាគមន៍នៅរាល់ហេតុការ ក្នុងករណីមានការអុកឡុកការគម្រាមកំហែងអំពើហិង្សាល្មើសច្បាប់ផ្សេងៗ ដែលនាំឲ្យរាំងស្ទះ និងបង្ករអសន្តិសុខខូចសណ្តាប់ធ្នាប់របៀបរៀបរយក្នុងសង្គម។
អត្ថបទ និង រូបភាព៖ ថាច់ ពិសុទ្ធ
កែសម្រួល៖ លោក សេង ផល្លី
