នៅព្រឹកថ្ងៃទី១១ ខែកុម្ភៈ ឆ្នាំ២០២០នេះ មន្ត្រីសរុបចំនួន៤៤នាក់ ស្រីមានចំនួន ១៨នាក់ មកពី ត្រូវបានប្រកាសចូលកាន់មុខតំណែងនៅក្នុងរចនាសម្ព័ន្ធថ្មី ក្នុងពិធីប្រកាសដាក់ឲ្យដំណើរការជាផ្លូវការ រចនាសម្ព័ន្ធថ្មី នៃរដ្ឋបាលស្រុកបន្ទាយស្រី ក្រោមអធិបតីភាព ឯកឧត្តម ទៀ សីហា អភិបាលខេត្តសៀមរាប លោកអភិបាលស្រុកបន្ទាយស្រី ព្រមទាំង ថ្នាក់ដឹកនាំមន្ទីរ តំណាងមន្ទីរ និងមន្ត្រីសាលាខេត្ត មន្ទីរ អង្គភាពជុំវិញខេត្តសរុប១៥៩រូប។
តាមរយៈរបាយការណ៍លោកអភិបាលស្រុកបន្ទាយស្រី បានបង្ហាញថា ការធ្វើសមាហរណកម្មបុគ្គលិក និងការរៀបចំមុខតំណែងគ្រប់គ្រងនៅក្នុងរចនាសម្ព័ន្ធនៃរដ្ឋបាលស្រុកបន្ទាយស្រីនេះ ស្របតាមសេចក្តីសម្រេចលេខ ០១២ សសរ/គជអប ចុះថ្ងៃទី២៨ ខែមករា ឆ្នាំ២០២០ របស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ ជាមួយគ្នានេះ សម្រាប់ការដាក់ឱ្យដំណើរការរចនាសម្ព័ន្ធថ្មីនៃរដ្ឋបាលស្រុកបន្ទាយស្រី មន្ត្រីរាជការរបស់រដ្ឋបាល ស្រុក នឹងទទួលបានការធានានូវអត្ថប្រយោជន៍នានា ដូចជាប្រភេទក្របខណ្ឌ ឋានន្តរស័ក្តិ ថ្នា្កក់ ប្រាក់បៀវត្ស និងប្រាក់ឧបត្ថម្ភផ្សេងៗជូនមន្ត្រីដដែល។
មានប្រសាសន៍ក្នុងឱកាសនោះ ឯកឧត្តម ទៀ សីហា លើកឡើងថា ការរៀបចំ និងការអនុវត្តកំណែទម្រង់វិមជ្ឈការ និងវិសហមជ្ឈការ នៅតាមប្រទេសនីមួយៗ មានលក្ខណៈផ្សេងៗគ្នា អាស្រ័យទៅតាមកត្តាភូមិសាស្ត្រ ប្រជាសាស្ត្រ ស្ថានភាពនយោបាយ សេដ្ឋកិច្ច សង្គមកិច្ច វប្បធម៌ និងប្រពៃណីនៃប្រទេសនីមួយៗ។ ដោយឡែក នៅកម្ពុជាមានគោលបំណងសំខាន់ៗចំនួន៣ ៖ ទី១៖ ពង្រឹង និងពង្រីកលទ្ធិប្រជាធិបតេយ្យ សេរី ពហុបក្ស ឲ្យចាក់គ្រឹះរហូតដល់មូលដ្ឋានតាមរយៈការបោះឆ្នោតបង្កើតក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ ដែលជាតំណាងរបស់ប្រជាពលរដ្ឋឋ។ ទី២៖ លើកកម្ពស់គុណភាព ប្រសិទ្ធភាពនៃការផ្តល់សេវាសាធារណៈ និងការអភិវឌ្ឍមូលដ្ឋាន តាមរយៈ ការផ្លាស់ប្តូរប្រព័ន្ធ និងរចនាសម្ព័ន្ធគ្រប់គ្រងរដ្ឋបាលនៅថ្នាក់មូលដ្ឋាន សំដៅផ្ទេរសិទ្ធិអំណាច មុខងារ និងធនធានទៅឲ្យរដ្ឋបាលថ្នាក់ក្រោមជាតិ ដើម្បីឲ្យមានការទទួលខុសត្រូវច្បាស់លាស់ក្នុងការផ្តល់សេវាសាធារណៈ និងការអភិវឌ្ឍមូលដ្ឋាន ឆ្លើយតបទៅនឹងតម្រូវការ និងដោះស្រាយនូវបញ្ហាប្រឈមនានា របស់ប្រជាពលរដ្ឋនៅតាមមូលដ្ឋានរបស់ខ្លួន ។ ទី៣៖ លើកកម្ពស់ការចូលរួម និងភាពជាម្ចាស់របស់ប្រជាពលរដ្ឋ នៅមូលដ្ឋាន ក្នុងការធ្វើសេចក្តីសម្រេចពាក់ព័ន្ធនឹងការគ្រប់គ្រង ដឹកនាំ និងអភិវឌ្ឍមូលដ្ឋានរបស់ខ្លួន សំដៅចូលរួមកាត់បន្ថយភាពក្រីក្រ និងលើកកម្ពស់គុណភាពជីវិតរបស់ប្រជាពលរដ្ឋ។
ព័ត៌មានជាតិ ថ្មីៗ
ដើម្បីធានាឲ្យដំណើរការចាប់ផ្តើមអនុវត្តនូវរចនាសម្ព័ន្ធថ្មី នៃរដ្ឋបាលស្រុកបន្ទាយស្រី មានភាពរលូន ឯកឧត្តម អភិបាលខេត្ត បានផ្ដល់អនុសាសន៍ មួយចំនួនក្នុងគ្រប់គ្រងរចនាសម្ព័ន្ធថ្មីនេះ រួមមាន ចាត់ចែងអនុវត្តការងារស្របតាម នីតិវិធីរដ្ឋបាល និងនីតិវិធីហិរញ្ញវត្ថុ រហូតដល់មានការណែនាំថ្មីពីក្រសួង ស្ថាប័នពាក់ព័ន្ធនានា, រៀបចំទីតាំងបំពេញការងារ ដើម្បីងាយស្រួលក្នុងទំនាក់ទំនងការងារ, ចរាចរលិខិតស្នាមផ្លូវការ ស្របតាមរចនាសម្ព័ន្ធថ្មីនៃរដ្ឋបាលស្រុក, គ្រប់គ្រងបុគ្គលិករបស់ការិយាល័យជំនាញនៃក្រសួង ស្ថាប័ននានា មកជាបុគ្គលិករដ្ឋបាលថ្នាក់ក្រោមជាតិ របស់ក្រសួងមហាផ្ទៃ, គ្រប់គ្រងកិច្ចការ ឯកសារ និងទ្រព្យសម្បត្តិ ត្រូវបន្តគ្រប់គ្រង ដែល ធ្លាប់គ្រប់គ្រង និងប្រើប្រាស់ដោយការិយាល័យជំនាញនៃក្រសួង ស្ថាប័ន ខណៈធនធានហិរញ្ញវត្ថុ និងទ្រព្យសម្បត្តិ មុខងារទាំងនោះ នៅមិនទាន់បានផ្ទេរឱ្យបានស្របជាមួយមុខងារនៅឡើយ។ បន្ថែមពីនោះ ឯកឧត្តម អភិបាលខេត្ត ក៏បានលើកពីការ ពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ការរៀបចំកិច្ចប្រជុំក្រុមប្រឹក្សា និងការគាំទ្រដល់រដ្ឋបាលឃុំផងដែរ។ ដោយឡែក ទោះបីរដ្ឋបាលស្រុកបន្ទាយស្រីនៅពុំទាន់មាន ការិយាល័យច្រកចេញចូលតែមួយ រដ្ឋបាលស្រុកត្រូវប្រើប្រាស់មន្រ្តីនៅក្នុងការិយាល័យនៃរចនាសម័្ពន្ធថ្មី ក្នុងដែនសមត្ថកិច្ចនៃវិស័យរបស់ខ្លួន និងផ្តល់យោបល់បច្ចេកទេសទៅតាមនីតិវិធី រហូតដល់មានការណែនាំជាថ្មីពីក្រសួងមហាផ្ទៃ។
អត្ថបទ ៖ សេង ផល្លី
រូបភាព៖ រដ្ឋបាលខេត្ត
