ព័ត៌មានជាតិ ថ្មីៗ
ព្រឹកថ្ងៃទី១១ ខែកុម្ភៈ ឆ្នាំ២០២០នេះ លោកឧត្តមសេនីយ៍ទោ ទិត្យ ណារ៉ុង ស្នងការ នៃស្នងការដ្ឋាននគរបាលខេត្តសៀមរាប រំពឹងថា គ្រោះថ្នាក់ចរាចរណ៍ផ្លូវគោក នៅទូទាំងខេត្តសៀមរាប ក្នុងឆ្នាំ២០២០នេះ នឹងមានការថយចុះតាមរយៈ ពង្រឹងតួនាទីអ្នកអនុវត្តច្បាប់ រឹតបន្តឹងច្បាប់ ផ្សព្វផ្សាយច្បាប់ចរាចរណ៍ រួមនិងវិធានការមួយចំនួនទៀត។
នៅក្នុងកិច្ចប្រជុំផ្សព្វផ្សាយផែនការសកម្មភាព ការរឹតបន្តឹងអនុវត្ដន៍ច្បាប់ចរាចរណ៍ផ្លូវគោក នៅស្នងការដ្ឋាននគរបាលខេត្តសៀមរាប លោកស្នងការនគរបាលខេត្ត លើកឡើងថា អនុវត្តតាមទិសដៅការងារ សុវត្ថិភាព និងស្មារតី ប្រកាស របស់ គណៈកម្មាធិការជាតិសុវត្ថិភាពចរាចរណ៍ផ្លូវគោក បានកំណត់យក ឆ្នាំ ២០២០ ជាឆ្នាំ នៃ ការរឹតបន្ដឹង ការអនុវត្ត ច្បាប់ចរាចរណ៍ផ្លូវគោក ឱ្យបានសម្រេចជោគជ័យ និង បានដាក់ចេញ នូវផែនការសកម្មភាព ការរឹតបន្ដឹងអនុវត្ត ច្បាប់ចរាចរណ៍ផ្លូវគោក។ វិធានការ ដែលបានដាក់ចេញទាំង៦រួមមាន៖
ទី ១- បង្កើនប្រសិទ្ធភាព ការអនុវត្តច្បាប់ចរាចរណ៍ ផ្លូវគោកសំដៅកាត់បន្ថយ ជាអតិបរមានូវហេតុការណ៍ គ្រោះថ្នាក់ និង ជនរងគ្រោះថ្នាក់ចរាចរណ៍ ។
ទី ២- រៀបចំសណ្តាប់ធ្នាប់ចរាចរណ៍ផ្លូវគោក ឲ្យកាន់តែមានភាពល្អប្រសើរជាលំដាប់ ។
ទី ៣- លើកកម្ពស់ ថែមទៀតនូវស្មារតី ចូលរួមគោរពការអនុវត្តច្បាប់ ស្ដីពីចរាចរណ៍ផ្លូវគោក ។
ទី ៤- ដាក់ចេញវិធានការជាក់ស្ដែង ដើម្បីពង្រឹងគុណភាព ក្នុងការដោះស្រាយច្បាប់ស្តីពីចរាចរណ៍ផ្លូវគោក ។
ទី ៥- រៀបចំកម្លាំង មធ្យោបាយ ឧបករណ៍ សម្ភារៈ បច្ចេកទេស បម្រើ ប្រតិបត្តិការ ឲ្យបានគ្រប់គ្រាន់ ។
និង ទី ៦- ត្រូវ លើកសរសើរ លើកទឹកចិត្ត ចំពោះមន្ដ្រី មានស្នាដៃ និង អនុវត្តន៍វិន័យ ម៉ឹងម៉ាត់ ចំពោះមន្ដ្រី ដែលខុសឆ្គង ក្នុងករណីធ្ងន់ធ្ងរ ត្រូវអនុវត្តន៍ វិធានការច្បាប់ ៕
