ថ្ងៃទី១៨ ខែកុម្ភៈ ឆ្នាំ២០២០ ជាខួបលើកទី៦៥ នៃការបង្កើតកាកបាទក្រហមកម្ពុជា។ ជារៀងរាល់ឆ្នាំ សាខាកាកបាទក្រហមកម្ពុជាខេត្តសៀមរាប តែងតែអបអរទិវាដ៏មានអត្ថន័យនេះ តាមរយៈការសម្អាតបរិស្ថាន នៅក្នុង ឧទ្យានសហស្សវត្សរ៍ កាកបាទក្រហមកម្ពុជា ក្នុងក្រុងសៀមរាប។
ដើម្បីអបអរ និងរំលឹកទិវាជាប្រវត្តិសាស្ត្រ នៃថ្ងៃបង្កើតកាកបាទក្រហមកម្ពុជា ១៨ កុម្ភៈ ១៩៥៥ លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជា បានដឹកនាំគណៈកម្មាធិការ គណៈកិត្តិយសសាខា មន្ត្រីនិយោជិតសាខាកាកបាទក្រហមកម្ពុជា ខេត្តសៀមរាប អ្នកស្ម័គ្រចិត្ត ទីប្រឹក្សាយុវជនកាកបាទក្រហមកម្ពុជា មន្ត្រីខណ្ឌរដ្ឋបាលព្រៃឈើ នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប មន្ត្រីមន្ទីរបរិស្ថានខេត្ត គរុសិស្សនៃសាលាគរុកោសល្យ និងវិក្រឹតការខេត្ត សហភាពសហព័ន្ធយុវជនកម្ពុជា ជាច្រើនរូប ចូលរួមបោសសម្អាតសំរាម ស្លឹកឈើងាប់ ជម្រះស្មៅ ក្នុងឧទ្យាន ដែលមានផ្ទៃដីសរុប៤ហិកតា។
លោកជំទាំវ ទាង អេង ទៀ សីហា មានប្រសាសន៍ថា ថ្ងៃទី១៨ ខែកុម្ភៈ មិនត្រឹមតែជាថ្ងៃកំណើតកាកបាទក្រហមកម្ពុជាប៉ុណ្ណោះទេ សម្រាប់ខេត្តសៀមរាប ថ្ងៃដ៏មានអត្ថន័យនេះ ក៏ជាថ្ងៃបង្ហាញដល់គ្រប់មជ្ឈដ្ឋានជាតិ អន្តរជាតិ បានយល់កាន់តែច្បាស់ពីអត្ថប្រយោជន៍នៃធនធានធម្មជាតិ និង ផលប៉ះពាល់ មកលើភពផែនដី ដែលបណ្ដាលពីការបាត់បង់ធនធានធម្មជាតិ ។
ព័ត៌មានជាតិ ថ្មីៗ
លោកជំទាវ គូសបញ្ជាក់ថា ស្មារតីចូលរួមសម្អាតបរិស្ថានធម្មជាតិ នៅក្នុងឧទ្យានសហស្សវត្ស កាកបាទក្រហមកម្ពុជា នាពេលនេះ មិនត្រឹមតែរួមចំណែកថែរក្សាគម្របបៃតងនៃតំបន់រមណីយដ្ឋានអង្គរប៉ុណ្ណោះទេ តែយើងក៏បានបង្ហាញពីឆន្ទៈរបស់កម្ពុជា ក្នុងការចូលរួម កាត់បន្ថយបម្រែបម្រួលអាកាសធាតុ ដែលពិភពលោកកំពុងប្រឈមផងដែរ។
តាមការឲ្យដឹងពី លោក ស៊ុ សំអន នាយកប្រតិបត្តិសាខាកាកបាទក្រហមកម្ពុជា ខេត្តសៀមរាប ឧទ្យានសហស្សវត្សរ៍ ក្នុងក្រុងសៀមរាប ស្ថិតនៅតាមបណ្ដោយផ្លូវទៅប្រាសាទអង្គរវត្ត បង្កើតនៅឆ្នាំ ១៩៩៩ ក្រោមព្រះរាជអធិបតីភាពដ៏ខ្ពងខ្ពង់បំផុត សម្តេចព្រះមហាក្សត្រី នរោត្តម មុនិនាថ សីហនុ ព្រះប្រធានកិត្តិយសកាកបាទក្រហមកម្ពុជា និងផ្តួចផ្ដើមបង្កើតដោយ ឯកឧត្តម ព្រឹទ្ធាចារ្យ ម៉ី សាមឺឌី អតីតអគ្គលេខាធិការកាកបាទក្រហមកម្ពុជា និង លោកព្រឹទ្ធាចារ្យ ទួន ទេស មន្ត្រីសាខាកាកបាទក្រហមកម្ពុជាខេត្តសៀមរាប ដើមី្បទុកជាប្រវត្តិសាស្ត្រ និងជាកេរ្តិ៍មរតកសម្រាប់កូនចៅជំនាន់ក្រោយ។
គួររំលឹកថា ការធ្វើពលកម្មសម្អាតបរិស្ថាន ក្នុងឧទ្យានសហស្សវត្សរ៍ កាកបាទក្រហមកម្ពុជា ដើម្បីអបអរ ថ្ងៃបង្កើតកាកបាទក្រហមកម្ពុជា ១៨ កុម្ភៈ សាខាកាកបាទក្រហមកម្ពុជាខេត្តសៀមរាប ចាប់ផ្ដើមប្រារព្ធជាលើកដំបូងនៅឆ្នាំ២០១១។
អត្ថបទ និង រូបភាព៖ ទ្រា ពន្លឺ និង ម៉ី សុខារិទ្ធ
កែសម្រួល៖ សេង ផល្លី
