(សេអ៊ូល)៖ អាជ្ញាធរកូរ៉េខាងជើងបានតម្រូវឱ្យជនបរទេស ៣៨០នាក់ ស្ថិតនៅកន្លែងដាច់ដោយឡែកឆ្ងាយពីគេឯង ដែលនេះជាវិធានការទប់ស្កាត់ការរីករាលដាល នៃជំងឺឆ្លង COVID-19 ខណៈប្រទេសឯកោជាងគេបំផុតនៅលើពិភពលោកមួយនេះ មិនទាន់សេចក្ដីរាយការណ៍ពីករណីឆ្លងជំងឺនេះនៅឡើយទេ។ នេះបើតាមការចេញផ្សាយ ដោយទីភ្នាក់ងារព័ត៌មាន យ៉ុនហាប់ នៅរសៀលថ្ងៃចន្ទ ទី២៤ ខែកុម្ភៈ ឆ្នាំ២០២០។
ទីភ្នាក់ងារព័ត៌មានយ៉ុនហាប់ ធ្វើសេចក្ដីរាយការណ៍យ៉ាងដូចឆ្នេះ ដោយផ្អែកលើសារព័ត៌មានមជ្ឈិមរដ្ឋកូរ៉េខាងជើងនៅថ្ងៃចន្ទនេះ ហើយមិនបានបញ្ជាក់អ្វីលម្អិតលើសពីនេះឡើយ ដោយគ្រាន់តែឱ្យដឹងថា ជនបរទេសទាំងអស់ភាគច្រើនជាមន្ត្រីទូតប្រចាំទីក្រុងព្យុងយ៉ាង។ ជនបរទេស ២០០នាក់ ក៏ធ្លាប់ត្រូវបានអាជ្ញាធរកូរ៉េខាងជើង ដាក់ឱ្យនៅដាច់ដោយឡែកពីគេឯងអស់រយៈពេល ៣០ថ្ងៃរួចហើយដែរ ប៉ុន្តែនៅពេលផុតកំណត់ អាជ្ញាធរស្រាប់តែអូសបន្លាយវិធានការបន្តទៀត រីឯវិធានការថ្មីលើជនបរទេសខាងលើ ក៏មិនទាន់ដឹងថា នឹងមានរយៈពេលប៉ុន្មានថ្ងៃនោះទៀតឡើយ។
គួរបញ្ជាក់ថា មកទល់បច្ចុប្បន្នមិនទាន់មានសេចក្ដីរាយការណ៍ពីករណីឆ្លង COVID-19 ណាមួយ នៅក្នុងប្រទេសកូរ៉េខាងជើងនោះទេ បើទោះជាមានការសង្ស័យជាច្រើនថា ទីក្រុងព្យុងយ៉ាងកំពុងព្យាយាមលាក់បាំងករណីឆ្លងនោះក៏ដោយ៕
