ចាប់ពីថ្ងៃទី២៥ ខែកុម្ភៈ រហូតដល់ ខែឧសភាឆ្នាំ២០២០ នេះ សំបុត្រចូលទស្សនាតំបន់អង្គរ ក្នុងខេត្តសៀមរាប សម្រាប់ភ្ញៀវទេសចរអន្តរជាតិ នឹងមានសុពលភាពយូរជាងមុន និងលក់ជូនក្នុងតម្លៃដដែល នេះបើតាមលិខិតមួយរបស់ក្រសួងសេដ្ឋកិច្ចនិងហិរញ្ញវត្ថុ ជម្រាបជូនគ្រឹះស្ថានអង្គរ ចុះថ្ងៃទី២៥ ខែកុម្ភៈ ឆ្នាំ២០២០។
យោងតាមលិខិតដដែលនេះ ប្រភេទសំបុត្រ ដែលមានសុពលភាពចាប់ពី ០១ថ្ងៃ ដល់ ០៧ថ្ងៃ នឹងត្រូវបន្ថែមចំនួនថ្ងៃ ដូចខាងក្រោម:
១/ ប្រភេទសំបុត្រចូលទស្សនាតំបន់អង្គរមួយថ្ងៃ នឹងមានសុពលភាពរយៈពេល ០២ ថ្ងៃ ក្នុងតម្លៃដដែល ៣៧ ដុល្លារអាមេរិក
ព័ត៌មានជាតិ ថ្មីៗ
២/ ប្រភេទសំបុត្រចូលទស្សនាតំបន់អង្គរបីថ្ងៃ នឹងមានសុពលភាពរហូតដល់០៥ ថ្ងៃ ក្នុងតម្លៃដដែល ៦២ ដុល្លារអាមេរិក
៣/ ប្រភេទសំបុត្រចូលទស្សនាតំបន់អង្គរប្រាំពីរថ្ងៃ នឹងមានសុពលភាពរហូតដល់ ១០ ថ្ងៃ ក្នុងតម្លៃដដែល ៧២ ដុល្លារអាមេរិក
ការពន្យារសុពលភាព នៃសំបុត្រចូលទស្សនាតំបន់អង្គរ និងរក្សាតម្លៃឱ្យនៅដដែលនេះ គឺជាវិធានការគាំទ្រវិស័យទេសចរណ៍ របស់រាជរដ្ឋាភិបាលកម្ពុជាមួយជំហានទៀត ដើម្បីលើកកម្ពស់វិស័យទេសចរណ៍ ក្នុងខេត្តសៀមរាប ដោយពន្យារពេលស្នាក់នៅ របស់ភ្ញៀវទេសចរអន្តរជាតិនៅកម្ពុជាឱ្យបានកាន់តែយូរ។
វិធានការគាំទ្រវិស័យទេសចរណ៍នេះដែរ ធ្វើឡើងបន្ទាប់ពីការផ្ទុះឡើងនូវជំងឺ Covid-19 នៅទូទាំងពិភពលោក ដែលបានធ្វើឱ្យជនបរទេសចម្រុះជាតិសាសន៍ មានការភ័យខ្លាច និងផ្អាក ឬលុបជើងហោះហើរទៅកាន់បណ្ដាប្រទេសនានា។
គួរបញ្ជាក់ដែរថា វិធានការគាំទ្រវិស័យទេសចរណ៍ ក្នុងខេត្តសៀមរាបនេះ គឺជាការយកចិត្តទុកដាក់ខ្ពស់ពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងកិច្ចប្រជុំឧត្តមក្រុមប្រឹក្សា ពិគ្រោះ និងផ្ដល់យោបល់កាលពីថ្ងៃទី ២៤ ខែកុម្ភៈ ឆ្នាំ២០២០ បន្ទាប់ពី
ការវាយតម្លៃបឋម របស់រាជរដ្ឋាភិបាល បណ្ដាលមកពីជំងឺCovid-19 មកលើវិស័យសេដ្ឋកិច្ចសំខាន់ៗនៅកម្ពុជា។ ក្នុងនោះមានវិស័យចំនួន២ បាននិងកំពុងរងផលប៉ះធ្ងន់ជាងគេគឺ វិស័យទេសចរណ៍ និងវិស័យកាត់ដេរ។ សម្រាប់ខែកុម្ភៈ ឆ្នាំ២០២០នេះ វិស័យទេសចរណ៍នៅកម្ពុជា ធ្លាក់ចុះជាង៦០ភាគរយ ជាពិសេសទេសចរចិន ធ្លាក់ចុះក្នុងរង្វង់៩០ភាគរយ។ ជាមួយនោះ អាជីកម្មទេសចរណ៍ក្នុងខេត្តសៀមរាប មានការប៉ះពាល់ធ្ងន់ធ្ងរជាងគេ បើធៀបនឹងគោលដៅទេសចរណ៍សំខាន់ៗក្នុងប្រទេស។
។
សូមជម្រាបដែរថា ក្រៅពីវិធានការខាងលើ រាជរដ្ឋាភិបាល ក៏ដាក់ចេញនូវវិធានការមួយចំនួនទៀតផងដែរដូចជា៖
១/ លើកលែងការបង់ពន្ធប្រចាំខែគ្រប់ប្រភេទសណ្ឋាគារ និងផ្ទះសំណាក់ ដែលបានចុះបញ្ជីជាមួយពន្ធដារ និងមានសកម្មភាពអាជីវកម្ម រយៈពេល៤ខែ ចាប់ពីខែកម្ភៈ រហូតដល់ខែឧសភា ២០២០។ ប៉ុន្តែ សណ្ឋាគារ និងផ្ទះសំណាក់ ទាំងនោះ នៅតែមានកាតព្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញគ្រប់គ្រងអាករលើតម្លៃបន្ថែមជារៀងរាល់ខែ ក្នុងរយៈពេលលើកលែងពន្ធនេះ។
២/ មិនធ្វើសវនកម្មពេញលេញសម្រាប់ឆ្នាំ២០២០ ចំពោះសហគ្រាសសណ្ឋាគារ ផ្ទះសំណាក់ បានចុះបញ្ជីជាមួយអគ្គនាយកពន្ធដារ និង អាជីវកម្មកំពុងមានសកម្មភាពក្នុងខេត្តសៀមរាប
៣/ ធ្វើវិចារណកម្មថវិកាជាតិឆ្នាំ២០២០ ទាំងចំណាយចរន្ត និងចំណាយវិនិយោគ ជាពិសេសកាត់បន្ថយការចូលរួមកិច្ចប្រជុំនៅក្រៅប្រទេស ដោយគ្រប់ក្រសួងស្ថាប័នរាជរដ្ឋាភិបាល និងចូលរួមជំរុញវិស័យទេសចរណ៍ក្នុងស្រុក ឲ្យទៅជាចលនាជាតិធំទូលាយ។ តាមរយៈ ការជំរុញនូវការធ្វើសិក្ខាសាលា កិច្ចប្រជុំ វគ្គបណ្ដុះបណ្ដាលខ្លីៗ និងកម្មវិធីផ្សេងៗទៀត រៀបចំដោយក្រសួងស្ថាប័នរាជរដ្ឋាភិបាល វិស័យឯកជន ស្ថានទូត អង្គការក្រៅរដ្ឋាភិបាល នៅតាមខេត្តសំខាន់ៗ ជាពិសេសខេត្តសៀមរាប។
អត្ថបទ និងរូបភាព: លោក សេង ផល្លី និងសហការី
