ជំនួបពាណិជ្ជកម្មទេសចរណ៍លើកទី០៣ ដែលមានកម្ពុជាធ្វើជាម្ចាស់ផ្ទះ បានប្រារព្ធឡើងនៅខេត្ដសៀមរាប រយៈពេល៤ថ្ងៃ ចាប់ពីថ្ងៃទី២៩ខែកុម្ភៈ ដល់ថ្ងៃទី០៣ខែមីនាឆ្នាំ២០២០ ដែលមានបណ្តាក្រុមហ៊ុនអ្នកទិញចំនួន៦០ មកពីជុំវិញពិភពលោក ដើម្បីផ្ដល់ឱកាសដល់ប្រតិបត្តិករទេសចរណ៍ និងពាណិជ្ជករទាំងអស់ ចាប់យកទីផ្សារថ្មី។
លោកបណ្ឌិត ធួន ស៊ីណាន ប្រធានសមាគមទេសចរណ៍អាស៊ី-ប៉ាស៊ីហ្វិកប្រចាំកម្ពុជា ហៅកាត់ថា ប៉ាតា (PATA) បង្ហាញថា ក្នុងចំណោមក្រុមហ៊ុនអ្នកទិញចំនួន៦០នេះ មាន៥០ក្រុមហ៊ុនមកពីប្រទេសកម្ពុជា ឥណ្ឌូនេស៊ី ម៉ាឡេស៊ី ឥណ្ឌា ហ្វីលីពីន មីយ៉ាន់ម៉ា និងថៃ។
លោករំពឹងថា បន្ទាប់ពីបញ្ហាជំងឺ Covid-19 បានបញ្ចប់ កម្ពុជានឹងទទួលបានកំណើនភ្ញៀវទេសចរឡើងវិញ ជាពិសេសភ្ញៀវទេសចរជនជាតិចិន។ លោកបានស្នើឱ្យប្រតិបត្តិករទេសចរណ៍ និងពាណិជ្ជករទាំងអស់គួររួមគ្នា ធ្វើទីផ្សារឱ្យបានច្រើន ដើម្បីឱ្យមានចរន្តរទេសចររស់រវើកឡើងវិញ ដោយមិនត្រូវអង្គុយចាំតែមើលនោះទេ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បង្ហាញថា ដោយសារវិបត្តិជំងឺ Covid-19 ពិព័រណ៍ទេសចរណ៍អន្តរជាតិដ៏ធំ ITB ឆ្នាំ2020 នៅទីក្រុង ប៊ែកឡាំង ប្រទេសអាឡឺម៉ង់ ត្រូវបានលុបចោល។ ដោយឡែក ពិព័រណ៍ទេសចរណ៍ PATA ដែលជាវេទិកាដ៏សំខាន់មួយផងដែរ សម្រាប់ផ្សព្វផ្សាយផលិតផលទេសចរណ៍ក្នុងអាស៊ី-ប៉ាស៊ីហ្វិក នៅតែប្រារព្ធឡើង ដើម្បីផ្លាស់ប្តូរបទពិសោធន៍ក្នុងធុរកិច្ចទេសចរណ៍ និងពិភាក្សាគ្នាដោយស្មារតីសហប្រតិបត្តិការ សំដៅជំរុញការអភិវឌ្ឍវិស័យទេសចរណ៍ ប្រកបដោយនិរន្តរភាព។
ខណៈពិភពលោកកំពុងឋិតក្នុងវិបត្តិជំងឺ Covid-19 ឯកឧត្តម រដ្ឋលេខាធិការ បញ្ជាក់ថា រាជរដ្ឋាភិបាលកម្ពុជា បានដាក់ចេញនូវវិធានការគោល៤ ដែលមាន៩០សកម្មភាព ដើម្បីសម្រាលបញ្ហាលំបាក និងជំរុញការអភិវឌ្ឍវិស័យទេសចរណ៍។ ក្នុងនោះមាន ការជំរុញសកម្មភាពទេសចរណ៍ក្នុងស្រុក ការទាក់ទាញភ្ញៀវពីប្រទេសជិតខាងក្នុងតំបន់ ការជួយសម្រាលការលំបាកនៃឧស្សាហកម្មទេសចរណ៍ ពិសេសនៅខេត្តសៀមរាប និងខេត្តព្រះសីហនុ ។ គោលការណ៍ទាំងនោះ ដូចជាលើកលែងពន្ធសំរាប់សណ្ឋាគារនិងផ្ទះសំណាក់មួយរយៈ សម្រួលសំបុត្រចូលទស្សនាអង្គរ និងផ្តល់សេវាគាំទ្រហិរញ្ញវត្ថុមួយផ្នែកដល់ការបណ្តុះបណ្តាលបុគ្គលិកនិងនិយោជិតដែលបាត់បង់ទាំងស្រុងឬមួយផ្នែកនៃការងារ ដោយសារការថយចុះនូវភ្ញៀវទេសចរផងដែរ។
គួររំលឹកថា ព្រឹត្តិការណ៍ “ជំនួបពាណិជ្ជកម្មទេសចរណ៍លើកទី១ ធ្វើឡើងកាលពីឆ្នាំ២០១៨ ជំនួបពាណិជ្ជកម្មទេសចរណ៍លើកទី២ ត្រូវបានធ្វើឡើងកាលពីឆ្នាំ២០១៩។
អត្ថបទ និងរូបភាព: លោក បូ សាវី
កែសម្រួលដោយ៖ លោក សេង ផល្លី
