ប្រធានបទ មានសន្តិភាព មានការលើកកម្ពស់សមភាពយេនឌ័រ គឺស្របតាមបរិការណ៍នៃប្រទេសកម្ពុជា និងឆ្លើយតបទៅនឹងក្របខណ្ឌថ្មីជាសាកល ដោយមិនទុកនរណាម្នាក់ ស្ថិតក្នុងភាពឯកោនោះឡើយ។ អង្គការអមរាបានរៀបចំពិធីអបអរសាទរទិវានារីអន្តរជាតិ ៨ មីនា ឆ្នាំ២០២០ នៃកម្មវិធី “សកម្មភាពស្ត្រី និងមានភាពអង់អាច ដើម្បីសិទ្ធិស្ត្រី ក្នុងគោលបំណង រំលឹកឡើងវិញនូវការទាមទារសិទ្ធិដែលស្ត្រីគ្រប់រូបទទួលបានសិទ្ធិស្មើភាពគ្នា នាព្រឹកថ្ងៃទី០៧ ខែមីនា ឆ្នាំ២០២០នេះ នៅក្នុងបរិវេណវត្តសសរស្តម្ភ ស្រុកពួក ខេត្តសៀមរាប ដែលគាំទ្រសហការរៀបចំឡើង ដោយអង្គការអមរា និង អាជ្ញាធរមូលដ្ឋានឃុំ-ស្រុក ដោយមានប្រជាពលរដ្ឋចូលរួមប្រមាណជាង១០០នាក់។
លោកស្រី ប៊ុន គីមលី សមាជិកក្រុមប្រឹក្សាស្រុកពួក និងេជាប្រធានគណកម្មាធិការពិគ្រោះយោបល់កិច្ចការស្រ្តី និងកុមារថ្នាក់ស្រុក បានលើកឡើងថា បុគ្គលគ្រប់រូប មានសិទ្ធិស្មើគ្នាតាំងពីកំណើតមកម្លេះ ដូច្នេះមិនមានការបែងចែក អ្នកនេះមានសិទ្ធិច្រើន ឬតិចនោះឡើយ។ ធម្មជាតិបុរសដែលមានកម្លាំងខ្លាំង ក៏មិនមែនសម្រាប់ប្រើទៅលើអំពើហិង្សានោះដែរ តែសម្រាប់ការគាំទ្រ ការពារ ស្ត្រី និងកុមារ ហើយវប្បធម៌នៃការពិភាក្សាគ្នារវាងបុរស និងស្ត្រី គឺជាជម្រើសដ៏ប្រពៃបំផុត ដើម្បីសុភមង្គល និងភាពរុងរឿងនៃគ្រួសារ។ សមភាពយេនឌ័រនាំឲ្យមានភាពថ្លៃថ្នូរក្នុងការរស់នៅជាមួយគ្រួសារ និងសង្គមជាតិ មិនចំពោះតែស្រ្តីនោះទេ ក្នុងនោះក៏មានបុរសផងដែរ ត្រូវនាំគ្នានិយាយ និងក្រោកឈរឡើង ដើម្បីទទួលយកចំណេះដឹងសង្គម អំពីសិទ្ធិស្រ្តី គឺជាការព្យាយាម និងខិតខំប្រឹងប្រែងរបស់អង្គភាពពាក់ព័ន្ធ ស្ថាប័នរដ្ឋ ដើម្បីបម្រើប្រជាពលរដ្ឋ និងអ្នកពាក់ព័ន្ធទាំងនោះ ដោយស្មើភាពរវាងគ្នានិងគ្នា មិនរអើងពូជសាស្ត្រពណ៌ សម្បុរឡើយ។
លោកស្រី ហង្ស ចន្ធី តំណាងអង្គការ អមរា និងជាគ្រូបង្គោលបណ្តុះបណ្តាលកម្មវិធី និងសកម្មភាពស្ត្រី ដើម្បីទទួលបានសំលេង សិទិ្ធស្ត្រី និងភាពអង់អាច នៃអង្គការអមរា បានលើកឡើងថា៖ នេះគឺជាសារសម្រាប់ការប្រារព្ធពិធីអបអរសាទរ ទិវានារីអន្តរជាតិ ៨មីនា ឆ្នាំ២០២០ លើកទី១០៩ យើងទាំងអស់គ្នាត្រូវចូលរួមលើកកំពស់សមភាពយេនឌ័រ របស់ស្ត្រីដែលជាក្រុមប្រឹក្សាឃុំ កម្មវិធី និងសកម្មភាពស្ត្រី ដើម្បីទទួលបានសំលេង សិទ្ធិស្ត្រី និងភាពអង់អាច នាពេលបច្ចប្បន្ននេះ ក្នុងគោលបំណងរំលឹកនូវពាក្យស្លោកដែលស្ត្រីទាមទាបាន
១. សិទ្ធិទទួលនូវការគាំពារមាតា និងទារក
២. សិទ្ធិទទួលបាននូវប្រាក់បៀវត្សន៍ស្មើៗគ្នាលើការងារ
៣. សិទ្ធិទទួលបាន ១ថ្ងៃធ្វើការត្រឹមតែ ៨ម៉ោងប៉ុណ្ណោះ។
លោកស្រីបានបន្តទៀតថា ដើម្បីឲ្យស្ត្រីទាំងអស់ ដែលជាអ្នកតំណាងឲ្យប្រជាពលរដ្ឋក្នុងដែនដីរបស់ខ្លួន ចងចាំជានិច្ចក្នុងអារម្មណ ក្នុងឆន្ទ: ក្នុងមន:សិកា និងថែរក្សាស្លោកទាំងនេះ ស្ថិតស្ថេរជារៀងដរាបបាន គឺត្រូវមានគណនេយ្យភាពជាមួយប្រជាពលរដ្ឋ និងរាជរដ្ឋាភិបាលជាដើម៕
អត្ថបទ និងរូបភាព៖ ស៊ាន សុផាត
