នាព្រឹកថ្ងៃទី១២ ខែមីនា ឆ្នាំ២០២០នេះ នៅទីស្តីការ ក្រសួងព័ត៌មាន មានរៀបចំ កិច្ចប្រជុំគណៈកម្មការសម្របសម្រួលដោះស្រាយវិវាទអ្នកសារព័ត៌មាន ក្រោមអធិបតីភាព ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន ដែល គណៈកម្មការនេះ មានភារកិច្ច សម្របសម្រួលវិវាទរបស់អ្នកសារព័ត៌មាន បានចុះបញ្ជី នៅក្រសួងព័ត៌មាន ហើយត្រូវទទួលរងការប្តឹងតវ៉ា ពីភាគីពាក់ព័ន្ធ ក្នុងពេលបំពេញវិជ្ជាជីវៈ។
គណៈកម្មការនេះ មាន ឯកឧត្តម ខៀវ កាញារីទ្ធ ជាប្រធាន និងមាន អនុប្រធានចំនួន ៤ រូប ក្នុងនោះមាន អនុប្រធានអចិន្ត្រៃយ៍ ១ រូប គឺ ឯកឧត្តម ជា កែវចិន្ថា ទីប្រឹក្សាក្រសួង និងជាប្រធាននាយកដ្ឋាននិតិកម្ម ក្រសួងព័ត៌មាន។ គណៈកម្មការនេះដែរ សមាជិកចំនួន ១៨ រូប ក្នុងនោះ សមាជិក មកពីស្ថាប័នសារព័ត៌មាន ចំនួន ៤ រួមមាន ក្លឹបអ្នក កាសែតកម្ពុជា សហភាពសហព័ន្ធអ្នកកាសែតកម្ពុជា សមាគមអ្នកសារព័ត៌មានកម្ពុជា ដើម្បីសេរីភាព និងសមាគមកម្ពុជាការពារអ្នកកាសែត។
ពាក្យបណ្ដឹង របស់អ្នកសារព័ត៌មាន ដែលបានបញ្ជូនមកគណៈកម្មការនេះ នឹងត្រូវពិនិត្យ សិក្សាអំពីអង្គហេតុ និងអង្គច្បាប់លើបណ្តឹងនីមួយៗ ជូនថ្នាក់ដឹកនាំ សម្រេច។ ក្នុងនោះ គណៈកម្មការ នឹងសម្របសម្រួល ការបញ្ជូនពាក្យបណ្តឹងរបស់អ្នកសារព័ត៌មានមានវិជ្ជាជីវៈ ទៅក្រុមមេធាវីស្ម័គ្រចិត្ត សម្តេចតេជោសែន ធ្វើការតាមដានការអនុវត្តនីតិវិធី បណ្តឹងនីមួយៗតាំងពីដើមរហូតបញ្ចប់ និងធ្វើរបាយការណ៍ជាទៀតទាត់ដល់ថ្នាក់ដឹកនាំ។
ព័ត៌មានជាតិ ថ្មីៗ
ឯកឧត្តម រដ្ឋមន្ត្រី ខៀវ កាញារីទ្ធ មានប្រសាសន៍ថា បន្ទាប់ពីកិច្ចប្រជុំនេះ នឹងមានការចេញជាសេចក្តីប្រកាស ព័ត៌មាន ទាក់ទងនិងកិច្ចការងាររបស់គណៈកម្មការសម្របសម្រួល ដោះស្រាយវិវាទ អ្នកសារព័ត៌មាន ការបង្កើតជាក្រុមធ្វើការងារតាមប្រព័ន្ធអនឡាញ ដើម្បីងាយស្រួលធ្វើកិច្ចការងារទំនាក់ទំនងគ្នា រវាងប្រធាន អនុប្រធាន និងសមាជិកទាំងអស់ ។
អត្ថបទ និងរូបភាព៖ ក្រសួងព័ត៌មាន
