តាមរយៈ ផេកហ្វេសប៊ុករបស់ឯកឧត្តម អូស្មាន ហាស្សាន់ កាលពីយប់ថ្ងៃទី១៧ ខែមីនា ឆ្នាំ២០២០ ឯកឧត្តមទេសរដ្ឋមន្ត្រី បានអំពាវនាវ ដល់ប្រជាពលរដ្ឋកម្ពុជាទាំងអស់ ពង្រឹងសាមគ្គីភាព ក្នុងការចូលរួមបង្ការ ប្រយុទ្ធប្រឆាំងការរីក រាលដាល នៃ ជម្ងឺកូវីដ១៩ ជាមួយ រាជរដ្ឋាភិបាល។
ប្រសាសន៍ទាំងស្រុងរបស់ឯកឧត្តម លើកឡើងថា៖
ថ្នាក់ដឹកនាំឥស្លាមគ្រប់លំដាប់ថ្នាក់ និងបងប្អូនសាសនិកឥស្លាមកម្ពុជាទាំងអស់ជាទីគោរពស្នេហា និងជាទីមេត្រី !
– យើងទាំងអស់គ្នា ត្រូវលើកកំពស់ស្មារតី ប្រកបដោយឆន្ទៈមោះមុត ដើម្បីរួមចំណែក អោយបានសកម្មបំផុត ក្នុងការ បង្ការ ប្រយុទ្ធប្រឆាំងការរីក រាលដាល នៃ ជម្ងឺកូវីដ១៩ ជាមួយ រាជរដ្ឋាភិបាល ក្រសួង ស្ថាប័ន និងអាជ្ញាធរ មានសមត្ថកិច្ច ថ្នាក់ជាតិ ថ្នាក់ក្រោមជាតិ ដោយគោរព អនុវត្តអោយបានខ្ជាប់ខ្ជួននូវការណែនាំ របស់ ក្រសួងសុខាភិបាល ។
– ជាមួយគ្នានេះ ត្រូវប្រមូលកម្លាំងរួបរួមគ្នាធ្លុងមួយ ពង្រឹងសាមគ្គីភាពជាមួយពុទ្ធបរិស័ទ គ្រឹស្ទបរិស័ទ សាសនិកនៃសាសនាផ្សេងៗទៀត ដោយព្យាយាម អត់ធ្មត់ពន្យល់ ណែនាំ បងប្អូន សាសនិក ឥស្លាម ពីក្រឹត្យច្បាប់សាសនាឥស្លាម ដែលត្រូវបានលើកលែងនៅក្នងកាលៈទេសៈដ៏ ចាំបាច់បំផុតមួយរបស់ប្រទេសជាតិ និងលើគ្រប់ផ្នែកដែលពាក់ព័ន្ធ ដែលត្រូវតែចូលរួមជាមួយរាជរដ្ឋាភិបាល ក្រោមការដឹកនាំប្រកបដោយគតិបណ្ឌិត បុិនប្រសព្វ ឈ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដោយស្មារតី គោរព ស្រឡាញ់នូវសុខ សន្តិភាព និង ភាពសុខដុមនីយកម្ម គ្មានការរើសអើង ជាតិសាសន៍ ជនជាតិ ពណ៌សំបុរ និង ជំនឿសាសនា នៅលើទឹកដីកម្ពុជា ដែលកំពុងអភិវឌ្ឍរីកចំរើនដូចសព្វថ្ងៃ ដែលមនុស្សគ្រប់ៗរូបចង់បាន ។
ព័ត៌មានជាតិ ថ្មីៗ
អត្ថបទ និង រូបថត ៖ ហ្វេសប៊ុក ឯកឧត្តម អូស្មាន ហាស្សាន់
សម្រួលអត្ថបទ៖ សេង ផល្លី
